2025 جىلدىڭ باسىنان بەرى كامەلەتكە تولماعاندار ىستەرى جانە ولاردىڭ قۇقىقتارىن قورعاۋ جونىندەگى كوميسسيالار شامامەن 4 مىڭ وتىرىس وتكىزىپ، 7 مىڭنان استام ءىستى قارادى، - دەپ حابارلايدى Aqshamnews.kz سالا مينيسترلىگىنە سىلتەمە جاساپ.
ونىڭ ىشىندە مىڭنان استام ءىس ومىرلىك قيىن جاعدايعا تاپ بولعان وتباسىلارعا قاتىستى. مۇنداي وتباسىلارعا ماتەريالدىق، پسيحولوگيالىق، قۇقىقتىق جانە مەديسينالىق كومەك كورسەتىلىپ، سونىمەن قاتار جۇمىسپەن قامتۋعا، ەمدەلۋگە، بالالاردىڭ وقۋىنا جانە دەمالىسىن ۇيىمداستىرۋعا جاردەم كورسەتىلەدى.
بۇگىندە ەلىمىزدە بالالاردىڭ قۇقىقتارىن قورعاۋ، قۇقىقبۇزۋشىلىقتىڭ الدىن الۋ جانە وتباسىلاردى قولداۋ باعىتىندا مەملەكەتتىك ورگانداردىڭ ءوزارا ءىس-قيمىلىن ۇيلەستىرەتىن 271 كوميسسيا جۇمىس اتقارۋدا. ولار جوسپارلى ماسەلەلەردەن بولەك، قوعامدا كەڭ تالقىلاۋ تۋعىزعان جانە جەدەل شەشىمدى قاجەت ەتەتىن ىستەردى دە قارايدى.
«كامەلەتكە تولماعاندار ىستەرى جونىندەگى كوميسسيالار – بالالاردىڭ قۇقىقتارىن قورعاۋدىڭ باستى تەتىگى. كوميسسيالاردىڭ قىزمەتى قيىن جاعدايعا تاپ بولعان وتباسىلاردى دەر كەزىندە انىقتاپ، ولارعا قاجەتتى كومەك كورسەتۋگە مۇمكىندىك بەرەدى. ءبىز ۆەدومستۆوارالىق ءوزارا ءىس-قيمىلدى كۇشەيتىپ، بۋللينگتىڭ، كيبەربۋللينگتىڭ جانە سۋيسيدتىك مىنەز-قۇلىقتىڭ الدىن الۋ باعىتىندا جاڭا تاسىلدەر ەنگىزۋدەمىز»، – دەدى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
قۇقىق قورعاۋ ورگاندارىمەن بىرلەسىپ جۇرگىزىلگەن ۆەدومستۆوارالىق رەيدتەردىڭ ناتيجەسىندە بالالاردى تاربيەلەۋ جونىندەگى مىندەتتەرىن ورىنداماعان 21،8 مىڭنان استام اتا-انا، تۇنگى ۋاقىتتا كامەلەتكە تولماعانداردىڭ تۇرعىن ۇيدەن تىس جەردە بولۋىنا جول بەرگەن 107 مىڭنان استام زاڭدى وكىل، سونداي-اق ويىن-ساۋىق ورىندارىنا بالالاردى كىرگىزگەن 2 مىڭعا جۋىق كاسىپكەر اكىمشىلىك جاۋاپكەرشىلىككە تارتىلدى.
قازىرگى ۋاقىتتا كوميسسيالاردىڭ جۇمىسىن جەتىلدىرۋگە باعىتتالعان جاڭا ەرەجەلەر ازىرلەنۋدە. قۇجاتتا بۋللينگتىڭ، كيبەربۋللينگتىڭ جانە سۋيسيدتىك مىنەز-قۇلىقتىڭ الدىن الۋ، زەرتتەۋ جۇرگىزۋ جانە وڭىرلەرگە ادىستەمەلىك قولداۋ كورسەتۋ باعىتتارىنداعى وكىلەتتىكتەردى كەڭەيتۋ كوزدەلگەن. جاڭارتىلعان فورمات كوميسسيالاردىڭ تيىمدىلىگىن ارتتىرىپ، جەرگىلىكتى دەڭگەيدەگى جاۋاپكەرشىلىكتى كۇشەيتۋگە مۇمكىندىك بەرەدى.