سپورت ينفراقۇرىلىمى مەن بۇقارالىق سپورتتى دامىتۋدىڭ 2026–2028 جىلدارعا ارنالعان جول كارتالارىن ازىرلەپ، بەكىتۋ قاجەت. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى، - دەپ حابارلايدى Aqshamnews.kz.
- فۋتبول كلۋبتارىن جەكەشەلەندىرۋ تۋرالى پرەزيدەنت ۇندەۋىنە كاسىپكەرلەر ءۇن قوسىپ جاتىر. ءبىز كاسىپقوي سپورت ءۇشىن ساپالى رەزەرۆ قۇرۋىمىز كەرەك. سپورت مەكتەپ-ينتەرناتتارىنىڭ دامۋىنا دا كوڭىل ءبولۋ قاجەت. ءبىرقاتار وڭىردە، مىسالى، ۇلىتاۋ، اباي، الماتى جانە قوستاناي وبلىستارىندا ءالى كۇنگە دەيىن مۇنداي مەكەمەلەر جوق. اتىراۋ وبلىسىندا سپورت مەكتەپ-ينتەرناتىن سالۋ جوباسى مەملەكەتتىك-جەكەمەنشىك ارىپتەستىك اياسىندا سالىنىپ جاتىر. اتالعان وڭ تاجىريبەنى پايدالانۋعا بولادى، - دەدى ولجاس بەكتەنوۆ.
ۇكىمەت باسشىسىنىڭ ايتۋىنشا، استانادا جەكە ينۆەستيسيالار ەسەبىنەن قۇرىلعان يننوۆاسيالىق بالالار ورتالىقتارىنىڭ جەلىسىن دامىتۋ بويىنشا تابىستى تاجىريبە بار. ونى باسقا وڭىرلەردە دە قولدانۋ قاجەت.
- سپورت ينفراقۇرىلىمىن دامىتۋ قارقىنىن ساقتاپ قالۋ ماڭىزدى. سونداي-اق سپورت سالاسىن سيفرلاندىرۋ پروسەسىن جەدەلدەتۋ كەرەك. ەڭ الدىمەن، «ە-Sport» اقپاراتتىق جۇيەسىن ەنگىزۋ جۇمىسىن جانداندىرۋ قاجەت، - دەدى ول.
وسى ورايدا پرەمەر-مينيستر ءبىرقاتار ماسەلەگە جەكە-جەكە توقتالدى.
- ءبىرىنشى. ءوڭىر اكىمدىكتەرى مەن تۋريزم جانە سپورت مينيسترلىگىنە بيىلعى 20 جەلتوقسانعا دەيىن سپورت ينفراقۇرىلىمى مەن بۇقارالىق سپورتتى دامىتۋدىڭ 2026–2028 جىلدارعا ارنالعان جول كارتالارىن ازىرلەپ، بەكىتۋدى تاپسىرامىن. ەكىنشى. اقتوبە، قاراعاندى، تۇركىستان، جامبىل، ماڭعىستاۋ، اتىراۋ وبلىستارى مەن شىمكەنت جانە استانا قالالارىنىڭ اكىمدەرى فۋتبول كلۋبتارىن جەكەشەلەندىرۋگە ينۆەستورلار تارتۋ جۇمىسىن كۇشەيتسىن. ءۇشىنشى. ءوڭىر اكىمدىكتەرى بۇقارالىق سپورتتى دامىتۋ ماقساتىندا «قولجەتىمدى سپورت» جوباسىن ىسكە اسىرىپ، جاتتىقتىرۋشى-نۇسقاۋشىلار سانىن، اسىرەسە اۋىلدىق جەرلەردە ارتتىرۋ ماسەلەسىن قامتاماسىز ەتسىن، - دەدى ۇكىمەت باسشىسى.