15 قىركۇيەك كۇنى ەلىمىزدە ق ر مادەنيەت جانە اقپارات مينيسترلىگى مەن "ۇلتتىق كينونى قولداۋ مەملەكەتتىك ورتالىعىنىڭ" ۇيىمداستىرۋىمەن اۋقىمدى رەسپۋبليكالىق "JARQYRA" كاستينگى ءوتتى.
جوبا بۇكىل قازاقستاندى قامتىدى. كاستينگ ەلىمىزدىڭ 19 قالاسىندا ءبىر مەزەتتە ءوتىپ، وتاندىق كينەماتوگرافيا تاريحىنداعى ەڭ ءىرى شارالاردىڭ ءبىرى بولدى. ساعات 11:00-دەن 19:00-گە دەيىن مادەنيەت وشاقتارىندا وتكەن ىرىكتەۋگە 1000-نان استام ادام قاتىسىپ، ۇلتتىق كينونىڭ ءبىر بولىگى بولۋعا نيەت ءبىلدىردى، - دەپ حابارلايدى Aqshamnews.kz.
قاتىسۋشىلاردىڭ قاتارىندا وبلىس ورتالىقتارىنان بولەك، اۋدان-اۋىلدان كەلگەن تۇرعىندار دا بولدى. بۇل قازاقستاندىقتاردىڭ كينو ونەرىنە دەگەن ىقىلاسىن، جوعارى دەڭگەيدەگى قىزىعۋشىلىعىن جانە دە شىعارماشىلىق سالادا وزدەرىن سىناپ كورۋگە دەگەن ۇمتىلىسىن كورسەتتى.
قاتىسۋشىلاردىڭ انكەتالارى ساراپتاما كەڭەسى تاراپىنان مۇقيات زەردەلەندى. باعالاۋ كەزىندە اكتەرلىك قابىلەت، ساحنالىق وبرازدى بەينەلەۋ شەبەرلىگى جانە كاسىبي دامۋعا دەگەن الەۋەت ەسكەرىلدى. كاستينگ قورىتىندىسى بويىنشا 705 قاتىسۋشى كينو ورتالىقتىڭ اكتەرلىك بازاسىنا ەنگىزىلدى.
"ۇلتتىق كينونى قولداۋ مەملەكەتتىك ورتالىعىنىڭ" باسقارما ءتوراعاسى قۇرمانبەك جۇماعالي كاستينگكە قاتىسۋشىلاردىڭ جوعارى دەڭگەيىن جانە جوبانىڭ سالالىق ماڭىزىن اتاپ ءوتتى:
“JARQYRA” كاستينگى قازاقستاندا قۋاتتى شىعارماشىلىق الەۋەتتىڭ بار ەكەنىن جانە ءتۇرلى بۋىن وكىلدەرىنىڭ كينو سالاسىندا كاسىبي جۇمىس ىستەۋگە دايىن ەكەنىن كورسەتتى. ءار قاتىسۋشىنىڭ شىعارماشىلىق كوزقاراسى، ءتارتىبى مەن شىنايى ىنتاسى قۋانتادى. ىرىكتەۋ وڭاي بولعان جوق. ساراپتاما كەڭەسىنىڭ الدىندا كوپتەگەن دارىندى ۇمىتكەرلەردىڭ اراسىنان ۇزدىكتەرىن تاڭداۋ مىندەتى تۇردى. ۇلتتىق كينونى قولداۋ مەملەكەتتىك ورتالىعى وتاندىق كينويندۋستريانى دامىتۋ، جاڭا ەسىمدەردى اشۋ جانە ولاردىڭ كاسىبي وسۋىنە جاعداي جاساۋ باعىتىنداعى جۇيەلى جۇمىستارىن جالعاستىرا بەرەدى".
«JARQYRA» جوباسى - ۇلتتىق كينونى دامىتۋعا، سالانىڭ كادرلىق الەۋەتىن نىعايتۋعا جانە وتاندىق كينەماتوگرافتىڭ وركەندەۋىنە ۇلەس قوسقىسى كەلەتىن شىعارماشىل جاستاردى قولداۋعا باعىتتالعان.
كاستينگتەن وتكەن قاتىسۋشىلاردىڭ انكەتالارى كينو ورتالىعىنىڭ رەسمي سايتىنا – www.kazakhcinema.kz – ورنالاستىرىلادى. ونلاين اكتەرلىك بازا پروديۋسەرلەر مەن كينوكومپانيالارعا جاڭا ەسىمدەردى اشۋعا، دارىندى اكتەرلەردى تابۋعا جانە بولاشاق فيلمدەرگە شىعارماشىلىق توپتار قۇرۋعا مۇمكىندىك بەرەتىن زاماناۋي قۇرالعا اينالادى.
اۋقىمدى «JARQYRA» كاستينگى قازاقستاندا ۇلتتىق كينونى دامىتۋعا ىنتالى، بەلسەندى ءارى تالانتتى بۋىننىڭ ءوسىپ كەلە جاتقانىن كورسەتتى. ۇلتتىق كينونى قولداۋ مەملەكەتتىك ورتالىعى بۇل باستامانى ءارى قاراي دامىتىپ، جاس مامانداردىڭ كاسىبي جەتىلۋىنە قولداۋ كورسەتۋدى جالعاستىرادى.