قازاقستاندىقتاردىڭ تابىسىنىڭ شامامەن 1،2%-ى وزگە ادامدارعا كومەك كورسەتۋگە جۇمسالاتىنى بەلگىلى بولدى، - دەپ حابارلايدى Aqshamnews.kz.
بۇل تۋرالى Ranking.kz سايتى حابارلادى. ال ەلىمىزدەگى ەڭ داۋلەتتى ازاماتتاردىڭ قايىرىمدىلىققا قانشا قاراجات ءبولىپ وتىر؟
Forbes.kz پورتالى قازان ايىنىڭ باسىندا جاريالاعان مالىمەتكە سايكەس، قازاقستاننىڭ ەڭ باي 10 كاسىپكەرىنىڭ بارلىعى دەرلىك قايىرىمدىلىقپەن اينالىسادى. ولاردىڭ كەيبىرى ءوز قورلارى ارقىلى الەۋمەتتىك جوبالاردى جۇزەگە اسىرىپ، اشىق قارجىلىق ەسەپ جۇرگىزەدى.
بولات وتەمۇراتوۆ: 51،9 ملرد تەڭگە - يگى ىستەرگە
رەيتينگتىڭ كوش باسىندا ءداستۇرلى تۇردە بولات وتەمۇراتوۆ تۇر. ونىڭ اتىنداعى قور - ەلدەگى ەڭ اشىق ءارى بەلسەندى قورلاردىڭ ءبىرى.
2024 جىلعى ەسەپ بويىنشا، وتكەن جىلى قور قايىرىمدىلىق پەن الەۋمەتتىك جوبالارعا 51،9 ملرد تەڭگە جۇمساعان. بۇل 2023 جىلمەن سالىستىرعاندا 2،8 ەسە كوپ.
قوردىڭ تانىمال جوبالارىنىڭ ءبىرى - «اۋتيزم. الەم بارشاعا ورتاق» باعدارلاماسى. بۇگىندە ەلىمىزدىڭ ءتۇرلى وڭىرىندە ءاۋتيزمى بار بالالارعا ارنالعان 13 ورتالىق جۇمىس ىستەيدى.
سونىمەن قاتار، قور قىزىلوردا اۋەجايىنداعى جولاۋشىلار تەرمينالىنىڭ، ەسىك قالاسىنداعى مەكتەپتىڭ قۇرىلىسىنا قارجى بولگەن، سۋ تاسقىنىنان زارداپ شەككەندەرگە جانە از قامتىلعان وتباسىلارعا كومەك كورسەتكەن.
ۆياچەسلاۆ كيم جانە ANSA قورى
ەكىنشى ورىندا تۇرعان ۆياچەسلاۆ كيم بىرنەشە جىلدان بەرى ANSA قايىرىمدىلىق قورىن تۇراقتى قارجىلاندىرىپ كەلەدى.
تەك وتكەن جىلدىڭ وزىندە قور 2 مىڭ قازاقستاندىققا 20 ملرد تەڭگەدەن استام كومەك كورسەتكەن.
ANSA قورىنىڭ قاراجاتىنا سولتۇستىك قازاقستان مەن اقمولا وبلىستارىندا سۋ تاسقىنىنان زارداپ شەككەندەرگە ارنالعان ەكى كوپقاباتتى ءۇي، 300 جەكە ءۇي، بالاباقشا سالىندى.
سونداي-اق Esen Foundation قورىمەن بىرلەسىپ، اۋىل تۇرعىندارىنىڭ ءبىلىم مەن مەديسيناعا قولجەتىمدىلىگىن ارتتىرۋعا باعىتتالعان Baquatty Audan جوباسى ىسكە قوسىلدى.
ءبىلىم سالاسىندا قور اۋىلدىق پەداگوگيكالىق اكادەميانى، 5 Sandyq قوسىمشا ءبىلىم بەرۋ ورتالىعىن اشتى. سونىمەن قاتار ەرەكشە ءبىلىم بەرۋدى قاجەت ەتەتىن بالالارعا ارنالعان ينكليۋزيۆتى كابينەتتەر جابدىقتالدى.
قور سپورتتى دا قولدايدى: «بارىس» حوككەي كلۋبىنىڭ يمپاكت-سەرىكتەسى اتاندى، ال 2025 جىلدان باستاپ ANSA قورى قازاقستاننىڭ بوچچا فەدەراسياسىنىڭ رەسمي سەرىكتەسى بولادى.
بەس ءىرى مەسەنات جانە اشىق ەسەپتىلىك ءداستۇرى
قازاقستاننىڭ ەڭ باي بەس كاسىپكەرىنىڭ ءارقايسىسىنىڭ جەكە قايىرىمدىلىق قورى بار. ولاردىڭ قاتارىندا:
- نۇرلان سماعۇلوۆ (Astana Group)؛
- تيمۋر تۋرلوۆ (Freedom Holding Corp)؛
- تيمۋر قۇلىبايەۆ (Halyk قورى ارقىلى).
مىسالى، Halyk قورى مەكتەپتەر مەن بالاباقشالار سالۋعا، مۇقتاج وتباسىلارعا كومەك كورسەتۋگە جانە دارىندى جاستاردى قولداۋعا قارجى بولەدى.
ال تيمۋر تۋرلوۆ شاحمات، بالالار فۋتبولى جانە ەكولوگيالىق جوبالاردى دامىتۋعا ەرەكشە كوڭىل بولەدى.
كورىنبەيتىن قايىرىمدىلىق: اشىق دەرەكتەر از
Forbes تىزىمىندەگى ۆلاديمير كيم، ايدىن راحىمبايەۆ، شۋحرات يبراگيموۆ، اندرەي لاۆرەنتيەۆ جانە كەڭەس راقىشيەۆ تە قايىرىمدىلىقپەن اينالىسادى. الايدا ولاردىڭ بۇل باعىتتاعى ناقتى شىعىندارى اشىق جاريالانبايدى — اقپارات كوبىنە جەكە جوبالار تۋرالى جاڭالىقتاردا عانا كەزدەسەدى.
كوپتەگەن كاسىپكەرلەر تەك ءوز قورلارىمەن شەكتەلمەي، باسقا ۇيىمدارعا دا ۇلەس قوسادى. مىسالى، «انا ءۇيى» قورىنىڭ جۇمىسىنا بىرنەشە مەسەنات تۇراقتى تۇردە دەمەۋشىلىك ەتەدى. بۇل قوردىڭ باستى ماقساتى — الەۋمەتتىك جەتىمدىكتى ازايتۋ، ياعني انالاردىڭ بالالارىنان باس تارتپاۋىنا جاعداي جاساۋ.
قايىرىمدىلىق مادەنيەتى قالىپتاسىپ كەلەدى
كەيىنگى جىلدارى مەملەكەت قايىرىمدىلىق باستامالارىن بەلسەندى قولداپ كەلەدى.
2023 جىلدان بەرى ەلىمىزدە «قۇرمەتتى قايىرىمدى جان» اتاعى بەرىلىپ كەلەدى. بيىل بۇل ماراپاتتى 33 قازاقستاندىق يەلەنىپ، جالپى سانى 164 ادامعا جەتتى.
ق ر مادەنيەت جانە اقپارات مينيسترلىگىنىڭ دەرەگىنشە، ءقازىر ەلدە 1،3 مىڭ قايىرىمدىلىق ۇيىمى جۇمىس ىستەيدى.
2025 جىلى «يگى ىستەر مارافونى» جوباسى اياسىندا 2،5 مىڭنان استام قايىرىمدىلىق باستاماسى جۇزەگە استى، ال ەرىكتىلەردىڭ جالپى سانى 275 مىڭنان اسىپ، ونىڭ ىشىندە 3،5 مىڭى – 55 جاستان اسقان ازاماتتار.