قالا اكىمى نىسانداعى جۇمىستىڭ سوڭعى كەزەڭىمەن تانىستى
الماتى اكىمى دارحان ساتىبالدى جۇمىس ساپارى بارىسىندا «تۇزدىباستاۋ» قوسالقى ستانسياسىنىڭ قۇرىلىس نىسانىنا باردى. جۇمىس بارىسى تەكسەرىلىپ، نىساندى ىسكە قوسۋ جانە دامىپ كەلە جاتقان اۋماقتاردىڭ ەنەرگەتيكالىق تۇراقتىلىعىن قامتاماسىز ەتۋ جايى تالقىلاندى.
قۋاتى 110/10-10 كۆ «تۇزدىباستاۋ» قوسالقى ستانسياسى تۇركسىب جانە مەدەۋ اۋداندارىن، سونداي-اق الماتى وبلىسىنا قاراستى جاقىن ورنالاسقان ەلدى مەكەندەردى سەنىمدى ەنەرگيامەن قامتۋ ءۇشىن سالىنىپ جاتىر. جوبانى ىسكە اسىرۋ جاڭا تۇرعىن الاپتارىن، الەۋمەتتىك نىساندار مەن وندىرىستىك ايماقتاردى قوسۋعا مۇمكىندىك بەرەدى، قولدانىستاعى جەلىلەرگە تۇسەتىن جۇكتەمەنى ازايتىپ، قۋات رەزەرۆىن ارتتىرادى.
«ينجەنەرلىك ينفراقۇرىلىمدى دامىتۋ – قالانىڭ تۇراقتى ءوسىمىنىڭ نەگىزى. «تۇزدىباستاۋ» قوسالقى ستانسياسى جاڭا شاعىناۋدانداردى ۇزدىكسىز ەلەكترمەن قامتۋعا جانە جەلىلەردىڭ تۇراقتىلىعىن ارتتىرۋعا مۇمكىندىك بەرەدى. ەڭ باستىسى، جۇمىستى مەجەلەنگەن مەرزىمدە ءارى ساپالى اياقتاۋ»، – دەدى الماتى اكىمى دارحان ساتىبالدى.
جوبا اياسىندا: 110/10-10 كۆ جابىق قوسالقى ستانسيا سالىندى؛ ۇزىندىعى 7،8 كم بولاتىن 110 كۆ كابەل جەلىسى تارتىلدى؛ جالپى ۇزىندىعى 14 كم-دەن اساتىن 10 كۆ تاراتۋ كابەل جەلىلەرى جۇرگىزىلدى.
نىسانداعى قۇرىلىس جۇمىستارى اياقتالدى. قازىرگى ۋاقىتتا جابدىقتاردى سىناقتان وتكىزۋ جانە ىسكە قوسۋ-رەتتەۋ جۇمىستارى جۇرگىزىلۋدە. «تۇزدىباستاۋ» قوسالقى ستانسياسىنىڭ پايدالانۋعا بەرىلۋى الماتى ەنەرگوجۇيەسىنىڭ تۇراقتىلىعىن كۇشەيتىپ، جاڭا اۋماقتاردىڭ بولاشاق دامۋىنا قاجەتتى قۋات قورىن قامتاماسىز ەتەدى.
