الماتىدا قازاندا قارتتار ايلىعى مەن رەسپۋبليكا كۇنىنە وراي مەرەكەلىك ءىس-شارالار ءوتتى.
ايتۋلى وقيعالارعا قاتىستى قالادا بارلىعى 25 ءىس-شارا وتكىزىلىپ، وعان 2500 ادام قاتىستى. بار عۇمىرىن ەلدى دامىتۋعا، جاستاردى تاربيەلەۋگە جانە وتباسى قۇندىلىقتارىن نىعايتۋعا جۇمساعان جاندار ءۇشىن ارنايى 10 اۋقىمدى ءىس-شارا ۇيىمداستىرىلدى، - دەپ حابارلايدى Aqshamnews.kz.
2025 جىلى 30 قىركۇيەك پەن 1 قازان ارالىعىندا الماتىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنىڭ «بەلسەندى ۇزاق ءومىر ءسۇرۋ ورتالىعى» مەكەمەسى «بەلسەندى ۇزاق ءومىر: تاجىريبە جانە مۇمكىندىك» اتتى حالىقارالىق فورۋم وتكىزدى.
فورۋمنىڭ ماقساتى - بەلسەندى ۇزاق ءومىر ءسۇرۋدى قامتاماسىز ەتۋ جولىندا تاجىريبە الماسۋ، قارتتاردى قولداۋدىڭ يننوۆاسيالىق ادىستەرى مەن الەۋمەتتىك باعدارلامالاردى كەڭىنەن تالقىلاۋ.
اتالعان ءىس-شارا اعا بۋىندى الەۋمەتتىك قولداۋ، وزىق تاجىريبەلەردى ەنگىزۋ مەن ءوڭىرارالىق جانە حالىقارالىق ىنتىماقتاستىقتى نىعايتۋ ماسەلەلەرىن تالقىلاۋعا ارنالعان حالىقارالىق الاڭعا اينالدى.
فورۋمعا ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ، الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ، «بەلسەندى ۇزاق ءومىر ءسۇرۋ ورتالىقتارىنىڭ» باسقا وڭىرلەردەن كەلگەن وكىلدەرى، شەتەلدىك قوناقتار مەن قوعامدىق بىرلەستىكتەر قاتىستى. فورۋم باعدارلاماسى اياسىندا ءال-فارابي اتىنداعى قازۇۋ-دە پانەلدىك تالقىلاۋ، بۇدان وزگە، ساندىك-قولدانبالى ونەر جانە كەسكىندەمە كورمەسى، شەبەردىڭ دارىستەرى، شىعارماشىلىق قويىلىمدار، الماتى مەن ەسىك قالاسىنداعى مۋزەيلەر مەن كورىكتى جەرلەرگە ەكسكۋرسيا ۇيىمداستىرىلدى.
10 قازاندا الماتىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنىڭ ۇيىمداستىرعان سالتاناتتى ءىس-شارا ءوتتى. وعان 150-گە جۋىق اعا بۋىن وكىلدەرى، ەڭبەك ارداگەرلەرى، بەلسەندىلەر قاتىستى. باعدارلاما اياسىندا العىس حات، ەستەلىك سىيلىقتار تابىستالىپ، ونەر جۇلدىزدارىنىڭ قاتىسقان كونسەرت قويىلدى.
ءدال وسى كۇنى «بەلسەندى ۇزاق ءومىر ءسۇرۋ ورتالىعىنىڭ» مەدەۋ اۋداندىق بولىمشەسى «قارتتارىم – اسىل قازىنام» اتتى پوەزيالىق كەزدەسۋ ۇيىمداستىردى. كەش بارىسىندا اۋا بۋىن وكىلدەرى مەن شىعارماشىلىق ۇجىمدار اۆتورلىق ولەڭ وقىپ، مۋزىكالىق كومپوزيسيا ۇسىندى.
15 قازاندا حالىقارالىق سەمينار ۇيىمداستىرىلدى، ونىڭ بارىسىندا بۇۇ جانە ورتالىق ازيا ءوڭىرى ەلدەرىنىڭ وكىلدەرى ماۋلەنوۆ كوشەسى، 46ا مەكەنجايدا ورنالاسقان «بەلسەندى ۇزاق ءومىر ءسۇرۋ ورتالىعىنا» باردى. قوناقتار ورتالىق جۇمىسىمەن تانىسىپ، شىعارماشىلىق كورمەنى، كونسەرتتىك باعدارلامانى تاماشالادى جانە قارتتارمەن جۇمىس ۇيىمداستىرۋ بويىنشا تاجىريبە الماستى. بۇعان قوسا، مەدەۋ اۋدانى ارداگەرلەر كەڭەسىنىڭ قولداۋىمەن ۇيىمداستىرىلعان حالىقارالىق قاتتار كۇنىنە ارنالعان وقۋشىلار سارايىندا وتكەن كونسەرتتى دە كوردى.
17 قازاندا Art Galaxy Alma Ata گالەرەياسىندا «ءبىزدىڭ قازاقستان» كەسكىندەمە جانە بەينەلەۋ ونەرى كورمەسى سالتاناتتى تۇردە اشىلدى، مۇندا قارتتاردىڭ 100-گە جۋىق جۇمىسى قويىلدى. كورمە 17 قاراشاعا دەيىن جالعاسادى (نازاربايەۆ كوشەسى، 223، «الما-اتا» سوو).
22 قازاندا «بەلسەندى ۇزاق ءومىر ءسۇرۋ ورتالىعىنىڭ» ورتالىق بولىمشەسىندە «وركەندە، قازاق حالقى!» مەرەكەلىك ءىس-شارا ءوتتى. وعان زەينەتكەرلەر، قالانىڭ بەلسەندى تۇرعىندارى قاتىستى. ءىس-شاراعا قاتىسقاندار ەستەلىك ايتىپ، كوتەرىڭكى كوڭىل كۇيدە تارقاستى.
ءدال وسى كۇنى بالۋان شولاق اتىنداعى سپورت سارايىندا رەسپۋبليكا كۇنىنە ارنالعان شاحمات فەستيۆالى ءوتتى. تۋرنيرگە الماتىنىڭ قارت تۇرعىندارى قاتىستى. شاحمات ءتۋرنيرى ەگدە جاندارعا ۇمىتىلماس كوڭىل-كۇي سىيلادى.
24 قازاندا «بەلسەندى ۇزاق ءومىر ءسۇرۋ ورتالىعىنىڭ» مەدەۋ بولىمشەسىندە وتكەن «جاسا، قازاقستان!» كونسەرتى مەرەكەلىك ءىس-شارالاردى ودان ءارى جالعاستىرا ءتۇستى. قارت كىسىلەر ءان ايتىپ، ونەرىن ورتاعا سالدى.
2025 جىلى 31 قازاندا «كونكورديا» ستۋدەنتتىك تەاترىنىڭ عيماراتىندا الماتىنىڭ «بەلسەندى ۇزاق ءومىر ءسۇرۋ ورتالىعى» مەكەمەسى ۇيىمداستىرعان جىل سايىنعى ءداستۇرلى «ۇزاق ءومىر ءسۇرۋ فەستيۆالى» ءوتتى.
فەستيۆال قارتتار ايلىعىنىڭ شاھاردا جوعارى دەڭگەيدە وتكەنىن ايشىقتاي ءتۇستى. وعان قالانىڭ بارلىق اۋدانىنىڭ قارتتارى قاتىسىپ، ونەر كورسەتتى. دومبىرادان كۇي توگىلىپ، ءتۇرلى شىعارماشىلىق قويىلىمدار ۇسىنىلدى.
ۇيىمداستىرلعان ءىس-شارالار مەملەكەت پەن قوعامنىڭ اعا بۋىن وكىلدەرىنە ەرەكشە نازار اۋداراتىنىن، ۇرپاقتار ساباقتاستىعى مەن بىرلىك رۋحىن نىعايتا بەرەتىنىن كورسەتتى.