ەلوردادا پوليسەيلەر الاياقتار ۇرلاعان 39 ميلليون تەڭگەنى زەينەتكەرگە قايتاردى، - دەپ حابارلايدى Aqshamnews.kz.
وقيعا بيىل تامىز ايىندا بولعان. بەلگىسىز ادامدار مەسسەندجەر ارقىلى زەينەتكەرمەن بايلانىسىپ، وزدەرىن پوليسيا مەن ۇلتتىق بانكتىڭ قىزمەتكەرلەرى رەتىندە تانىستىرعان.
ولار 87 جاستاعى قارت ادامدى "پاتەرىڭىزدى بوتەن ادامدار ءوز اتىنا راسىمدەپ، ساتۋعا شىعاردى" دەپ سەندىرىپ، مۇلكىن ساقتاۋ ءۇشىن پاتەرىن ءوزى ساتىپ، قاراجاتتى "ءقاۋىپسىز ەسەپشوتقا" اۋدارۋعا شاقىرعان. الاياقتار زەينەتكەردى ىشكى ىستەر مينيسترلىگى مەن ۇلتتىق بانك "قىلمىسكەرلەردى ۇستاۋعا باعىتتالعان قۇپيا وپەراسيا جۇرگىزىپ جاتىر" دەپ يلاندىرىپ، بۇل تۋرالى ەشكىمگە ايتپاۋىن قاتاڭ ەسكەرتكەن. ولاردىڭ ايتقانىن ورىنداعان ەر ادام ريەلتورلىق كومپانيا ارقىلى پاتەرىن ساتىپ، 39 ميلليون تەڭگەنى كۋرەرگە تاپسىرعان.
اتالعان دەرەك بويىنشا قىلمىستىق كودەكستىڭ 190-بابى (الاياقتىق) بويىنشا سوتقا دەيىنگى تەرگەۋ باستالدى. جەدەل ىزدەستىرۋ ءىس-شارالارى بارىسىندا پوليسەيلەر قىلمىسقا قاتىسى بار 23 جاستاعى ەر ادامنىڭ جەكە باسىن انىقتاپ، ونى ۇستادى. تەكسەرۋ كەزىندە كۇدىكتىدەن 39 ميلليون تەڭگە تابىلىپ، تاركىلەندى. قازىرگى ۋاقىتتا ۇستالعان ازامات استانا قالاسى پوليسيا دەپارتامەنتىنىڭ ۋاقىتشا ۇستاۋ يزولياتورىنا قامالدى. تاركىلەنگەن قاراجات يەسىنە قايتارىلدى. بيىلعى جىلدىڭ باسىنان بەرى ەلوردا اۋماعىندا ءۇش مىڭنان استام ينتەرنەت-الاياقتىق دەرەگى تىركەلگەن. پوليسەيلەردىڭ ايتۋىنشا، مۇنداي قىلمىستاردىڭ باستى نىساناسى — 50 جاستان اسقان ازاماتتار. سەبەبى ولار كوبىنە قارجىلىق ساۋاتتىلىقتىڭ تومەندىگىنەن الاياقتاردىڭ قۇربانىنا اينالادى. قۇقىق قورعاۋ ورگاندارى ازاماتتاردى ساق بولۋعا جانە بەيتانىس ادامداردىڭ قوڭىراۋلارىنا سەنبەۋگە شاقىرادى. پوليسيا قىزمەتكەرلەرى ەشقاشان مۇلىكتى ساتۋدى، نەسيە راسىمدەۋدى نەمەسە اقشانى "ءقاۋىپسىز ەسەپشوتقا" اۋدارۋدى سۇرامايدى. وسىنداي مازمۇنداعى قوڭىراۋ تۇسكەن جاعدايدا اڭگىمەنى دەرەۋ توقتاتىپ، جاقىن ماڭداعى پوليسيا بولىمشەسىنە حابارلاسۋ قاجەت.