اباي ۋنيۆەرسيتەتىنىڭ سوربوننا–قازاقستان ينستيتۋتىندا فرانسيانىڭ ورتالىق ازيانى زەرتتەۋ ينستيتۋتى (IFEAC) مەن فرانسيانىڭ قازاقستانداعى ەلشىلىگىنىڭ قولداۋىمەن ۇيىمداستىرىلعان «ورتالىق ازيانىڭ فرانسۋز زەرتتەۋلەرى: قاتىسۋشىلار جانە وزەكتى احۋالى» تاقىرىبىندا عىلىمي سەمينار ءوتتى.
اباي ۋنيۆەرسيتەتى ءوز الاڭىندا فرانسۋز زەرتتەۋشىلەرى اراسىنداعى عىلىمي ديالوگتى بايىتۋ، ءبىلىم كوكجيەگىن كەڭەيتۋ، بەلسەندى ءبىلىم مەن تاجىريبە الماسۋ ماقساتىندا جەتەكشى وتاندىق جانە فرانسۋز زەرتتەۋشىلەرىنىڭ باسىن قوستى. ءىس-شاراعا اباي اتىنداعى قازۇپۋ-دىڭ باسقارما ءتوراعاسى- رەكتورى بولات تىلەپ، فرانسيانىڭ قازاقستانداعى ەلشىلىگىنىڭ ءبىلىم سالاسىنداعى ىنتىماقتاستىق جونىندەگى ايماقتىق اتتاشەسى كساۆە لە تورريۆەللەك، سوربوننا–قازاقستان ينستيتۋتىنىڭ ديرەكتورى، ق ر پرەزيدەنتىنىڭ جانىنداعى ۇلتتىق قۇرىلتايدىڭ مۇشەسى، ادام قۇقىقتارى جونىندەگى كوميسسيانىڭ مۇشەسى اينۇر ءسابيتوۆا، فرانسۋز عالىم- دارى – سوربوننا–قازاقستان ينستيتۋتىنىڭ نەگىزىن قالاۋشىلاردىڭ ءبىرى كاترين پۋجول، IFEAC ديرەكتورى ادريەن فوۆ، ينستيتۋتتىڭ ارىپتەس-پروفەسسورى وليۆە فەرراندو، ورتالىق ازيا تاريحى بويىنشا كوپتەگەن ەڭبەكتەردىڭ اۆتورى كساۆە اللەز، جاس زەرتتەۋشىلەر مەن دوكتورانتتار قاتىستى.
بولات تىلەپ سەميناردىڭ ماڭىزدىلىعىنا توقتالىپ، سوربوننا–قازاقستان ينستيتۋتىن بۇكىل ورتالىق ازيادا تەڭدەسى جوق بىرەگەي بىرلەسكەن جوبا ەكەنىن اتاپ ايتتى. «وسى ۋاقىت ىشىندە ينستيتۋت سۇبەلى جەتىستىككە جەتتى. اتاپ ايتقاندا، قوس ديپلومدىق باعدارلاما مەن ستۋدەنتتەردىڭ ءوزارا الماسۋ تاجىريبەسى جاڭا دەڭگەيگە كوتەرىلدى. ينستيتۋت جوعارى دەڭگەيدەگى حالىقارالىق ءىس-شارالار الاڭى مەن تۇلەكتەرىمىز ءۇشىن جاڭا كاسىبي باسپالداق بولدى. دەسەك تە، بۇگىندە ۋنيۆەرسيتەت پەن ەلدىڭ ءوز تالابى، ناقتى مۇددەسى بار. بۇل – سوربوننا–قازاقستان ينستيتۋتىنا ەرەكشە جاۋاپكەرشىلىك جۇكتەيتىن جاڭا فورماسياداعى پەداگوگتاردى دايارلاۋ. فرانسۋزدىق ارىپتەس تەرىمىزبەن بىرگە عىلىمي-زەرتتەۋ مەن ءبىلىم بەرۋ باعدارلاماسى، سونىڭ ىشىندە ءتىل ءبىلىمى سالاسىندا ۇلكەن باستامالاردى كوتەرەتىن ۋاقىت كەلدى دەپ ويلايمىن»، – دەدى رەكتور.
سەميناردا وسى سالاداعى زەرتتەۋدىڭ وزەكتى تاقىرىبى تالقىلانىپ، زامانعا ساي زەرتتەۋ باعىتتارىنا شولۋ جاسالدى، ورتالىق ازيامەن بايلانىستى عىلىمي جۇمىس پەن جوبالار ۇسىنىلدى. قاتىسۋشىلار اراسىنداعى پىكىرتالاس پەن ديالوگتار تاجىريبە مەن يدەيا الماسۋعا قىزمەت ەتتى. سەميناردىڭ قوس تاراپقا دا وتە جەمىستى ءارى پايدالى بولعانى ايتىلدى.
تاقىرىپقا وراي
ىنتىماقتاستىق داميدى
«سوربوننا–قازاقستان ينستيتۋتىنىڭ نەگىزىن قالاۋشىلاردان قازاقستان مەن فرانسۋز عالىمدارىنىڭ ىنتىماقتاستىعى جايىندا سۇرادىق: «بۇگىن – ەرەكشە كۇن، ويتكەنى بۇگىنگى سەميناردا فرانسۋز زەرتتەۋشىلەرىن كەزدەستىرۋگە بولادى. بۇل – بىرنەشە كۇننەن بەرى الماتىدا ءوتىپ جاتقان عالىمداردىڭ ۇلكەن سەزى. اباي اتىنداعى قازۇپۋ-دىڭ جاڭا رەكتورىن قارسى الامىز. بۇل – ءبىزدىڭ ىنتىماقتاستىعىمىزدىڭ جاڭا كەزەڭى، ISK-نىڭ دا، اباي اتىنداعى قازۇپۋ-دىڭ دا ودان ءارى دامۋىنا جاڭا سەرپىن بەرگەنىن قالايمىز. ISK ستۋدەنتتەرىمەن بىرگە جۇمىس ىستەيتىن زەرتتەۋشىلەردى فرانسيادا جۇمىسقا ورنالاسۋى مەن وقۋىنا جول اشاتىن جاڭا پەرسپەكتيۆا كۇتۋدە. فرانسۋز ۋنيۆەرسيتەتتەرىنىڭ كەيبىر وقىتۋشىلارى ISK مەن اباي اتىنداعى قازۇپۋ-مەن بىرلەسىپ جۇمىس ىستەۋدە. ءبىز ISK ستۋدەنتتەرىنىڭ وسى الماسۋعا قاتىسۋ مەن وسى ىنتىماقتاستىقتى ودان ءارى دامىتۋ مۇمكىندىگىنە يە بولعانىن قالايمىز»، – دەدى كاترين پۋجول مىرزا.
ا.قىدىرباي ۇلى