حالقىمىز «جاقسىنىڭ جاقسىلىعىن ايت نۇرى تاسىسىن»، - دەپ بەكەردەن-بەكەر ايتپاعان. ورىندى ايتىلعان جىلى ءسوز ادامدى جىگەرلەندىرەدى، ومىرگە قۇشتارلىعىن ارتتىرادى، جان سارايىن جاڭعىرتادى. جانىڭدا ءجۇر جاقسى ادام دەمەكشى، كەيدە ءبىز جانىمىزدا جۇرگەن جاقسى ادامداردىڭ ىسكەرلىك قاسيەتىن باعالاي الماي جاتامىز. ءبىرىمىز ونىڭ جاساپ جاتقان جۇمىسىنا ىشتەي سۇيسىنسەك، ەندى ءبىرىمىز وزىمىزشە مويىندامايمىز. ايتسە دە، باردى بار، جوقتى جوق دەپ ايتقانعا نە جەتسىن ...
ءيا، كوپتەن بەرى جانىما جالاۋ بولعان وسى ءبىر ۇزىن بويلى، اققۇبا كەلگەن ناعىز وفيسەر جايلى جازۋدى ويلاپ ءجۇر ەدىم. بۇگىن سونىڭ ءساتى ءتۇسىپ، وزگەشە قۇرمەتپەن قارايتىن ارىپتەسىم تۋرالى قالام تەربەپ وتىرمىن.
پولكوۆنيك داۋرەن قۋانىش ۇلىنىڭ ەسىمى شەكارا اكادەمياسى، ۇقو جانە شەكارا قىزمەتىندەگى اسكەري قىزمەتشىلەرگە جاقسى تانىس، تۇلعالىق قاسيەت قالىپتاستىرعان ءبىرتۋار ازامات. شەكاراشى كۋرسانتتارعا سانالى تاربيە بەرۋدە ونەگەلى ۇلگىسىمەن، جاڭاشىلدىق جولىمەن، باستاماشىل ىس-ارەكەتىمەن ابىرويلى قىزمەت اتقارىپ جۇرگەن تاجىريبەلى شەكاراشىنىڭ تىنىمسىز ەڭبەگى قانداي قۇرمەتكە دە لايىقتى. ول ۇجىمدا جانىنىڭ تازالىعىمەن، كوڭىلىنىڭ ادالدىعىمەن، قاراپايىم مىنەزىمەن جانە قىزمەتتەگى بىلگىرلىگى ءۇشىن ۇلگى تۇتىپ سىيلايتىن، ءاردايىم بىلىكتى مامان رەتىندە ەرەكشەلەنەدى.
ءبىز اڭگىمەلەپ وتىرعان داۋرەن قۋانىش ۇلى قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ شەكارا اكادەمياسىندا قىزمەت ەتەدى. تاربيەلىك، الەۋمەتتىك-قۇقىقتىق جانە يدەولوگيالىق جۇمىستار باسقارماسى باستىعىنىڭ ورىنباسارى لاۋازىمىندا. ءتارتىپ پەن تاربيە تىزگىنىن تەڭ ۇستاعان تاربيەشى وفيسەر. اتالمىش وقۋ ورنىنىڭ 1998 جىلعى تۇلەگى. ءوزىنىڭ ايتۋىنا قاراعاندا، كۋرسانت كەزىندە وقىعان 4-وقۋ ديۆيزيونىندا كۋرسانتتار كوپ بولعان سوڭ بۇلاردى باسقا ارىپتەستەرى «مونگولى» دەپ اتاعان ەكەن.
ول ءوز كەزەگىندە تالاي رەت وقۋ ديۆيزيوندارى اراسىندا جانە قالاارالىق ۇيىمداستىرىلعان كۆن ويىندارىنا قاتىسىپ، كوپشىلىكتىڭ كوڭىلىنەن شىعىپ ونەرپاز اتانعان. كەيىننەن قىزمەت اتقارا ءجۇرىپ، كۋرسانتتاردى وسى ونەرگە باۋلىپ، بىرنەشە رەت جۇلدەلى ورىندارعا قول جەتكىزىپ، سوناۋ رەسەي فەدەراسياسىنىڭ سوچي قالاسىنا دەيىن بارىپ، كۋرسانتتاردىڭ ونەرىن پاش ەتىپ كەلگەن.
العاشقى «لەيتەنانت» اسكەري شەنىنەن «پولكوۆنيك» شەنىنە دەيىن جەتكەن شەكاراشى كەز كەلگەن ىستە الدىنا قويعان ماقساتىنا جەتپەي قويعان ەمەس. ءبىر نارسەنى ويىنا الدى ما، سونى اياعىنا دەيىن جەتكىزبەي تىنبايتىن تىنىمسىز جان. بۇگىندە ونىڭ باستاماشىلدىعىمەن شەكارا اكادەمياسىندا كوپتەگەن يگىلىكتى ىستەر جۇزەگە اسىرىلىپ كەلەدى.
اتاپ ايتقاندا: شەكارا اكادەمياسى ەمبلەماسىنىڭ ەسكيزىن جانە كادەسىي بۇيىمدارىنىڭ ديزاينىن جاساۋدى جانە ءبىتىرۋشى تۇلەكتەرگە ارنايى داڭقتى قولباسشى باۋىرجان مومىش ۇلى تۋرالى جازىلعان الەكساندر بەكتىڭ «ۆولوكولامسكوە شوسسە» كىتابىن سالتاناتتى تۇردە تابىس ەتۋ ءراسىمىن داستۇرگە اينالدىردى.
سونىمەن قاتار، شەكاراشى وفيسەردىڭ كەلىسسوزدەر جۇرگىزۋدەگى شەبەرلىگىنىڭ ناتيجەسىندە ارۋ قالامىز الماتىداعى حالىق بانكتىڭ «FREEDOM LIFE» قىزمەتكەرلەرىمەن ورتاق مامىلەگە كەلىپ، قارجىلاي قولداۋ كورسەتۋدى ۇيىمداستىرىپ، ەكى بىردەي پسيحولوگيالىق تۇزەتۋ جانە وڭالتۋ زەرتحاناسىنىڭ پايدالانۋعا بەرىلگەنىن ايتا كەتكەنىمىز ءجون.
«جاس شەكاراشى» بالالار اسكەري-پاتريوتتىق كلۋبى مەن شەكارا اكادەمياسىنىڭ ايەلدەر قاۋىمداستىعى ۇيىمىنىڭ جۇزەگە اسۋىنا دا داۋرەن قۋانىش ۇلى تىكەلەي سەبەپشى بولدى.
شەكارا اكادەمياسىنىڭ وڭ ءيميدجىن قالىپتاستىرۋ ماقساتىندا ابىرويىن اسقاقتاتىپ، بەدەلىن بيىكتەتەتىن ۆيدەو روليكتەردى مونتاجداپ، الەۋمەتتىك جەلىلەرگە تۇراقتى تۇردە جاريالاپ تۇرۋدى ادەتكە اينالدىرعان كرەاتيۆتى وفيسەر كەيىنگى جاستارعا جيعان تاجىريبەسىن ۇيرەتۋدەن جالىققان ەمەس. ۇجىمدا «باسقارما ەنسيكلوپەدياسى» دەپ جاس وفيسەرلەر كەيىپكەرىمىزدىڭ اقىل-كەڭەسىنە جۇگىنۋدى ۇردىسكە اينالدىرعان. ءوز كەزەگىندە ولار دا كەز كەلگەن ۋاقىتتا جولىعىپ، ءوز ويلارىن ورتاعا سالىپ، ءاردايىم كوڭىلگە قونىمدى، تولىققاندى كەڭەس الىپ تۇرادى.
داۋرەن بەلگوجايەۆتىڭ بويىنداعى ايتا كەتەتىن تاعى ءبىر ەرەكشەلىگى - ونىڭ تۇلا بويى تولعان يدەيا. ول ءوز ماماندىعىن جەتە مەڭگەرگەن، جيناعان تاجىريبەسى مول تالىمگەر. اسىرەسە، ونىڭ ۇيىمداستىرۋشىلىق قابىلەتى ەرەكشە دامىعان. مىسالى، ناۋرىز ايىندا شەكارا اكادەمياسىنىڭ قابىرعاسىندا وتكەن حالىقارالىق تمد شەكارا اسكەرلەرى قولباسشىلىعى كەڭەسىنىڭ وكىلدەرىنە ۇيىمداستىرىلعان كونسەرتتىك باعدارلامانى تمد شەكارا اسكەرلەرى كەڭەسىنىڭ ءتوراعاسى ارميا-گەنەرالى ۆ.كۋليشوۆتىڭ ءوزى جوعارى باعالاپ، ماراپاتتاعان.
عاسىرعا جۋىق تاريحى بار شەكارا اكادەمياسىنىڭ توقسان جىلدىعىنا وراي اكادەميانىڭ تىنىس-تىرشىلىگىنەن سىر شەرتەتىن قۇندى كىتاپتىڭ جارىق كورۋىنە تىكەلەي ات سالىسقان داۋرەن قۋانىش ۇلى، مۇنداعى ورىس تىلىندە جازىلعان ءار ماتەريالدى وقىپ، ونداعى كەمشىلىكتەردى، جەتىسپەي تۇرعان جەرلەردى كورسەتىپ، مەرەيتويلىق كىتاپتىڭ ساپالى بولىپ شىعۋىن مىقتاپ قولعا الدى. ول مۇنىمەن دە توقتاپ قالمادى، ءارقاشاندا ىزدەنىستە جۇرەتىن بىلىكتى وفيسەر ۇجىمداعى ارىپتەستەرى مەن بىرىگىپ، اكادەميا اۋماعىنداعى ستەندتەر مەن باننەرلەردىڭ، وقۋ ديۆيزيوندارىنىڭ مادەني-اعارتۋ مۇلىكتەرىن جانە «ەرلىكپەن قازا تاپقان شەكارا اكادەمياسىنىڭ تۇلەكتەرى» تۋرالى مەموريالدىق ەسكەرتكىش تاقتانىڭ بوي كوتەرۋىن تولىقتاي قامتاماسىز ەتىلۋىنە ات سالىستى.
«گازەت - حالىقتىڭ كوزى، قۇلاعى ءھام ءتىلى»، - دەپ احمەت بايتۇرسىنوۆ ايتپاقشى شەكارا اكادەمياسىنىڭ وزىندىك باسىلىمى بولىپ تابىلاتىن «اكادەميا: بۇگىن. ەرتەڭ. كەشە.» اتتى ايلىق گازەتىنىڭ بۇگىندە ءوز جالعاسىن تاۋىپ جارىق كورۋىنە قولداۋ بىلدىرگەن تاربيەشى وفيسەر، جاقىندا عانا ۇقك باسپا ءسوز قىزمەتىمەن كەلىسىپ، ىسكە قوسىلعان تەلەگرام-كانالىنىڭ قۇرۋشىسىنا اينالىپ ۇلگەردى. سونداي-اق اكادەميا تاريحىنان حاباردار ەتەتىن سۋرەتتەر مەن كومكەرىلىپ، ساپالى بەزەندىرىلگەن توقسان سايىن جارىق كورەتىن البومنىڭ شىعۋىنا باستاماشى بولعان د.بەلگوجايەۆ، كۋرسانتتىق ءانۇراننىڭ شىعۋىنا سەبەپكەر.
ارىپتەسىمىزدىڭ ءوز ءىسىنىڭ مايتالمانى ەكەنىنە ەشكىمنىڭ تالاسى جوق. ونىڭ ۇجىم الدىنداعى اتقارىپ جاتقان جۇمىستارىن ايتا بەرسەك ءبىر ماقالانىڭ كولەمىنە سىيعىزۋ مۇمكىن ەمەس. ءبىز ەڭ ماڭىزدى دەگەندەرىنە عانا توقتالىپ وتتىك. بۇدان باسقا دا بەلسەندىلىك تانىتىپ، اتقارىپ جاتقان ىستەرى جەتىپ ارتىلادى.
ال ادامگەرشىلىگى تۇرعىسىنان سىر شەرتە كەتسەك، بۇگىن تاۋسىلماسى بەلگىلى. قولىنان كەلسە جاقسىلىق جاساپ، كىشىگە اعا، ۇلكەنگە ءىنى بولىپ جۇرەتىن جاقسى قاسيەتتەرىن ۇنەمى كورىپ ءجۇرمىز. بىرەۋلەرگە ىستەگەن جاقسىلىعىن بۇلدامايتىن اسىل قاسيەتى تاعى بار.
ولاي بولسا، سوزىنەن دە، قولىنان دا ءىس كەلەتىن جۇيرىكتىڭ الداعى قىزمەتىنە ساتتىلىك تىلەپ، وسى قارقىنىڭنان تايما دەگىمىز كەلەدى.
ءبىر سوزبەن ايتقاندا داۋرەن قۋانىش ۇلى – نار تۇلعا، مىقتى ازامات، «ناعىز پولكوۆنيك»!