پرەزيدەنت قاسىم-جومارت توقايەۆ قحر مەملەكەتتىك كەڭەسىنىڭ پرەمەرى لي سيانمەن كەزدەستى
كەزدەسۋ بارىسىندا قازاقستان مەن جۇڭگو اراسىنداعى جان-جاقتى ستراتەگيالىق سەرىكتەستىكتىڭ جاي-كۇيى جانە ونى دامىتۋ پەرسپەكتيۆاسى تالقىلاندى. سونداي-اق قاسىم-جومارت توقايەۆ پەن قحر ءتوراعاسى سي ءسزينپيننىڭ بۇعان دەيىنگى كەزدەسۋلەرىندە قول جەتكىزىلگەن ۋاعدالاستىقتاردى جۇزەگە اسىرۋعا باسا نازار اۋدارىلدى، دەپ حابارلايدى اlmaty-akshamy.kz.
قازاقستان پرەزيدەنتى قىتايدىڭ قارقىندى الەۋمەتتىك-ەكونوميكالىق دامۋىن ەرەكشە ىقىلاسپەن باقىلاپ وتىرعانىن اتاپ ءوتتى.
– قحر ۇكىمەتى الەمدى تۇراقسىزدىق جايلاپ تۇرعان قازىرگى كەزەڭدە ەكونوميكانىڭ ورنىقتىلىعىن قامتاماسىز ەتۋگە قاتىستى ماڭىزدى ماسەلەنى ءتيىمدى شەشىپ وتىر. قىتايدىڭ جاھاندىق ەكونوميكانىڭ ورنىقتى دامۋىنا قوسقان ەلەۋلى ۇلەسىن جوعارى باعالايمىز. قازاقستان قىتايمەن دوستىق، تاتۋ كورشىلىك قارىم-قاتىناستى جانە جان-جاقتى ستراتەگيالىق ىنتىماقتاستىقتى نىعايتۋعا قاشاندا ەرەكشە ءمان بەرەدى. قازاقستان قحر-دىڭ سەنىمدى ستراتەگيالىق سەرىكتەسى ءارى تاتۋ كورشىسى بولدى كەلدى جانە كەلەشەكتە دە سولاي بولىپ قالا بەرەدى. بۇگىندە قازاق-قىتاي قاتىناسى قارقىندى دامىپ جاتىر. بۇعان جوعارى دەڭگەيدەگى بەلسەندى ساياسي ديالوگ، سونداي-اق ەكى ەل ۇكىمەتتەرىنىڭ ۇيلەسىمدى جۇمىسى ىقپال ەتۋدە، – دەدى قاسىم-جومارت توقايەۆ. مەملەكەت باسشىسى بۇگىن قحر ءتوراعاسى سي سزينپينمەن وتە تابىستى كەلىسسوز جۇرگىزگەنىن اتاپ ءوتتى. كوپجاقتى قازاق-قىتاي قاتىناسىن ودان ءارى نىعايتۋ ءۇشىن ناقتى ۋاعدالاستىقتارعا قول جەتكىزىلدى. – ساپارىمنىڭ اياسىندا بۇگىن ۇكىمەت دەڭگەيىندەگى 9 قۇجاتقا، ەكى ەلدىڭ بيزنەس جانە باسقا دا قۇرىلىمدارىمەن 20-دان استام كەلىسىمگە قول قويىلدى. قىتايداعى قازاقستان ءتۋريزمى جىلى اياسىندا ۆيزاسىز رەجيمگە جانە ترانسكاسپيي حالىقارالىق كولىك باعدارىن دامىتۋعا، سونداي-اق ەنەرگەتيكا سالاسىنداعى ءوزارا ىقپالداستىعىمىزعا قاتىستى كەلىسىمدەردىڭ ماڭىزى زور ەكەنىن اتاپ وتكىم كەلەدى، – دەدى پرەزيدەنت.
لي سيان ەكىجاقتى بايلانىستاردى ودان ءارى نىعايتۋ تۇرعىسىنان قاسىم-جومارت توقايەۆتىڭ قحر-عا جاساعان ساپارىنىڭ ماڭىزدىلىعىنا توقتالدى
– قازاقستان مەن جۇڭگو حالىقتارىن عاسىرلار بويعى دوستىق قاتىناستار بىرىكتىرەدى. بيىل مامىر ايىندا جۇڭگو تەلەديدارىنا بەرگەن سۇحباتىڭىزدا ءسىز ءبىزدىڭ ەلىمىزدە ءبىلىم العان جانە جۇمىس ىستەگەن كەزدەگى ەستەلىكتەرىڭىزبەن ءبولىسىپ، جۇڭگو ءتىلىن جەتىك بىلەتىن ادام رەتىندە ءبىزدىڭ اۋديتوريامىزدى باۋراپ الدىڭىز. مەن دە سۇحباتتى كوردىم. بۇل ەلدەرىمىز اراسىنداعى دوستىقتى نىعايتۋعا تىڭ سەرپىن بەردى دەپ ويلايمىن. ءسىزدىڭ ءتوراعا سيمەن كەزدەسۋىڭىزدىڭ قورىتىندىسى بويىنشا ماڭىزدى ۋاعدالاستىقتارعا قول جەتكىزىلدى. ولار مەملەكەتتەرىمىز اراسىنداعى قارىم-قاتىناستىڭ جاڭا «التىن 30 جىلدىعى» كەزەڭىنە باعىت-باعدار بەرەدى. جۇڭگو تاراپى ارىپتەستەرىڭىزبەن بىرگە جوعارى دەڭگەيدە قول جەتكىزىلگەن وسى ۋاعدالاستىقتاردى جۇزەگە اسىرۋعا، عاسىرلار بويعى دوستىق بايلانىستار مەن ءوزارا ءتيىمدى ىنتىماقتاستىقتى نىعايتۋعا دايىن، – دەدى لي سيان.
كەزدەسۋ بارىسىندا اۋىل شارۋاشىلىعى، ينۆەستيسيا، كولىك جانە ترانزيت، ەنەرگەتيكا، مۇناي-گاز حيمياسى، گەولوگيالىق بارلاۋ، اۆتوكولىك قۇراستىرۋ، جوعارى تەحنولوگيا، سيفرلاندىرۋ سالالارىنداعى ءوزارا ىقپالداستىقتى نىعايتۋ ماسەلەلەرى قاراستىرىلدى. سونىمەن قاتار قاسىم-جومارت توقايەۆ پەن لي سيان ترانسشەكارالىق وزەندەردى بىرلەسىپ پايدالانۋ جونىندەگى ىنتىماقتاستىقتى جالعاستىرۋعا ءوزارا بەيىلدى ەكەنىن راستادى.