ىشكى ىستەر مينيسترلىگى قالىڭدىق الىپ قاشۋ بويىنشا تىركەلگەن قىلمىستىق ىستەردىڭ ستاتيستيكاسىن جەكە جۇرگىزەدى.
ۇكىمەت وتىرىسىنان كەيىن وتكەن باسپا ءسوز كونفەرەنسياسىندا ءمينيستردىڭ ورىنباسارى يگور لەپەحا وسىنداي مالىمەت ايتتى، دەپ حابارلايدى Almaty-akshamy.kz Kazinform cايتىنا سىلتەمە جاساپ.
«بۇگىنگى تاڭدا بىزدە «باس بوستاندىعىنان زاڭسىز ايىرۋ» دەگەن باپ بار. ءبىز قىز الىپ قاشۋ دەگەن كوبىنە ەكى جاقتىڭ كەلىسىمى بويىنشا جاسالاتىن جورالعى ەكەنىن بىلەمىز. ءبىراق وسىنداي ارەكەت ءۇشنى اشىلعان قىلمىستىق ىستەر مەن سوتتالعان ادامدار بار. قىز الىپ قاشۋ ارەكەتى ءۇشىن قىلمىستىق جاۋاپكەرشىلىك جۇكتەۋ تۋرالى ۇسىنىس بار ەكەنىن بىلەمىن. ماجىلىستە ول باستاما تالقىلانىپ جاتسا، قۋانا اتسالىسامىز. ويتكەنى وتە وزەكتى ماسەلە. حالىقارالىق ۇيىمداردىڭ باياندامالارىنىڭ بارىندە وسىنى بەتىمىزگە باسىپ جاتادى. ولار مۇنداي ءداستۇردى قابىلداي المايدى جانە تۇسىنبەيدى. مەنتاليتەتتى ەسكەرىپ، بۇل ماسەلە تۇزەتۋگە بولادى دەپ ويلايمىن. ويتكەنى سالتتى العا تارتىپ، ازاماتتاردىڭ كونستيتۋسيالىق قۇقىعىن بۇزاتىندار بار»، - دەدى يگرو لەپەحا.
سونداي-اق ول قىز الىپ قاشۋ ارەكەتى بويىنشا تىركەلگەن قىلمىستىق ىستەردىڭ جەكە ستاتيستيكاسى جۇرگىزىلەتىنىن اتاپ ءوتتى.
«باس بوستاندىعىنان زاڭسىز ايىرۋ بابى بار دەدىك قوي. كەز كەلگەن قىلمىستىق ستاتيستيكاعا ەنگىزىلەدى. ونىڭ ءارقايسىسى بويىنشا ستاتيستيكا جۇرگىزىلەدى. بىزدە قۇقىقتىق ستاتيستيكا كوميتەتى بار. باپ پايدا بولسا، بىردەن ستاتيستيكاعا ەنگىزىلەدى»، - دەدى ءمينيستردىڭ ورىنباسارى.