قازىرگى تاڭدا الەمدىك ءبىلىم كەڭىستىگىنە كىرگەن وتاندىق ءبىلىم بەرۋ سالاسىندا كوپتەگەن يگى وزگەرىستەر جۇزەگە اسۋدا. قازاقستاندىق وقۋشىلار حالىقارالىق سايىستاردا وزدەرىنىڭ جوعارى ءبىلىم دەڭگەيىمەن بيىك تۇعىرلاردان ۇزدىكسىز كورىنىپ، مەملەكەت تاراپىنان جاسوسپىرىمدەر مەن ولاردىڭ جەتەكشىلەرىنىڭ ەڭبەگى باعالانىپ جاتىر. سونىمەن قاتار PISA، TIMSS سياقتى حالىقارالىق وقۋشى قابىلەتىن باعالاۋ باعدارلامالارى بويىنشا العاشقى جىلدارمەن سالىستىرعاندا جوعارى كورسەتكىشتەرگە يە بولۋدا. ەلىمىزدىڭ جالپى ورتا ءبىلىم بەرۋ ۇيىمدارىنىڭ قىزمەتكەرلەرى بىلىكتىلىكتى ارتتىرۋ كۋرستارىنان ءوتىپ، الەمدىك ءبىلىم بەرۋ جۇيەسىنىڭ وزىق تاجىريبەلەرىمەن تانىسۋدا. قازىرگى ۋاقىتتا ءبىلىم بەرۋ سالاسىندا ۇزدىك جەتىستىكتەرگە جەتىپ، وزىندىك وقىتۋ جۇيەسىن قالىپتاستىرعان مەملەكەتتەردىڭ قاتارىندا سينگاپۋر بار. «ازيا بارىسى» دەپ اتالعان مەملەكەتتىڭ مەكتەپتەرى از ۋاقىتتىڭ ىشىندە الەم ۇزدىكتەرى قاتارىنا ەنگەن. 2023 جىلدىڭ شىلدەسىندە سينگاپۋردە وتكەن تاعىلىمدامالىق ءىسساپاردا الماتى قالاسى بوستاندىق اۋدانى م.گاندي اتىنداعى №92 مامانداندىرىلعان ليسەيدىڭ ديرەكتورى كۇلجان ساۋىت قىزى شاجابايەۆا بولدى. ۇزدىك تاجىريبەمەن تانىسقان مەكتەپ باسشىسى قازاقستانعا ورالعان سوڭ بىرنەشە سەمينار وتكىزدى.
ەڭ الدىمەن، مەكتەپ باسشىسى №92 مامانداندىرىلعان ليسەي ۇجىمىن تاعىلىمدامالىق ءىسساپار قورىتىندىلارىمەن تانىستىردى. «سينگاپۋر ەلىنىڭ ءبىلىم جۇيەسىندەگى نەگىزگى ەرەكشەلىكتەرى نەدەن بايقالادى؟» تاقىرىبىنداعى پرەزەنتاسياسى ارقىلى ءبىلىم سالاسىندا تولاعاي تابىستارعا جەتكەن ەلدىڭ وقىتۋ جۇيەسىنە شولۋ جاسادى.
ءسويتىپ، ليسەي قابىرعاسىندا جۇرگىزىلگەن تەوريالىق جانە پراكتيكالىق جۇمىستاردان سوڭ تاجىريبە ءبولىسۋ ماقساتىندا اۋداندىق جانە قالالىق دەڭگەيدە بىرنەشە سەمينار وتكىزىلدى. 2023 جىلدىڭ 20 جەلتوقسانىندا «الماتى مەكتەپتەرى: مەكتەپتەن تىس وقىتۋ – ءبىلىم كوزىن كەڭەيتۋ» اتتى قالالىق سەمينار وتكىزىلدى. قالا پەداگوگتەرىنە ارنالعان ءىس-شارانىڭ ماقساتى – ليسەيدىڭ مەكتەپىشىلىك باقىلاۋ جۇرگىزۋ باعىتىنداعى جۇمىستارى مەن ەلەكتروندى قۇجاتتار جۇيەسىمەن تانىستىرىپ، تاجىريبە الماسۋ.
سونداي-اق ليسەي ديرەكتورى ك.س.شاجابايەۆا «الماتى مەكتەپتەرى» جوباسى اياسىندا سينگاپۋر مەملەكەتىندە وتكەن تاعىلىمدامالىق ءىسساپاردىڭ ناتيجەلەرىمەن ءبولىستى. سينگاپۋر مەكتەپتەرىنىڭ ءبىلىم بەرۋ تۇجىرىمدامالارى مەن وقىتۋ باعدارلامالارى، ورتا ءبىلىم بەرۋ ۇيىمدارىنىڭ تاجىريبەلەرىن ەسكەرە وتىرىپ، ءار ءپان بويىنشا وقىتۋدى ۇيىمداستىرۋدىڭ فورمالارىن (مەكتەپتەگى ساباق، تابيعاتتى باقىلاۋ ساباعى، ساياحات ساباق، زەرتحانالىق ساباق، جوبا قورعاۋ ساباعى، وزا وقىتۋ ساباعى، وندىرىستىك ساباق، مۋزەي ساباعى، تەاتر ساباعى ت.ب.) تۇرلەندىرۋ ارقىلى بالالاردىڭ ناقتى تاقىرىپ بويىنشا ءبىلىم الۋىنىڭ ءتۇرلى كوزدەرى مەن مۇمكىندىكتەرىن كەڭەيتۋ ماقساتىندا ليسەيدە جۇرگىزىلگەن «مەكتەپتەن تىس وقىتۋ – ءبىلىم كوزىن كەڭەيتۋ» جوبا جۇمىسىمەن تانىستىردى. سەمينار اياسىندا ءداستۇرلى ەمەس فورماتتا وتكىزىلگەن بىرنەشە ساباق تانىستىرىلدى.
سەمينارعا قاتىسۋشىلار سينگاپۋردىڭ ءبىلىم جۇيەسىنىڭ وزىق تاجىريبەسىمەن ۇشتاسقان ليسەيدىڭ جوبا جۇمىستارىمەن تانىستى جانە مەكتەپىشىلىك باقىلاۋ جۇمىستارى بويىنشا قۇندى اقپارات الدى.
ودان بولەك، «مەكتەپتەن تىس وقىتۋ – ءبىلىم كوزىن كەڭەيتۋ» جوباسى اياسىندا اۋدان كىتاپحاناشىلارى ءۇشىن سەمينار وتكىزىلدى. مەكتەپ ديرەكتورى كۇلجان ساۋىت قىزى سينگاپۋر مەكتەپتەرىندەگى كىتاپحانالاردىڭ جۇمىسىمەن تانىستىردى. كىتاپحانالاردا كىتاپتاردان باسقا ءتۇرلى ويىنشىقتار، ەرتەگى كەيىپكەرلەرى بار. بالالارعا ساباق اياقتالعان سوڭ بىرنەشە ساعاتتارىن كىتاپحانادا وتكىزۋگە جاعداي جاسالعان. بالالاردىڭ وقۋ ساۋاتتىلىعىن ارتتىرۋدا اتا-انالار ماڭىزدى ءرول اتقارادى. كىتاپحاناشىلار اتا-انالارعا ارنالعان «وقۋ قىزىقتى: ءقازىر باستا!» تاقىرىبىندا سەمينارلار وتكىزەدى. بۇل يگى ءداستۇر ليسەي قابىرعاسىندا دا جۇرگىزىلۋدە. ۇلى ويشىل اباي قۇنانباي ۇلىنىڭ: «ارتىق عىلىم – كىتاپتا، ەرىنبەي وقىپ كورۋگە» دەگەن دانالىعىنىڭ نەگىزىندە مەكتەپتە «وقۋعا قۇشتار مەكتەپ» جوباسى جۇزەگە اسىرىلىپ جاتىر. ليسەي وقۋشىلارى «بالالار وقۋى»، «اباي وقۋلارى»، «ماعجان وقۋلارى»، «مۇقاعالي وقۋلارى»، «ايبەرگەنوۆ وقۋلارى» ت.ب. شىعارماشىلىق بايقاۋلارىندا جۇلدەلى ورىندارعا يە بولدى.
م.گاندي اتىنداعى №92 مامانداندىرىلعان ليسەيدە «مەكتەپتەن تىس وقىتۋ – ءبىلىم كوزىن كەڭەيتۋ» تاقىرىبىنداعى جوبا جۇمىسى جالعاسۋدا. الداعى ۋاقىتتا ليسەي وقۋشىلارىمەن جۇرگىزىلەتىن ءداستۇرلى ەمەس فورماتتاعى ساباقتاردىڭ سانى ارتادى دەپ جوسپارلانىپ وتىر. سونىمەن قاتار ءبىلىم الۋشىلاردىڭ زەرتتەۋشىلىك جانە شىعارماشىلىق باعىتتاعى جۇمىستارى دا ءوزىنىڭ جالعاسىن تابادى. ەڭ باستىسى، مەكتەپ ۇجىمىنىڭ ءار مۇشەسى، ءابۋ ناسىر ءال-فارابي ايتقانداي، ۇستاز تاراپىنان ءار ىستە بارىنشا ىنتالىلىق پەن تاباندىلىق قاجەت ەكەنىن تۇسىنەدى.