ماماندار ولاردىڭ قۇس تۇماۋىنان ولگەنىن مالىمدەگەن ەدى
قاراكول وزەنىنە جىبەرىلەتىن سۋدى زەرتتەۋ كەزىندە زياندى زاتتاردىڭ شامادان تىس مولشەرى انىقتالدى. سونىڭ نەگىزىندە Rixos Aktau قوناق ۇيىنە قاتىستى تەكسەرىس باستالدى، دەپ حابارلادى Lada.kz.
سوڭعى مالىمەتكە سايكەس، قاراكولدىڭ جاعاسىنان 826 اققۋدىڭ ولەكسەسى تابىلعان. بۇعان دەيىن ماماندار جۇزدەگەن اققۋدىڭ قۇس تۇماۋىنان قىرىلعانىن مالىمدەگەن ەدى. ال الەۋمەتتىك جەلىدە Rixos Aktau قوناق ۇيىنەن كولگە تۇسەتىن قۇبىردىڭ ۆيدەوسى تارادى. حالىق كولگە زياندى قالدىقتاردىڭ توگىلىپ جاتقانىن جارىسا جازدى. سونىڭ سالدارىنان اققۋلار قىرىلىپ جاتىر دەگەن بولجام دا جاسالدى.
ەكولوگيا جانە تابيعي رەسۋرستار مينيسترلىگى Rixos Aktau قوناق ۇيىنە قاتىستى جوسپاردان تىس تەكسەرىستىڭ باستالعانىن حابارلادى. ەكولوگيالىق رەتتەۋ جانە باقىلاۋ كوميتەتىنىڭ ءتوراعاسى جومارت الييەۆتىڭ ايتۋىنشا، زەرتحانالىق تالداۋ كەزىندە قاراكولگە توگىلىپ جاتقان سۋدىڭ قۇرامىندا زياندى زاتتاردىڭ شامادان تىس مولشەرى انىقتالعان.
سونىڭ نەگىزىندە Rixos Aktau قوناق ۇيىنە قاتىستى جوسپاردان تىس تەكسەرىس باستالدى. تەكسەرىستىڭ ناتيجەسى بويىنشا ءتارتىپ بۇزۋشىلارعا قاتىستى ءتيىستى شارالار قابىلدانىپ، اكىمشىلىك ىستەر قوزعالادى، - دەدى الييەۆ.