ءتيىستى شەشىم بۇگىن الماتى قالاسى پوليسيا دەپارتامەنتى تالىمگەرلەر كەڭەسىنىڭ ءبىرىنشى وتىرىسىندا قابىلداندى.
قازاقستان رەسپۋبليكاسىنىڭ ىشكى ىستەر ءمينيسترى ەرجان سادەنوۆتىڭ نۇسقاۋىنا سايكەس 2024 جىل كادر ساپاسىن جاقسارتۋ جىلى دەپ بەلگىلەندى جانە ارداگەرلەر تاراپىنان جەكە قۇراممەن تالىم-تاربيە جۇمىستارىن كوتەرۋ ماسەلەلەرىن قوزعادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ۇرپاق تاربيەسى – ۇلت بولاشاعىنىڭ كەپىلى” دەگەن ەل ىشىندەگى ۇلاعاتتى ءسوزدى ەسكە الىپ، ىشكى ىستەر ورگاندارىنىڭ دامۋى جولىندا ارداگەرلەردىڭ اقىل-كەڭەستەرى جانە وي-پىكىرلەرى بۇگىنگى تاڭدا وتە ماڭىزدى ەكەنىن اتاپ وتكىم كەلەدى. سىزدەردىڭ قولداۋلارىڭىزدىڭ ارقاسىندا جانە بۇگىنگى كەزدەسۋدىڭ ناتيجەسىندە ارداگەرلەرىمىزدىڭ ءاربىر ونەگەلى ءسوزى، تاعىلىمدى ەڭبەكتەرى – كەيىنگى جاستارعا ۇلكەن ۇلگى جانە تالىم-تاربيە. سوندىقتان سىزدەرگە دەگەن ءۇمىتىمىز دە، قۇرمەتىمىز دە ەرەكشە»، – دەدى الماتى قالاسى پوليسيا دەپارتامەنتىنىڭ باستىعى ارىستانعاني زاپپاروۆ.
اشىق داۋىس بەرۋ ناتيجەسىندە مولديار ورازالييەۆ الماتى پد تالىمگەرلەر كەڭەسىنىڭ ءتوراعاسى بولدى. ونىڭ ورىنباسارى – جان كەنجەتايەۆ. كەڭەستىڭ شەشىمىمەن 11 ارداگەر، ق ر ءىىم-نىڭ ەڭبەك سىڭىرگەن قايراتكەرلەرى الماتى پوليسياسىنىڭ بارلىق قىزمەتتەرى مەن بولىمشەلەرىنىڭ كۋراتورى بولىپ تاعايىندالدى.
«قۇرمەتتى ارداگەرلەر! مەملەكەت تاۋەلسىزدىگىنىڭ جانە قازاق پوليسياسىنىڭ قالىپتاسۋىنىڭ جولىندا ءبارىڭىزدىڭ ەڭبەگىڭىز زور! جاڭا فورماتتاعى پوليسيا قىزمەتكەرلەرىن وتانسۇيگىشتىككە تاربيەلەۋدە سىزدەردىڭ بىلىمدەرىڭىز، دانالىقتارىڭىز جانە ومىرلىك تاجىريبەلەرىڭىز بۇگىندە بۇرىنعىدان دا ماڭىزدى. ارداگەرلەردىڭ كەڭەستەرى قازىرگى قىزمەتكەرلەر مەن بولاشاق باسشىلار ءۇشىن باعا جەتپەس. ءبىز مۇنداي كەزدەسۋلەردى داستۇرگە اينالدىرۋدى جوسپارلاپ وتىرمىز جانە بۇل وڭ ناتيجە بەرەتىنىنە سەنىمدىمىن. بۇگىنگى كەزدەسۋدىڭ باستى مىندەتى – تاجىريبە الماسۋ، پوليسيا قىزمەتكەرلەرىنىڭ تاربيەسىنە قاتىستى ماسەلەلەردى تالقىلاۋ جانە ەڭ باستىسى دەپارتامەنتتىڭ تالىمگەرلەر كەڭەسىن قۇرۋ»، – دەدى ارىستانعاني زاپپاروۆ.
الماتى قالالىق پوليسيا دەپارتامەنتى – التى جارىم مىڭعا جۋىق قىزمەتكەرى بار قازاقستان رەسپۋبليكاسى ىشكى ىستەر مينيسترلىگىنىڭ ەڭ ءىرى بولىمشەسى. الماتى پوليسياسى ءوزىنىڭ قالىپتاسۋىنىڭ بۇكىل تاريحىندا لايىقتى كوشباسشىلاردى دايىندادى. الماتى پد 4 مينيسترمەن، 16 ىشكى ىستەر ءمينيسترىنىڭ ورىنباسارىمەن جانە 30 جوعارى گەنەرال اتاعىن العان باسشىلارمەن ماقتانادى.