ماڭعىستاۋ وبلىسىندا بەينەۋ – بورانقۇل تاسجولىندا يوگۋرت تيەلگەن جۇك كولىگى اۋدارىلىپ قالدى. وقيعا ورنىنان تۇسىرىلگەن ۆيدەو الەۋمەتتىك جەلىدە تاراپ، جۇرت نازارىن اۋدارتتى، دەپ حابارلايدى AqshamNews.kz ءتىلشىسى.
اقپاراتقا سايكەس، جۇك كولىگى بورانقۇل اۋىلى ماڭىنداعى 64-رازەزد اۋماعىندا جولدىڭ كوكتايعاق بولۋىنا بايلانىستى اۋدارىلعان. كۋاگەرلەردىڭ ايتۋىنشا، جۇرگىزۋشى جاعدايدى جەرگىلىكتى تۇرعىندارعا جەتكىزۋدى سۇراپ، شاشىلىپ قالعان ءونىمدى تەگىن تاراتا باستاعان.
ماڭعىستاۋ وبلىستىق پوليسيا دەپارتامەنتى جول-كولىك وقيعاسىن راستادى. ۆەدومستۆونىڭ مالىمەتىنشە، اپات 7 جەلتوقساندا ساعات 14:20 شاماسىندا بولعان. تىركەمەسى بار Scania جۇك كولىگىنىڭ جۇرگىزۋشىسى تايعاق جولدا رۋلگە يە بولا الماي، سونىڭ سالدارىنان كولىك اۋدارىلىپ كەتكەن.
پوليسيا حابارلاۋىنشا، وقيعا سالدارىنان ەشكىم زارداپ شەككەن جوق. الايدا جۇرگىزۋشىگە اقبتك-نىڭ 610-بابى بويىنشا اكىمشىلىك حاتتاما تولتىرىلىپ، 20 اەك كولەمىندە، ياعني 78 640 تەڭگە ايىپپۇل سالىنعان.
سونىمەن قاتار تاراعان مالىمەتتەرگە قاراعاندا، شاشىلعان «نەجنىي» ماركالى يوگۋرتتاردى تۇرعىندارعا تاراتۋ شەشىمى جۇرگىزۋشى مەن جۇك يەسى اراسىندا كەلىسىلگەن بولۋى مۇمكىن. ءونىم تەز بۇزىلاتىن ساناتقا جاتاتىندىقتان، قاپتامالاردىڭ ءبىر بولىگى زاقىمدانىپ، ساقتاۋ مەرزىمى شەكتەۋلى ەكەنى دە ايتىلدى.
پوليسيا دەپارتامەنتى جۇرگىزۋشىلەردى قىس مەزگىلىندە، اسىرەسە كوكتايعاق كەزىندە جولدا اسا مۇقيات بولۋعا تاعى دا شاقىردى.