Mastercard كومپانياسىنىڭ مالىمەتىنشە، 2025 جىلى قاڭتار–قاراشا ارالىعىندا شەتەلدىك تۋريستەر الماتى قالاسىنداعى ءتۇرلى ورىندار مەن كورىكتى جەرلەرگە جوعارى قىزىعۋشىلىق تانىتقان.
ەڭ تانىمال باعىت رەتىندە Shymbulak تاۋ شاڭعى كۋرورتى تىركەلىپ، ونىڭ ۇلەسى 30،62% بولدى. بۇل تۋرالى الماتى قالاسىنىڭ تۋريزم باسقارماسىنىڭ وكىلدەرى ايتتى.
تۋريستەر اراسىندا سۇرانىسقا يە وزگە ورىندار قاتارىندا: ۇلكەن الماتى كولى – 7،84%، مەدەۋ – 6،24%، MEGA ساۋدا-ويىن-ساۋىق ورتالىعى – 5،52%، اربات – 4،64%، شارىن شاتقالى – 4،35%، ورتالىق مادەنيەت جانە دەمالىس ساياباعى – 4،35%، كولساي كولى – 3،92% بار.
مادەني-تاريحي جانە رۋحاني نىساندار ىشىندە كوش باستاپ تۇرعاندار: كوكتوبە – 12،8%، ۆوزنەسەنسكيي شىركەۋى – 12%، قازاقستان رەسپۋبليكاسىنىڭ ورتالىق مەملەكەتتىك مۋزەيى – 7،2%، كوك بازار – 6،4%، تۇڭعىش پرەزيدەنت ساياباعى – 4%، ىقىلاس اتىنداعى حالىق مۋزىكالىق اسپاپتار مۋزەيى – 4%، الماتىنىڭ ورتالىق مەشىتى – 3،2%.
اتالعان دەرەكتەر تۋريستەر قىزىعۋشىلىعىنىڭ الۋان ءتۇرلى ەكەنىن جانە قالانىڭ بىرەگەي مادەني مۇراسىنا دەگەن نازاردىڭ جوعارى ەكەنىن كورسەتەدى. تۋريزم باسقارماسىندا اتاپ وتكەندەي، الماتى تاۋلارى تۋريستەر ءۇشىن نەگىزگى ورىن بولىپ قالا بەرەدى. ال «شىمبۇلاق» پەن «وي-قاراعاي» كۋرورتتارىن اسپالى جولدار مەن جاياۋ باعىتتار جەلىسى ارقىلى بىرىكتىرۋ تۋريستەردى بولۋگە، دەمالىس ءۇشىن قولايلى ءارى ءقاۋىپسىز ورتا قالىپتاستىرۋعا، سونداي-اق الماتىنىڭ حالىقارالىق تۋريستىك ورتالىق رەتىندەگى تارتىمدىلىعىن كۇشەيتۋگە مۇمكىندىك بەرەدى.
بۇعان دەيىن حابارلانعانداي، بيىلعى جىلدىڭ ءۇش توقسانىندا الماتىعا 563 مىڭ شەتەلدىك تۋريست كەلگەن. بۇل وتكەن جىلدىڭ وسى كەزەڭىمەن سالىستىرعاندا 11% جوعارى. جىل سوڭىنا دەيىن شەتەلدىك تۋريستەر سانى 750 مىڭ ادامعا جەتەدى دەپ بولجانىپ وتىر.