"توي - حالىقتىڭ قازىناسى" دەگەن ءسوز قازاق حالقىنىڭ ساناسىنا بارىنشا ءسىڭىپ قالعان. ويتكەنى كۇندەلىكتى ومىردە كيىلە بەرمەيتىن ۇلتتىق كيىم، ءسالت-داستۇر مەن ءجون-جورالعىنىڭ كوبى ءدال وسى توي ۇستىندە ورىندالىپ، ءبىر "جاساپ" قالاتىنى بار. ۋاقىت وتە كەلە كەيبىرى وزگەرىسكە ۇشىراپ، زامانىنا ساي جاڭارىپ تا جاتىر. دەگەنمەن قازىرگى قازاق قوعامىندا تويعا كەلگەندە شامادان تىس شىعىن دا، "ەل نە دەيدىگە" سالىنىپ، "تىراشتانۋ" دا توقتاماي تۇر.
بۇرىن اۋىلدى جەردە ءۇيدىڭ الدىنا پالاتكا تىگىپ، ال قالادا اسحانانى جالداپ، اعايىن-تۋىس، كورشى-كولەممەن قاراپايىم عانا توي جاساي سالاتىن كەزەڭ ەدى. ءبىراق ءقازىر زامانىنا قاراي ول دا وزگەرىپ، كوبىنشە قارىزدانىپ-قاۋعالانىپ توي جاساۋ ۇيرەنشىكتى جاعدايعا اينالعان. اسىرەسە، ۇيلەنۋ تويىندا استا-توك شىعىنعا باتاتىنىمىز جاسىرىن ەمەس.
دەگەنمەن كەيىنگى كەزدە وسى ستەرەوتيپتى بۇزىپ، شاعىن ءارى ءماندى توي جاساۋدى ءجون كورەتىن جاستار دا كوبەيىپ كەلەدى.
Aqshamnews.kzء-تىڭ بۇل جولعى كەيىپكەرلەرى – ءدال وسىنداي شەشىم قابىلداعان ايدانا حوجانوۆا مەن كەنجەبەك زۋلكارنايەۆ ەسىمدى جاس جۇبايلار.
ايدانانىڭ ايتۋىنشا، بۇل شەشىمگە ەكەۋى دە بىردەي توقتاعان.
"تانىمايتىن 300–500 ادامعا ارناپ ۇلكەن توي جاساعىمىز كەلمەدى. ودان بولەك، كيىت پەن ءتۇرلى سىيلىقتاردىڭ ءبارى – ارتىق شىعىن دەپ ويلايمىن. الدىمدا ۇيلەنگەن اعا-اپكەلەرىمنىڭ تويىن كورىپ ءوستىم، اتا-انامنىڭ قانشاما قينالعانىن دا كوردىم"، – دەيدى ول.
جاس وتاۋدىڭ پىكىرىنشە، كوپشىلىك "ەل نە دەيدى" دەگەن جەلەۋمەن شاماسىنان تىس شىعىندالادى. ءبىراق ايتۋلارىنشا، قالاي بولعاندا دا سىن ايتاتىن تۋىس پەن تانىس ءبارىبىر تابىلادى. سوندىقتان ايدانا مەن كەنجەبەك ارتىق شىعىنعا بارماي، كرەديتكە كىرمەي، تەك جاقىن دوستارىنا ارناپ شاعىن عانا فورماتتا توي وتكىزۋدى ءجون كورگەن. ەكەۋارا قابىلدانعان بۇل شەشىمدى ەكى جاقتىڭ دا اتا-اناسى قابىلداي قويماعان. ءتىپتى، شاعىن ورتادا وتكىزبەك بولعان تويعا بارۋدان باس تارتقان. دەگەنمەن، رايلارىنان قايتىپ، جاستاردىڭ باقىتىنا تۇساۋ سالماي، اق باتالارىن بەرىپتى.
ونلايننان - وتاۋ قۇرۋعا
ەكى جاس 2024 جىلعى تامىزدا ونلاين تانىسقان. ول كەزدە ايدانا يتاليانىڭ ميلان قالاسىندا تۇرىپ جاتقان. كەيىن ەكەۋى دە جۇمىس بابىمەن الماتىعا كەلەدى. ونلايندا باستالعان تانىستىق العاشقى كەزدەسۋدە-اق ەكى جاستىڭ بولاشاقتا وتاۋ قۇراتىنىن اڭعارتقان.
"ەكەۋىمىز ەكى ەلدە جۇردىك. ارا-اراسىندا ىستامبۇل، الماتىدا، اتىراۋدا كەزدەستىك. اقپان ايىندا جولداسىم ۇيلەنۋگە ۇسىنىس جاسادى، سونىمەن ءبارى شەشىلدى"، - دەپ جىلى جىميدى جاس كەلىنشەك.
7 ءساۋىر كۇنى ايداناعا سىرعا سالىنىپ، ۇيىنەن ۇزاتىلىپ، كەلەسى كۇنى جىگىت جاقتا ۇيدە 30–50 ادامعا ارنالعان شاعىن بەتاشار جاسالعان. ال 12 ساۋىردە دوستارىنا ارناپ، جاس جۇبايلار وزدەرى قالاعان فورماتتا باس قوسۋ وتىرىسىن وتكىزگەن. قوناقتار سانى 50 ادامنان اسپاعان.
ەڭ باستىسى، جاستار تويعا جۇمسالاتىن 7-8 ميلليون تەڭگەنى ەكى بولمەلى پاتەردىڭ باستاپقى جارناسى رەتىندە رەتىندە قۇيىپ، ۇيلەنە سالا "ءۇيلى" بولعان. يپوتەكالىق باعدارلاما ارقىلى ءۇيدىڭ جارتى قۇنىن تولەپ، قالعانىن ءقازىر كەزەڭ-كەزەڭىمەن وتەپ وتىر.
تويعا جالپى 750 مىڭ تەڭگە جۇمسالعان ەكەن. تويعا كەلگەن دوستارىنىڭ قوسقان سىيى 400 مىڭ تەڭگەنى قۇراعان. تۇپتەپ كەلگەندە، جاس جۇبايلار ناقتى شىعىن ءتىپتى 750 ەمەس، 350 مىڭ تەڭگەگە اينالعانىن وزدەرى دە اڭعارماسا كەرەك.
750 مىڭ تەڭگە قالاي جۇمسالدى؟
ايدانانىڭ ايتۋىنشا، بۇل سوما كەيبىرەۋلەرگە از، ال ەندى بىرەۋلەرگە كوپ بولىپ كورىنۋى مۇمكىن. قاراجاتتىڭ نەگىزگى بولىگى ۆيدەوگراف پەن فوتوگراف قىزمەتىنە، اساباعا جانە داستارحان ءمازىرىن ازىرلەگەن اسپاز ەڭبەگىنە جۇمسالعان.
سونىمەن قاتار، ۇيدە وتەتىن تويعا ارنالعان ۇستەلدەر جالدانىپ، بەزەندىرۋگە قاجەتتى زاتتار قاراپايىم بازاردان الىنعان. جەتپەگەن ىدىستاردى ساتىپ الماي، دوستارىنان ۋاقىتشا العان. ال داياشى قىزمەتىن تۋىس سىڭلىلەرى مەن باۋىرلارى اتقارعان.
داستارحان دا بارىنشا جيناقى ازىرلەنىپ، تەك جەلىنەتىن اس تۇرلەرى قويىلعان. ىسىراپقا جول بەرىلمەگەن.
مازىردە:
-
ءۇش ءتۇرلى سالات (كاپرەزە، باكلاجان، سەزار)،
-
سۋىق تىسكەباسارلار مەن جەمىس-جيدەك،
-
ەكى ىستىق تاعام (سوۋستاعى تاۋىق پيۋرەمەن، بالىق كۇرىشپەن)،
-
تاتتىلەر مەن سۋسىندار بولعان.
وزدەرى قالاعان فورماتتا وتكىزىلگەن توي دوستارىنىڭ كوڭىلىنەن دە شىققان. تەك قانا جاستار باس قوسقان وتىرىس بارىنشا كوڭىلدى ءارى ەستە قالارلىقتاي وتكەن.
باليدەگى بال ايى
توي وتىسىمەن، جاس وتباسى بال ايىن باليگە بارىپ وتكىزىپ كەلگەن. بۇل - ولار وتاۋ قۇرماي تۇرىپ كەلىسىلگەن شەشىم.
ايدانا وسى ۋاقىتقا دەيىن 25 ەلدى ارالاپ، بىرنەشە جىل شەتەلدە تۇرعان جايى بار. جولداسى كەنجەبەك تە جۇمىس بارىسىمەن شەتەلدە ءجيى بولعان. ەكەۋىن توعىستىرعان ارماننىڭ ءبىرى - ەل-جەردى بىرگە كورىپ، بىرگە ساياحاتتاۋ. شەتەلگە كوپ جولى تۇسكەننەن كەيىن، بۇل تۇرعىدان دا بىلگەنى مەن تۇيگەنى مول ەكەن. جاس جۇبايلاردى ساياحاتتى دا كوپ شىعىندانباي بارىنشا ءتيىمدى وتكىزۋدىڭ شەبەرلەرى دەسە بولادى.
"كەلىسىپ پىشكەن تون كەلتە بولماس". ايدانا مەن كەنجەبەكتىڭ ءوزارا اۋىزبىرلىكتە جاساعان شاعىن عانا شاڭىراق كوتەرۋ تويى جايلى اڭگىمەسىنە قاراپ وسىنداي وي تۇيۋگە بولادى. ءوزارا سەنىم مەن كەلىسىمگە كەلە وتىرىپ، جاسالعان وسىنداي شاعىن عانا شاڭىراق كوتەرۋ تويى بۇل وداقتىڭ ءالى تالاي ماقساتتارى ايقىن ەكەنىن اڭعارتادى. ءبىر جاعىنان بۇل وقيعا "باس ەكەۋ بولماي، مال ەكەۋ بولماسىن" دا ۇيرەتەتىندەي.
قازىرگى تاڭدا جاس جۇبايلار اتا-انا بولۋعا دايىندالىپ ءجۇر. ايدانانىڭ ايى-كۇنى جاقىنداپ قالعان.
ەڭ باستىسى، بولاشاق سابيمەن پاتەردەن-پاتەرگە كوشىپ، جالاقىدان-جالاقىعا قاراپ، قارىزدانىپ-قاۋعالانىپ ءومىر سۇرمەيدى. ايدانا مەن كەنجەبەك ءوز پرينسيپتەرىنە ساي، بولاشاقتارىنا قاجەتتى جاعدايدى الدىن الا جاساپ قويعان. الدا ەل ارالاۋ، ءتىپتى شەتەلدە تۇرىپ كورۋ دە ولاردىڭ ورتاق ارماندارىنىڭ ءبىرى.