قازاقستاندا شەتەلدىك تۋريستەردىڭ اعىنى ارتىپ كەلەدى.
EQonaq اقپاراتتىق جۇيەسىنىڭ دەرەكتەرىنە سايكەس، جىل باسىنان ەل اۋماعىنا سىرت مەملەكەتتەردەن 200 مىڭعا جۋىق ساياحاتشى كەلگەن. نەگىزىنەن كورشىلەس رەسەي مەن وزبەكستان، سونداي-اق تۇركيا مەن جۇڭگو ازاماتتارى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
الىس شەتەل تۋريستەرى ۇلى دالانىڭ كەرەمەتتەرىن كورۋگە اسىق. قوناقتار ەلمەن ەتەنە تانىسۋدى ەلوردا مەن الماتى قالالارىنان باستاعاندى ءجون كورەدى. ولار بىزدەگى ەسكى مەن زاماناۋي ساۋلەتتىڭ ۇيلەسىم تاپقان جاراسىمدى كەيپىنە ءتانتى. كوبىنە كونەدەن تامىر تارتقان تاريحي ەسكەرتكىشتەردى قىزىقتاپ، قاسيەتتى مەكەندەردى ارالاۋدى قالايدى. كەلۋشىلەر سانى بويىنشا قىزىلوردا جانە ماڭعىستاۋ وڭىرلەرى دە كوش باسىندا.
«eQonaq جۇيەسى جالپى تۋريستەردىڭ سانىن ەسەپتەۋ ءۇشىن جانە ولار بويىنشا ستاتيستيكالىق اقپارات جيناۋ ءۇشىن ەنگىزىلگەن جۇيە. جالپى ول ەڭ باسىندا شەتەلدەن كەلەتىن تۋريستەردى ميگراسيالىق ەسەپكە الۋ ءۇشىن جاسالعان. ءبىز ودان باسقا ءتۋريستىڭ ناعىز پورترەتىن جاسايمىز، كىم ەكەنىن، جاسى قانشادا، قاي جەرگە باراتىنىن، ءبىرىنشى رەت كەلىپ جاتىر الدە قايتىپ كەلدى مە، قانداي گەوگرافيالىق جەرلەرگە بارعىسى كەلەدى دەگەن اقپاراتتى ءدال قازىرگى وسى ۋاقىتتا كورۋگە مۇمكىنشىلىك بەرەدى»، - دەيدى «Kazakh Tourism» ۇك باسقارۋشى ديرەكتورى دانيەل سە رجان ۇلى.
ايتا كەتەيىك، eQonaq اقپاراتتىق جۇيەسى 2020 جىلدىڭ قاراشا ايىندا ىسكە قوسىلدى. قازىرگى ۋاقىتتا ول رەسپۋبليكالىق ماڭىزى بار 3 قالا مەن 14 وبلىس ورتالىعىن قامتيدى.