الماتىدا بەلگىسىز ەر ادام كوشەدە قىزدى سوققىعا جىقتى

28 جاستاعى الماتى تۇرعىنىنا بەلگىسىز ەر ادام شابۋىل جاسادى.

جابىرلەنۋشىنىڭ ايتۋىنشا، ونى بەيتانىس ەر ادام ەش سەبەپسىز سوققىعا جىققان، دەپ حابارلايدى Almaty-akshamy.kz قازاقپاراتقا سىلتەمە جاساپ.

«كەشە تۇندە ءۇيدىڭ ماڭىندا بەيتانىس ادام ماعان شابۋىل جاساپ، باسىمنان قان شىققانشا، اياماي ۇرىپ، سوسىن ءوزى كەلگەن جاققا قاراي قاشىپ كەتتى. مەن دەرەۋ پوليسياعا حابارلاستىم، الايدا ولار ءالى بەينەكامەرالاردى تەكسەرگەن جوق. ونىڭ ءتۇرىن ەسىمدە ساقتاپ قالدىم. مەن بۇل ءىستى جاۋىپ تاستاي ما دەپ قورقامىن»، - دەپ جازدى جابىرلەنۋشى Instagram-داعى پاراقشاسىندا.

الماتى قالالىق پوليسيا دەپارتامەنتى بۇل فاكتى ق ر قىلمىستىق كودەكسىنىڭ 293-بابى «بۇزاقىلىق» بويىنشا سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە تىركەلگەنىن ءمالىم ەتتى.

«قىزدىڭ العان دەنە جاراقاتىنىڭ اۋىرلىعىن انىقتاۋ ءۇشىن سوت-مەديسينالىق ساراپتاما تاعايىندالدى. بۇل وقيعا 16 تامىزعا قاراعان ءتۇنى مەدەۋ اۋدانىندا بولعان. تەرگەۋ بارىسى قالالىق پوليسيا باسشىلىعىنىڭ باقىلاۋىنا الىندى»، - دەپ اتاپ ءوتتى الماتى قالالىق پوليسيا دەپارتامەنتىنىڭ رەسمي وكىلى سالتانات ازىربەك.