الماتى قالاسىنداعى تەرگەۋ يزولياتورىندا سوت ۇكىمىن كۇتىپ جاتقان كۇدىكتىلەر ۇستالادى.
الىپ قالانىڭ شەت جاعىندا ورنالاسقان اباقتىنىڭ الدى تۇتقىنداعىلارعا كەرەك زاتتارى مەن تاماق اكەلگەن ادامداردان ءبىر ارىلمايدى. اكەلگەن ءار زاتتى مۇقيات تەكسەرەتىن باقىلاۋشىلار سالەمدەمەلەردىڭ ىشىنەن نەبىر تىيىم سالىنعان زاتتاردى تاۋىپ جاتادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ارام نيەتتىلەر كوبىنە ءشايدىڭ ىشىنە، كامپيتتىڭ اراسىنا، تىپتەن تەمەكىنىڭ ىشىندەگى ۇنتاعىن الىپ تاستاپ، ورنىنا ەسىرتكىلىك زاتتار جاسىرادى. تۇرمەدە جاتقانداردىڭ تۋىسقاندارى مەن دوستارى نەگىزىنەن ەسىرتكى زاتتارى مەن ۇيالى تەلەفونداردى وتكىزۋگە تىرىسادى. ولار تەلەفوننىڭ نەعۇرلىم شاعىن ماركالارىن تاڭدايدى. ونى جاسىرۋدىڭ دا نەبىر جولدارىن ويلاپ تابادى. مىسالى، ناننىڭ ورتاسىنا، اياق كيىمنىڭ ۇلتانىنا جاسىرسا، sim-كارتالاردى انىقتاۋ وڭاي ەمەس. تىپتەن جۋىردا باقىلاۋشىلار ءتىس پاستاسىنا جاسىرعان sim-كارتانى دا تاپتى. تەرگەۋ اباقتاسىنداعى تىيىم سالىنعان زاتتاردى انىقتاۋدىڭ تاعى ءبىر جولى – كامەرالاردا ءتىنتۋ جۇرگىزۋ.
«جىل باسىنان بەرى الماتى قالاسى قىلمىستىق-اتقارۋ دەپارتامەنتىنە قاراستى لا-155/18 مەكەمەسىندە 33 تەلەفون، 1 ليتر الكوگولدىك ىشىمدىك، 111،32 گرامم ەسىرتكى زاتى جانە اقشالاي 46 000 تەڭگە تاركىلەندى. تىيىم سالىنعان زاتتاردى وتكىزۋگە تىرىسقان 19 ادامعا قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 481-بابىنا سايكەس حاتتاما تولتىرىلىپ، ماتەريالدار سوتقا جىبەرىلدى. سوتتىڭ شەشىمىمەن ولار اكىمشىلىك جازاعا تارتىلىپ، ەسكەرتۋ جاسالدى نەمەسە ون ايلىق ەسەپتىك كورسەتكىش كولەمىندە ايىپپۇل سالىندى»، – دەيدى رەجيم جانە كۇزەت ءبولىمى باستىعىنىڭ مىندەتىن اتقارۋشى اسحات كومەكبايەۆ.