بۇگىن مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا ينۆەستيسيا تارتۋدىڭ ماڭىزىن تاعى ءبىر مارتە ناقتىلاپ، ۇكىمەتكە جاڭا مىندەتتەر جۇكتەدى. پرەزيدەنتتىڭ ايتۋىنشا، ءقازىر الەمدە ينۆەستيسيا ءۇشىن باسەكە كۇشەيىپ بارادى، سوندىقتان قازاقستانعا جاڭا ينۆەستيسيالىق كەزەڭگە قادام باسۋ قاجەت. وسى تۇستا قارجى، بيرجا، ماكروەكونوميكا ساراپشىسى، ەكونوميست ايبار ولجاي پرەزيدەنت جولداۋىنداعى توقتالۋ كەرەك تارماقتاردى اتاپ ءوتتى. اqshamnews.kz ءتىلشىسىنىڭ ماتەريالىنان وقىڭىز.
"ەندى ءار ينۆەستور ءوز جوبالارىن تەزىرەك ىسكە اسىرادى دەپ سەنەمىز"
ايبار ولجايدىڭ ويىنشا، پرەزيدەنتتىڭ ۇكىمەتكە ينۆەستيسيا تارتۋ جۇيەسىن تۇگەل جاڭعىرتۋ جونىندەگى تاپسىرماسى بۇرىننان قوردالانعان ماسەلەنى شەشۋگە جول اشادى.
"جولداۋ ەكونوميكاداعى ينۆەستيسيانىڭ ماڭىزىن بارىنە ۇعىنىقتى قىلىپ تاعى ءبىر شەگەلەدى. پرەزيدەنت ءىرى عانا ەمەس، ورتا جانە شاعىن ينۆەستورلارمەن دە جۇمىس ىستەۋ كەرەگىن ايتتى. بۇعان دەيىن اكىمدەر ءىرى جوبالارعا كوپ قىزىعاتىن. ال ورتا ينۆەستورلار بيۋروكراتيا تورىنا ءتۇسىپ، ايماقتارعا بارسا دا، اكىمدەرگە جولىعا الماي جۇرەتىن. ەندى ناقتى جوسپار جاسالىپ، پرەزيدەنتتىڭ ءوزى سيگنال بەرگەن سوڭ، ءار ينۆەستور ءوز جوبالارىن تەزىرەك ىسكە اسىرادى دەپ سەنەمىز"، – دەيدى ولجاي.
جاساندى ينتەللەكت – جاڭا ءداۋىردىڭ باستاۋى
ەكونوميستىڭ پىكىرىنشە، جولداۋ قازاقستاننىڭ جاڭا تاريحي كەزەڭگە قادام باسقانىن اڭعارتتى. بۇل ءداۋىر – ادامي فاكتوردى بارىنشا ازايتىپ، شەشىم قابىلداۋ ىسىندە جاساندى ينتەللەكتكە سۇيەنۋ ءداۋىرى.
"جولداۋ ەكونوميكادا ادامي فاكتوردى اتتاپ ءوتىپ، جاساندى ينتەللەكت شەشىمدەرىنە اۋىساتىن كەزەڭدى باستادى. بۇل اسىرەسە رۇقسات بەرۋ مەن باقىلاۋ فۋنكسيالارىن بيۋروكراتيادان ارىلتۋعا مۇمكىندىك بەرەدى. مىسالى، سۋپەركومپيۋتەرگە بارلىق زاڭدار مەن ەرەجەلەردى جۇكتەپ، ولاردىڭ ارتىق ءارى قايتالاناتىن تۇستارىن الىپ تاستا دەپ تاپسىرساق، ول بىرنەشە كۇندە ءبارىن رەتتەپ بەرەدى"، – دەپ اتاپ ءوتتى ول.
ءجي-دىڭ پوتەنسيالىن پايدالانباساق، وكىنىپ وتىرماقپىز - ايبار ولجاي
ايبار ولجاي سونىمەن بىرگە ەلىمىزدە سيفرلاندىرۋدىڭ تولىق ىسكە اسپاعان تۇستارىن سىنعا الدى.
"سيفرلاندىق دەپ جۇرگەن ەلىمىزدە كەيبىر كەلىسىم-شارتتار، ىستەلگەن جۇمىس اكتىلەرى ءالى كۇنگە دەيىن قاعازبەن جاسالىپ، كۋرەردى قيناپ قولمەن تاسىلىپ جۇرگەنى ۇيات. بۇل قارجى مينيسترلىگىنىڭ اتىنا سىن. ءالى دە قاعازعا باسىلاتىن مىڭداعان وچەت بار. ولاردى تاسىپ جۇرگەن، كابينەتتەرگە قوراپپەن جيناۋمەن اينالىساتىن مىڭداعان قىزمەتكەر بار. جەكە تۇلعالار ماسەلەسى تەز سيفرلانسا دا، زاڭدى تۇلعالار مەن مەملەكەتتىك اپپاراتقا كەلگەندە ءبىزدىڭ سيفرلاندىرۋ باتپاققا باتىپ قالدى"، – دەيدى قارجىگەر.
ايبار ولجايدىڭ پىكىرىنشە، پرەزيدەنت توقايەۆتىڭ جولداۋى قازاقستاندى جاڭا ينۆەستيسيالىق كەزەڭگە باستاپ، جاساندى ينتەللەكتىنى ەنگىزۋدىڭ ناقتى جولىن كورسەتتى.
"پرەزيدەنت ءجي-دىڭ وراسان الەۋەتىن جاقسى ءتۇسىنىپ وتىر. سەبەبى ءجي-دىڭ وراسان پوتەنسيالىن ءقازىر پايدالانباساق، ەرتەڭ كوشتەن قالىپ وكىنىپ وتىرماقپىز. سول جولداۋدى پارلامەنت قابىرعاسىندا وفلاين تىڭداعان ءبىراز ادامنىڭ كوزىندە "جاساندى ينتەللەكت. ول نە جانە قالاي بولادى؟" دەگەن سۇراق بايقالدى. كوبى پرەزيدەنت ايتىپ وتىرعان پوتەنسيالدى ءالى ءتۇسىنىپ ۇلگەرمەگەن سياقتى. ءبىراق ەڭ بيىك مىنبەردەن ايتىلعاننان كەيىن، ەندى قازاقستاندى توقتاتۋ قيىن بولادى"، – دەپ تۇيىندەدى ولجاي.