بۇگىنگە دەيىن كوكسۋ قانت زاۋىتى 54 مىڭ توننا ءونىم وڭدەپ ۇلگەردى
جەتىسۋلىق شارۋا 300 گەكتار ءتالىمى جەرگە 12 جاڭبىرلاتىپ سۋارۋ قۇرىلعىسىن ورناتىپ، بۇل القاپقا قانت قىزىلشاسىن سەپكەن. الداعى ۋاقىتتا ىلعال ساقتاۋ تەحنولوگياسى ەنگىزىلگەن جەردىڭ كولەمىن 500 گەكتارعا جەتكىزبەك، دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
ول كوكسۋ قانت زاۋىتىنا ازىرگە 11 مىڭ توننا ءونىم وتكىزىپ ۇلگەردى. اتالعان سەرىكتەستىك كەربۇلاق اۋدانىنداعى جولامان ماسسيۆىندە ورنالاسقان. سول سياقتى سولتۇستىك قازاقستاندىق شارۋا داۆيد اداموۆ اقسۋ اۋدانىندا قانت قىزىلشاسىن سەبۋگە نيەت ءبىلدىرىپ وتىر. ول قولدا بار تەحنيكاسىن وسى وڭىرگە اكەلۋمەن قاتار، القاپقا جاڭبىرلاتىپ سۋارۋ تەحنولوگياسىن ورناتپاقشى.
قانت قىزىلشاسى جاقسى كۇتىپ-باپتالسا، ەڭ تابىستى داقىل ەكەنىن ءقازىر شارۋالار تۇسىنە باستادى. ۇلكەن سەرىكتەستىكتەر عانا ەمەس، شاعىن شارۋا قوجالىقتارىنىڭ ءوزى تىڭعىلىقتى ەڭبەگىنىڭ جەمىسىن كورىپ وتىر. ماسەلەن، وبلىستىق اۋىل شارۋاشىلىعى باسقارماسىنىڭ اقپاراتىنا سۇيەنسەك، اقسۋ اۋدانىنداعى «جاقسىلىق» شارۋا قوجالىعى 30 گەكتارعا قىزىلشا سەپكەن، سونىڭ ءار گەكتارىنان 700 سەنتنەردەن استام ءونىم الىپ وتىر. سول سياقتى نەگىزىنەن مال شارۋاشىلىعىمەن اينالىساتىن ەسكەلدى اۋدانىنداعى «ميراس» شارۋا قوجالىعى قىزىلشاعا قىزىعۋشىلىق تانىتىپ، بيىل 80 گەكتار وتىرعىزعان. ءونىم شىعىمدىلىعى 500 سەنتنەردەن اينالىپ، جالپى 4 مىڭ توننادان استام ءتاتتى ءتۇبىر جينادى. ال كوكسۋلىق شاعىن «جۇلدىز» شارۋا قوجالىعى 20 گەكتاردان 800 سەنتنەردەن ءونىم الدى.
«قىزىلشا شىعىمىنىڭ جاقسى بولۋى ءۇشىن ەڭ الدىمەن جەردى ۋاقىتىندا تىڭايتىپ، داقىلدى دەر كەزىندە سەۋىپ، اگروتەحنولوگيالىق تالاپتاردى ساقتاۋ كەرەك. القاپتى سۋارۋ، شوپتەۋ جۇمىستارى دا كەزەڭ-كەزەڭىمەن اتقارىلۋ ءتيىس. سونىڭ ءبارى تالاپقا ساي بولسا، جەر جومارت قوي، ءونىمدى ءۇيىپ بەرەدى»، - دەيدى «ميراس» شارۋا قوجالىعىنىڭ باسشىسى ايحان بيمۇراتوۆ.
سولتۇستىك قازاقستاندىق شارۋا داۆيد اداموۆ جەتىسۋ جەرىنىڭ قانت قىزىلشاسىن وسىرۋگە قولايلى ەكەنىن جانە مەملەكەت تاراپىنان جاسالىپ وتىرعان قولداۋلار جايلى بىلگەن سوڭ، وسى ايماقتا ءتاتتى تۇبىرمەن اينالىسۋعا بەل بۋعان. ءقازىر اقسۋ اۋدانىندا كەلەسى جىلدىڭ كوكتەمىندە داقىل سەبۋگە جەردى دايىنداۋعا كىرىسكەن. ول وسى اۋدانعا ءوزىنىڭ قولدا بار تەحنيكاسىن تۇگەل الەلمەك. وعان قوسا قىزىلشا القابىنا جاڭبىرلاتىپ سۋارۋ قۇرىلعىلارىن ورناتۋدى جوسپارلاپ وتىر.
جالپى بيىلعى جىلى جەتىسۋ وبلىسىنىڭ جەتى ايماعىندا 160 شارۋاشىلىق قانت قىزىلشاسىن سەۋىپ، ءونىم الدى. جالپى كولەمى 4،3 مىڭ گەكتار جەردەن 180 مىڭ توننا ءتاتتى ءتۇبىر جينالىپ، شىعىمى ورتا ەسەپپەن ءار گەكتارىنا 418،6 سەنتنەردەن اينالدى. بۇگىنگە دەيىن كوكسۋ قانت زاۋىتى 54 مىڭ توننا ءونىم وڭدەپ ۇلگەردى.
وبلىستىق اۋىل شارۋاشىلىعى باسقارماسىنىڭ مالىمەتىنشە، بيىل اقسۋ اۋدانىنداعى «ءاليحان»، ەسكەلدى اۋدانىنداعى «رومانەنكو ۆ.»، «نام»، «دۇيسەنبينوۆ»، «دوسانوۆ»، قاراتال اۋدانىنداعى «ورلەنوك»، «سەيد وعلى مۇستافا»، سارقان اۋدانىنداعى «سامال»، تالدىقورعان قالاسىنداعى «ساماي» شارۋا قوجالىقتارى ءار گەكتارىنا 600 – 837،8 سەنتنەر ارالىعىندا ءونىم الىپ، جوعارى كورسەتكىشكە قول جەتكىزگەن. بۇعان شارۋالاردىڭ ءوز كاسىبىنە تىڭعىلىقتى قاراۋىمەن قاتار قىزىلشا ءوسىرۋدىڭ تيىمدىلىگىن ارتتىرۋ ماقساتىندا مەملەكەت تاراپىنان كورسەتىلىپ وتىرعان ءتيىستى كومەكتىڭ دە ىقپالى زور بولدى.
ماسەلەن، وتكەن جىلى قىزىلشانىڭ ءبىر تونناسى زاۋىتقا 22 مىڭ تەڭگەدەن قابىلدانسا، بيىل بۇل سوما 30 مىڭ تەڭگەگە ارتتىرىلعان، سونىڭ 15 مىڭ تەڭگەسى زاۋىتتان، 15 مىڭ تەڭگەسى - مەملەكەت سۋبسيدياسى. ەندى كەلەسى ماۋسىمدا بۇل كورسەتكىش تونناسىنا 40 مىڭ تەڭگەگە وسىرىلەتىن بولدى، ياعني مەملەكەت ءوزى بەرەتىن سۋبسيديا كولەمىن تاعى 10 تەڭگەگە ارتتىرىپ وتىر دەگەن ءسوز.
«جەتىسۋ» اكك مەن كوكسۋ قانت زاۋىتى بىرلەسە وتىرىپ، فيۋچەرستىك كەلىسىم نەگىزىندە شارۋاشىلىقتارعا جىل سايىن شەتەلدىك سەلەكسيا تۇقىمىن بەرەدى. مينەرالدى تىڭايتقىشتار مەن گەربيسيد قۇنىنىڭ 50% سۋبسيديالانادى. كوكتەمگى-كۇزگى ەگىس جانە جيىن-تەرىن كەزىندە ديزەل وتىنى جەڭىلدىكپەن بەرىلۋدە. ماسەلەن، بيىل كوكتەمگى دالا جۇمىستارى ءۇشىن كوكسۋ قانت زاۋىتى قىزىلشاشىلارعا ءار گەكتارىنا 100 مىڭ تەڭگە كولەمىندە قارجىلاي قولداۋ كورسەتكەن. زاۋىت بۇگىندە جول شىعىنى ءۇشىن دە تولەم جاساپ وتىر. اۋداننىڭ الىس-جاقىندىعىنا قاراي ءار تونناسىنا 1 مىڭنان 5 مىڭ تەڭگەگە دەيىن تولەم قاراستىرىلعان.
ءقازىر قانت قىزىلشاسىنا ارنالعان اۋىل شارۋاشىلىعى تەحنيكالارىن سۋبسيديالاۋ كولەمىن 25%-تەن 50%-كە دەيىن ءوسىرۋ تۋرالى باستاما قاراستىرىلۋدا.