الەۋمەتتىك جەلىدەن سىرت كەلبەتى ءۇشىن بالا كەزىندە بۋللينگكە ۇشىراپ، كەيىن ەسەيىپ، ءوز ەرەكشەلىگىن قابىلداعان قىزداردىڭ موتيۆاسيالىق بلوگ باستاعانىن ءجيى بايقاعان بولارسىز؟ الايدا جۇرت سەنگەن بلوگ يەلەرىنىڭ جاساندى ينتەللەكت ارقىلى جاسالعان سيفرلىق وبراز ەكەنى بەلگىلى بولدى. Aqshamnews.kz ءتىلشىسى ءدال وسىنداي جي-بلوگەر جوباسىن ويلاپ تاپقان قازاقستاندىق IT-مامانمەن تىلدەسىپ، جوبانىڭ قالاي تۋعانىن، يدەيانىڭ استارىنداعى ماقساتتى جانە بۇل فورماتتىڭ مەديا كەڭىستىكتەگى بولاشاعىن سۇراپ ءبىلدى.
جي بلوگتار نەگە جيىلەدى؟
Instagram جانە TikTok پلاتفورمالارىندا ەرەكشە كەلبەتتى قىزداردىڭ بلوگ باستاعانىن ءجيى بايقاۋعا بولادى. ولاردىڭ كوبىنىڭ سەناريى ۇقساس. ولار بالا كەزىندە سىرت بەينەسى ءۇشىن بۋللينگكە ۇشىراپ، ءقازىر سول جاعدايدى قابىلداپ، كەرىسىنشە ەل الدىنا شىعۋدى ءجون ساناعاندارىن جاريالايدى.
سولاردىڭ ءبىرى - aileen_blog اتتى پاراقشا. ءدال وسىنداي جۇيەمەن وقيعاسىن بولىسكەن ۆيدەو جەلىدە بىرنەشە ميلليون قارالىم جيناپ، بار-جوعى ءتورت كۇندە پاراقشاعا 22 مىڭنان اسا جازىلۋشى تىركەلگەن. الايدا كەيىن ءايليننىڭ وبرازى شىنايى ادام ەمەس ەكەنى بەلگىلى بولدى. تانىمال اككاۋنتتى الەكسەي ەسىمدى قازاقستاندىق جاساندى ينتەللەكت كومەگىمەن ەكسپەريمەنت رەتىندە جاساپ شىققانىن مويىندادى.
ءقازىر بەلگىلى ءبىر سەبەپتەرمەن ءايليننىڭ Instagram-پاراقشاسى تەكسەرىستە.
بيزنەسكە ارنالعان جي-دەن مەدياجوباعا دەيىن
جي ارقىلى بلوگ جۇرگىزۋ جوباسىن وسكەمەندىك الەكسەي ەسىمدى ايتي مامانى باستاعان. ول جاساندى ينتەللەكت سالاسىنا ماركەتينگتەن ەمەس، اۆتوماتتاندىرۋ مەن بيزنەس-پروسەستەرگە جي ەنگىزۋ باعىتىنان كەلگەن. كومانداسى ەكى جىلعا جۋىق ۋاقىت بويى كومپانيالارعا ارنالعان اسسيستەنتتەر، اۆتوماتتاندىرىلعان جۇيەلەر مەن گەنەراتيۆتى مودەلدەرگە نەگىزدەلگەن كونتەنت-سەرۆيستەردى جاساپ كەلەدى.
"جاساندى ينتەللەكت اشىق نارىققا ەنگەن العاشقى كەزەڭنەن باستاپ-اق، بۇل تەحنولوگيانىڭ ويىنشىق ەمەس، ناقتى بيزنەس-قۇرال رەتىندە قولدانا باستادىق. كەيىن بۇل تاجىريبە ءجي-دى تەك قىزمەت رەتىندە ەمەس، دەربەس مەدياونىم رەتىندە زەرتتەۋگە الىپ كەلدى"، - دەيدى ول تىلشىگە بەرگەن سۇحباتىندا.
جي-بلوگەر يدەياسى قالاي تۋدى؟
جي-بلوگەر جاساۋ يدەياسى نەگىزگى قىزمەتتىڭ لوگيكالىق جالعاسىنا اينالعان. الەكسەيدىڭ ايتۋىنشا، بۇل ءبىر جاعىنان ناقتى جوسپارلانعان جوبا بولسا، ەكىنشى جاعىنان - نارىق ءالى تولىق قالىپتاسپاعاندىقتان قىزىق تاجىريبە بولعان.
"شەتەلدە مۇنداي جوبالار بۇرىننان بار بولعانىمەن، قازاقستاندىق جانە تمد اۋديتورياسىنا بەيىمدەلگەن فورمات جوقتىڭ قاسى ەدى. سوندىقتان ۆيزۋال، مادەني كود، اۋديتوريا تالعامىن ەسكەرە وتىرىپ، فورماتتى جەرگىلىكتى كونتەكسكە بەيىمدەدىك. ناتيجەسىندە جوبا تەز ارادا سۇرانىسقا يە بولعان. ءتىپتى قارالىم سانى مەن قىزىعۋشىلىقتىڭ كوبىن بايقاعان بىرنەشە بيزنەس يەلەرى، جارناما بويىنشا ۇسىنىس تا تاستادى"، - دەيدى ول.
cۋرەت: instagram.com/alexcroiss
جوبا اۆتورى قولدانىلاتىن قۇرالداردىڭ بارلىعى بۇگىنگى كۇنى كوپشىلىككە قولجەتىمدى ەكەنىن ايتادى. الايدا نەگىزگى ايىرماشىلىق - تەحنولوگيانى قالاي پايدالانۋىندا.
"ءبىر قۇرال ءبىر ادامدا جاساندى، سۋىق كونتەنت بەرسە، ەكىنشىسىندە ەموسيا تۋدىراتىن ءتىرى وبرازعا اينالۋى مۇمكىن. سوندىقتان بۇل جوبادا باستى قۇندىلىق - تاجىريبە، سەناريي، ۆيزۋالدىق لوگيكا مەن اۋديتوريا پسيحولوگياسىن ءتۇسىنۋ"، - دەپ قوستى الەكسەي.
جوبانى ىسكە قوسۋ شامامەن ءبىر اپتاعا سوزىلعان، ونىڭ باسىم بولىگى يدەيانى ويلاستىرۋ مەن گيپوتەزالاردى تەكسەرۋگە كەتكەن.
جي-بلوگەرلەر ينفليۋەنسەرلەردى الماستىرا الا ما؟
اۆتوردىڭ پىكىرىنشە، جي-بلوگەرلەر ءتىرى ادامداردى ىعىستىرمايدى، كەرىسىنشە مەدياكەڭىستىكتى كەڭەيتەدى.
بۇل - جاڭا فورمات، جاڭا تاجىريبە جانە جاڭا اۋديتوريا. كەي ادامدار ءۇشىن سيفرلىق مودەل - ءوز ويى مەن شىعارماشىلىعىن ءقاۋىپسىز تۇردە كورسەتۋ مۇمكىندىگى. ول جەكە تۇلعاعا قاتىستى قىسىمسىز، قورقىنىشسىز ەكسپەريمەنت جاساۋعا جول اشادى. سوندىقتان جي-بلوگەرلەردى باسەكەلەس ەمەس، مەديانارىقتاعى جاڭا نيشا رەتىندە قابىلداعان ءجون"، - دەدى مامان.
cۋرەت: instagram.com/aileen_blog
بۇگىندە جوبا نەگىزىنەن جارناما ارقىلى تابىس تاۋىپ وتىر. بولاشاقتا سيفرلىق مودەلدەر دە كادىمگى بلوگەرلەر سەكىلدى مەنەدجمەنتى، ستراتەگياسى بار تۇراقتى مەدياونىمگە اينالۋى مۇمكىن.