الماتى قالاسىنىڭ پوليسيا دەپارتامەنتىندە جۋرناليستەر مەن بلوگەرلىك قاۋىمداستىق وكىلدەرىمەن كەزدەسۋ ءوتتى، - دەپ حابارلايدى Aqshamnews.kz
باسقوسۋدىڭ نەگىزگى وزەگى – الداعى جوسپارلار، كوممۋنيكاسيالىق ستراتەگيانى دامىتۋ جانە قوعاممەن ءوزارا ءىس-قيمىلدىڭ جاڭا فورماتتارى. الماتى قالاسى پد باستىعى ايدىن كابدۋلدينوۆ ءوز سوزىندە الماتى قالالىق پد-نىڭ اقپاراتتىق ساياساتى كوپتەگەن جىلدار بويى باسىم باعىتتاردىڭ ءبىرى رەتىندە جۇيەلى تۇردە قالىپتاسىپ كەلە جاتقانىن اتاپ ءوتتى.
– بەلگىلەنگەن باعىت ساقتالىپ قانا قويماي، ودان ءارى كۇشەيتىلەدى. باسىمدىقتار قاتارىندا – زاماناۋي كوممۋنيكاسيا قۇرالدارىن دامىتۋ، الەۋمەتتىك جەلىلەردەگى بەلسەندى جۇمىس، پروفيلاكتيكالىق جانە ءتۇسىندىرۋ جوبالارى، بالالار قاۋىپسىزدىگىنە، جول قاۋىپسىزدىگىنە ەرەكشە نازار اۋدارۋ، الاياقتىق پەن ەسىرتكى قىلمىسىنا قارسى كۇرەس بار، – دەدى ايدىن كابدۋلدينوۆ.
كەزدەسۋدىڭ جەكە ءبىر بولىگى كوممۋنيكاسيالىق ستراتەگياعا ارنالدى. ول اشىقتىق، جەدەلدىك جانە قولجەتىمدىلىك قاعيداتتارىنا نەگىزدەلگەن. پوليسيانىڭ مىندەتى – تەك وقيعالار تۋرالى حابارلاۋ ەمەس، سونىمەن قاتار ءتۇسىندىرۋ، الدىن الۋ جانە ازاماتتارعا قاۋىپسىزدىك ماسەلەلەرىندە دۇرىس باعدار بەرۋگە كومەكتەسۋ. كەزدەسۋ قاتىسۋشىلارى قۇقىق بۇزۋشىلىقتاردىڭ الدىن الۋ جانە پوليسياعا دەگەن قوعامدىق سەنىمدى نىعايتۋ ىسىندە بۇقارالىق اقپارات قۇرالدارى مەن بلوگەرلەرمەن سەرىكتەستىكتىڭ ماڭىزىن اتاپ ءوتتى.
– الدا – جاڭا جوبالار، تىڭ فورماتتار مەن يدەيالار بار. نەگىزگى ماقسات – پوليسيانى حالىققا ودان ءارى جاقىنداتىپ، قوعاممەن تۇراقتى ءارى سەنىمدى ديالوگ ورناتۋ، – دەپ تۇيىندەدى ايدىن كابدۋلدينوۆ.