1 قاڭتاردان باستاپ مىندەتتى الەۋمەتتىك مەديسينالىق ساقتاندىرۋ (ءمامس) پاكەتى كەڭەيتىلدى.
ەندى ءبىرقاتار سوزىلمالى اۋرۋ وسى جۇيە اياسىندا كورسەتىلەتىن مەديسينالىق قىزمەتتەر قاتارىنا ەنگىزىلدى. بۇل تۋرالى الەۋمەتتىك مەديسينالىق ساقتاندىرۋ قورى ءمالىم ەتتى، - دەپ حابارلايدى Aqshamnews.kz.
اتاپ ايتقاندا، ءمامس پاكەتى قانت ديابەتى، بالالاردىڭ سەرەبرالدى سال اۋرۋى، ريەۆماتيزم، دانەكەر تىندەرىنىڭ جۇيەلى زاقىمدانۋى سياقتى اۋرۋلاردى قامتيدى.
وسىلايشا، ءمامس الەۋمەتتىك ماڭىزى بار 11 اۋرۋدان باسقا سوزىلمالى دەرتتەردىڭ باسىم بولىگىن وتەيدى. ال اتالعان 11 اۋرۋ تەگىن مەديسينالىق كومەكتىڭ كەپىلدىك بەرىلگەن كولەمى (تمككك) اياسىندا قارجىلاندىرىلادى. ولاردىڭ قاتارىندا تۋبەركۋلەز، ايتۆ، قاتەرلى ىسىكتەر، سوزىلمالى ۆيرۋستى گەپاتيتتەر مەن باۋىر سيرروزى، پسيحيكالىق بۇزىلىستار، ورفاندىق اۋرۋلار، جۇيكە جۇيەسىنىڭ دەگەنەراتيۆتى اۋرۋلارى، ورتالىق جۇيكە جۇيەسىنىڭ دەميەلينيزاسيالىق سىرقاتتارى، ەپيلەپسيا، جەدەل ميوكارد ينفاركتى (العاشقى 6 اي)، ينسۋلت (1 جىل ىشىندە) بار.
ءبىرىڭعاي پاكەتتىڭ كەڭەيۋى الەۋمەتتىك ماڭىزى بار اۋرۋلاردى ەرتە انىقتاۋ كەپىلدىكتەرىن كۇشەيتۋگە مۇمكىندىك بەرەدى. اتاپ ايتقاندا، ونكولوگيالىق سكرينينگتەر ساقتاندىرۋ مارتەبەسىنە قاراماستان قازاقستاننىڭ بارلىق ازاماتىنا قولجەتىمدى بولادى.
ءقازىر تمككك اياسىندا تەك تۋبەركۋلەز بەن ايتۆ-ينفەكسياسىن انىقتاۋ قاراستىرىلعان، ال باسقا الەۋمەتتىك ماڭىزى بار اۋرۋلاردى دياگنوستيكالاۋ ءمامس ەسەبىنەن جۇرگىزىلەدى.
سونىمەن قاتار ساقتاندىرىلماعان ازاماتتار دا بازالىق مەديسينالىق قىزمەتتەر پاكەتىن پايدالانا الادى. وعان مىنالار كىرەدى:
• ەمحانالارعا العاشقى جۇگىنۋ؛
• ۆاكسيناسيا جانە ونكولوگيالىق سكرينينگتەر؛
• الەۋمەتتىك ماڭىزى بار اۋرۋلارعا كۇدىك تۋىنداعان كەزدەگى دياگنوستيكا؛
• جەدەل جاردەم قىزمەتى؛
• ومىرىنە ءقاۋىپ توندىرەتىن جاعدايلارداعى شۇعىل مەديسينالىق كومەك؛
• بارلىق الەۋمەتتىك ماڭىزى بار اۋرۋ بويىنشا دياگنوستيكا، ەمدەۋ، الدىن الۋ جانە تەگىن دارى-دارمەكپەن قامتاماسىز ەتۋ؛
• جۇقپالى اۋرۋلار كەزىندە مەديسينالىق كومەك؛
• قان پرەپاراتتارىمەن قامتاماسىز ەتۋ؛
• پاللياتيۆتىك كومەك جانە اۋىر ناۋقاستارعا ۇزاق مەرزىمدى كۇتىم.
ونكوسكرينينگتەردىڭ بارشاعا قولجەتىمدى بولۋى قاتەرلى ىسىكتەردى ەرتە كەزەڭدە انىقتاپ، ءتيىمدى ەم جۇرگىزۋگە مۇمكىندىك بەرەدى.
بارلىق ساقتاندىرىلعان ازامات بۇرىنعىداي تەگىن ەم الىپ، دارىگەر كەڭەسىنە جۇگىنىپ، قاجەتتى دارى-دارمەكتەرمەن قامتاماسىز ەتىلەدى. قازىرگى تاڭدا 12 ميلليوننان استام ادام جەڭىلدىكتى ساناتقا جاتادى، ولاردىڭ ساقتاندىرۋ جارناسىن مەملەكەت تولەيدى.
سونىمەن قاتار 2026 جىلعى 1 قاڭتاردان باستاپ ومىرلىك قيىن جاعدايعا تاپ بولعان شامامەن 1 ميلليون ازامات جەرگىلىكتى اتقارۋشى ورگاندار ەسەبىنەن ساقتاندىرىلادى.
ازاماتتار «D» نەمەسە «E» ساناتىنا جاتاتىنىن ءبىلۋ ءۇشىن تىركەلگەن ەمحاناسىنا جۇگىنۋى قاجەت.
ساقتاندىرىلعان مارتەبە تەگىن تالداۋلاردان وتۋگە، دياگنوستيكاعا، دارىگەر كەڭەسىنە، جوسپارلى وپەراسيالارعا، ەمدەلۋگە جانە وڭالتۋ شارالارىنا قول جەتكىزۋگە مۇمكىندىك بەرەدى.
ءوز مارتەبەڭىزدى تومەندەگى قۇرالدار ارقىلى تەكسەرۋگە بولادى:
• Telegram-داعى SaqtandyryBot؛ (https://t.me/SaqtandyryBot)؛
• ءامسق رەسمي سايتى (https://msqory.kz/ru/naseleniyu/uznat-status-kalkulyator-osms/uznat-status-zastrakhovannosti/)؛
• Qoldau 24/7 ءموبيلدى قوسىمشاسى؛
• eGov.kz پورتالى نەمەسە eGov mobile قوسىمشاسى؛
• كەيبىر ەكىنشى دەڭگەيلى بانكتەردىڭ ءموبيلدى قوسىمشالارى.