سپورتتىق-بۇقارالىق شارالار مەن سپارتاكيادالار وتكىزۋگە دە نازار اۋدارىلادى
ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن كەڭەستە دەنە تاربيەسى جانە سپورتتى، سونداي-اق تۋريزم سالاسىن دامىتۋدىڭ 2023-2029 جىلدارعا ارنالعان تۇجىرىمدامالارىنىڭ جوبالارى قارالدى، دەپ حابارلايدى Almaty-akshamy.kz.
ق ر مادەنيەت جانە سپورت ءمينيسترى اسحات ورالوۆ تۇجىرىمدامادا ازاماتتاردى، ونىڭ ىشىندە مۇگەدەكتىگى بار ادامداردى دەنە تاربيەسىمەن جانە سپورتپەن جۇيەلى تۇردە شۇعىلدانۋعا باۋلۋ، جوعارى كاسىبي سپورتتىق رەزەرۆتى قالىپتاستىرۋ جانە جوعارى جەتىستىكتەر سپورتىن دامىتۋ جونىندەگى شارالار قاراستىرىلعانىن باياندادى.
اتاپ ايتقاندا، قالالاردا قولجەتىمدى جەرلەردەن جاڭا سپورتتىق ينفراقۇرىلىمدىق نىسانداردى (جۇگىرۋ جانە ۆەلوسيپەد جولدارى، سپورتتىق الاڭدار)، وڭىرلەردە بۇقارالىق سپورت ورتالىقتارى مەن اۋىلدىق جەرلەردە مودۋلدىك سپورت عيماراتتارىن سالۋ جوسپارلانىپ وتىر. سونداي-اق قاتىسۋعا نيەت بىلدىرۋشىلەردى كەڭىنەن تارتىپ جانە وتكىزىلۋ كەستەسىن مەديا كەڭىستىكتە حابارلاي وتىرىپ، سپورتتىق-بۇقارالىق شارالار مەن سپارتاكيادالار وتكىزۋگە دە نازار اۋدارىلاتىن بولادى.
«ءقازىر كوپتەگەن قالالاردا ۇيلەردىڭ اۋلالارىندا بالالار مەن ەرەسەكتەر دەنە تاربيەسىمەن شۇعىلدانا الاتىن سپورت الاڭدارى پايدا بولىپ جاتىر. بۇل – ەل ىشىندە كەڭىنەن تارالىپ جاتقان جاقسى تاجىريبە. ءبىز بازالىق سپورتتى بارىنە بىردەي قولجەتىمدى ەتۋ ءۇشىن وسىنداي عيماراتتار تۇرعىزۋدى جالعاستىرا بەرۋىمىز كەرەك»، — دەدى ءاليحان سمايىلوۆ.
كەڭەستە اتلەتشىلەردى دايىنداۋدىڭ زاماناۋي ادىستەرىن ەنگىزۋ جانە سپورتتىق مەديسينانىڭ ساپاسىن جاقسارتۋ جوسپارلانىپ وتىرعانى دا اتاپ كورسەتىلدى. بۇل جۇمىس الداعى جىلدارى پاريج-2024 جانە ميلان-2026 وليمپيادا ويىندارىنا دايىندىق باعدارلامالارى اياسىندا جۇرگىزىلەتىن بولادى.
تۋريزم سالاسىن دامىتۋعا قاتىستى رەسپۋبليكانىڭ نەگىزگى 10 تۋردەستانيسياسىندا ينفراقۇرىلىمداردى جاڭعىرتۋ، سەرۆيس ساپاسىن ارتتىرۋ، حالىقارالىق ارەنادا ەلىمىزدىڭ تۋريستىك الەۋەتىن ىلگەرلەتۋ جانە ت. ب. شارالاردى ىسكە اسىرۋ كوزدەلىپ وتىر،
اتاپ ايتقاندا، بالقاش، قاپشاعاي، الاكول جانە باياناۋىل كۋرورتتىق ايماقتارىنا اپاراتىن اۆتوجولداردى سالۋ جانە قايتا قۇرىلىمداۋ، دەمالىس ايماقتارىن موبيلدىك بايلانىسپەن 100% قامتۋ، شۋچە-بۋراباي كۋرورتتىق ايماعىندا قاجەتتى ينجەنەرلىك جەلىلەر جۇرگىزۋ، سۋ قويمالارىندا قوسىمشا سۋدا قۇتقارۋ ستانسيالارىن سالۋ جانە ت. ب. ءىس-شارالار قاراستىرىلىپ وتىر.
سونىمەن قاتار جاڭا اۋە باعىتتارىن اشۋ، تۋريستىك قىزمەتتەردى سيفرلاندىرۋ، قوناق ءۇي بيزنەسىندە جانە سالانىڭ باسقا سەكتورلارىندا ستاندارتتاردى ارتتىرۋ جونىندە جۇمىس جۇرگىزىلەدى.
2030 جىلعا دەيىن بارلىق شارالاردى ىسكە اسىرۋدىڭ ناتيجەسىندە ىشكى تۋريستەردىڭ سانىن 11 ملن ادامعا دەيىن، شەتەلدىك تۋريستەردى – 4 ملن ادامعا دەيىن، سالادا جۇمىسپەن قامتۋدى – 800 مىڭ ادامعا دەيىن ارتتىرۋ، سونداي-اق دۇنيەجۇزىلىك ەكونوميكالىق فورۋمنىڭ رەيتينگىسىنە سايكەس ءتۋريزمدى دامىتۋ بويىنشا قازاقستاندى الەمنىڭ ۇزدىك 50 ەلىنىڭ قاتارىنا قوسۋ كوزدەلىپ وتىر.