ءجاسوسپىرىم مەكەمە ىشىندەگى استىرتىن ارەكەتتەردى ايتىپ بەردى
“يمامداردى جولاتپاي، جۇما ناماز جابىق تۇردە وقىلدى”. الماتىداعى پانسيوناتتاردىڭ بىرىندە تۇرعان ءجاسوسپىرىم مەكەمە ىشىندەگى استىرتىن ارەكەتتەردى جايىپ سالدى. ونىڭ ايتۋىنشا، قايىرىمدىلىق قورىنا قارايتىن جاتاقحانادا ءتىپتى شەتەل ازاماتتارى ءدىني تاقىرىپتا ەمتيحان تاپسىرتقان. ەستە بولسا، بۇعان دەيىن اقپارات كوزدەرىندە قۇزىرلى ورگانداردىڭ ءدال وسىنداي بالالار پانسيوناتىنا قاتىستى قىلمىستىق ءىس تەرگەپ جاتقانى ايتىلعان ەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
“ول جاققا بارعالى يمامداردى كورگەن جوقپىن”، – دەيدى ءجاسوسپىرىم.
اتىن جاريا ەتۋ تۇرماق، ءتۇرىن كورسەتۋگە قورىققان ءجاسوسپىرىم داۋسىن دا وزگەرتۋدى سۇرادى. الايدا ول پانسيونات قىزمەتكەرلەرىنىڭ جاسىرىن ارەكەتىن جاسىرماي ايتىپ بەردى. سوزىنە سەنسەك، وزدەرىن "ۇستاز" دەگىزگەندەر جابىق ءارى جۇيەلى تۇردە ءدىني جورالعىلار وتكىزگەن. ءتىپتى وزگە تىلدە ءدارىس بەرگەن كەزدەرى دە بولىپتى.
"سوسىن ۇستازدىڭ ءوزى ءبىر سوزىندە ايتقان. "ءبىز زاڭسىز ءجۇرىپ جاتىرمىز" دەدى. جۇما كۇنى تەكسەرىس كەلدى. سول كۇنى جۇما نامازى بولمادى. كىتاپتاردىڭ ءبارىن تىعىپ تاستادى. بىزگە الدىن الا ەسكەرتىپ قويدى. "تەكسەرىس كەلسە، كىتاپتاردى سورەگە سالىپ تاستاڭدار. ءبىر كىتاپ بولماسىن” دەپ”، – دەيدى ءجاسوسپىرىم.
ءجاسوسپىرىم "جاعدايدى بىردەن اتا-اناما ايتۋعا و باستا باتىلىم بارمادى" دەيدى. الايدا كەيىن شىندىقتى جاسىرماي، ءىس ناسىرعا شاپپاي تۇرعاندا مەكەمەدەن ءبىرجولا كەتۋدى ءجون ساناپتى. "پانسيوناتتىڭ بالالاردى شەتەلگە جىبەرەتىنى تۋرالى ايتىلعاندا" سەنبەدىك. ءبىراق مىنا ازاماتتىڭ ايتۋى بويىنشا، ونىڭ تۇڭعىش ۇلى دا، ءتىپتى ءوزى دە "ۇستازداردىڭ" سوزىنە ەرىپ، بالاسىن جات ەلگە اتتاندىرىپتى.
“بالالار ۇشاققا وتىرعاننان كەيىن مۇنداعىلار بىردەن باسىن الا قاشتى. باسىندا بالامدى "ەڭ مىقتى ۋنيۆەرسيتەتكە وقۋعا تۇسىرەمىز" دەپ سەندىردى. وعان مەن قۋانىپ، ارام ويىم بولمادى. كەيىن ۇلىم دا، بىرگە كەتكەن 70 بالا دا ۋنيۆەرسيتەتتە ەمەس، مەدرەسە اتىن جامىلعان مەكەمەدە تۇرعانى بەلگىلى بولدى. وندا باسكوز بولعان "ۇستازسىماقتار" ولارعا كۇش قولدانعان”، – دەيدى اتا-انا.
قۇزىرلى ورگاندار دەرەگىنشە، مۇنداي پانسيوناتتار الماتىدا عانا ەمەس، ەلدىڭ وزگە وڭىرلەرىندە دە بار. جالپى سانى 90-نان اسادى جانە بارلىعى ءبىر قايىرىمدىلىق قورىنا قارايدى. بۇعان دەيىن ولار مۇفتياتپەن مەموراندۋم جاساسۋ ارقىلى جۇمىس ىستەگەن.
“ءدىن بويىنشا، زاڭ بويىنشا زاڭسىزدىقتار تابىلىپ جاتقاننان كەيىن، قمدب "جىبەك جولى" قايىرىمدىلىق مەكەمەسىمەن جاساسقان مەموراندۋمدى توقتاتتى”، – دەدى قمدب الماتى قالاسى بويىنشا ءپاتۋا باعىتىنا جاۋاپتى مامان ەلبەك تاسبولات ۇلى.
ءدىنتانۋشىنىڭ ايتۋىنشا، "مەدرەسە" اتىن جامىلعاندار يمامداردى جولاتپاي، ءۇي ىشىنەن ءۇي تىگىپ، ءوز ەرەجەسىمەن ءجۇرۋىنىڭ ءوزى - قوعامعا تونگەن ءقاۋىپ.
“دەر كەزىندە مىنا دەرتتى ەمدەمەسە، "سۇلەيمەنشىلەردى" قولعا الماعان جاعدايدا، ولار دا كۇش جيناعان كەزدە شىنايى بەتپەردەلەرىن كورسەتەدى. بىرىنشىدەن، ءدىني باسقارماعا باعىنباعانى ۇلكەن ءقاۋىپ توندىرەدى. ەكىنشىدەن، وزدەرىنىڭ جاسىرىن قۇلشىلىقتارى شاريعاتقا قايشى بولعاندىقتان، ول دا ءبىر ءقاۋىپ”، – دەدى تەولوگ رۋسلان قايىرگەلدى.
قاڭتار ايىندا الەۋمەتتىك جەلىدە تاراعان بەينەجازباعا ءتارتىپ ساقشىلارىنىڭ پانسيوناتتار ماڭىندا جۇرگەنى تاسپالانعان. پوليسيا دەپارتامەنتىنىڭ وكىلدەرى سول كەزدە تەكسەرۋ جۇرگىزىلىپ، وقيعا ورنىنان "قازاقستاندا ەكسترەميستىك دەپ تانىلعان جانە تاراتۋعا تىيىم سالىنعان ماتەريالدار تابىلعانىن" حابارلادى.
“پانسيوناتتىڭ ىشىندە جاسوسپىرىمدەر زاڭسىز ءدىني جورالعىلار جانە ۇجىمدىق دۇعالارعا قاتىستىرىلدى. ال كەلىسپەگەن كىشكەنتاي بالالارعا قىسىم كورسەتكەن. تاماق، سۋ بەرمەي، كەي كەزدە قول كوتەرگەن. وسى دەرەكتەر بەلگىلى بولعاننان كەيىن پوليسيا تاراپىنان ىس-ارەكەت جاسالدى. قازىرگى تاڭدا قىلمىستىق ءىس تەرگەۋ باسقارماسىندا”، – دەدى پوليسيا دەپارتامەنتىنىڭ رەسمي وكىلى سالتانات ازىربەك.
پوليسيا وزگە اقپار تەرگەۋ مۇددەسىنە ساي جاريا ەتۋگە جاتپايتىنىن مالىمدەدى. بۇگىندە ەگجەي-تەگجەيلى تەكسەرۋ جۇمىستارى جۇرگىزىلىپ جاتقانىن عانا ايتتى.