ەلەنا رىباكينا اقش چەمپيونىن جولدان تايدىردى

قارسىلاستار بۇعان دەيىن ءبىر رەت كەزدەسكەن

قازاقستاننىڭ ءبىرىنشى، الەمنىڭ 10-راكەتكاسى ەلەنا رىباكينا دۋباي WTA 1000 ءتۋرنيرىنىڭ ەكىنشى اينالىمىنا ءوتتى، دەپ حابارلايدى Almaty-akshamy.kz.

جارىستىڭ 9-راكەتكاسى بولىپ تىركەلگەن قازاقستاندىق تەننيسشى العاشقى اينالىمدا قازىرگى كەزدە دۇنيەجۇزىلىك رەيتينگتە 36-ورىندا تۇرعان كانادالىق، 2019 جىلعى اقش چەمپيونى بيانكا اندرەەسكۋمەن شەبەرلىك سىناستى.

وسىعان دەيىن قارسىلاستار ءبىر رەت كەزدەسىپ، وتكەن جىلى ە.رىباكينا ۋيمبلدوندا ب.اندرەەسكۋدى 6:4 7:6 (7:5) ەسەبىمەن ۇتقان ەدى. وعان قوسا بيىل كانادالىق سپورتشى ابۋ-دابيدە تاعى ءبىر قازاقستاندىق يۋليا پۋتينسيەۆاعا جول بەرگەن-دى.

بۇل جولى ەلەنا ماچ باسىندا برەيكپەن العا كەتتى – 3:0. پارتيا بىتكەنشە سول باسىمدىلىعىن ساقتادى – 6:3.

ەسەسىنە ەكىنشىسىندە ب.اندرەەسكۋ برەيكپەن العا شىقتى – 3:1. دەگەنمەن قازاقستاندىق تەننيسشى تارازى باسىن تەڭەستىردى – 4:4. تاعى ءبىر برەيك – 5:4. سودان كەيىن ماچقا دوپ بەرگەندە، ءوز مۇمكىندىگىن جىبەرگەن جوق – 6:4.

ساعات جارىمنان استام ۋاقىتقا سوزىلعان باسەكە بارىسىندا ە.رىباكينا 6 ەيس جاساپ، 7 برەيك-پوينتتىڭ تورتەۋىن پايدالاندى. قارسىلاسى 2 ەيس، 2 برەيكپەن (6 برەيك-پوينت) كوزگە ءتۇستى.

ە.رىباكينا ەكىنشى اينالىمدا الەمنىڭ 26-راكەتكاسى، چەحيالىق ماريا بوۋزكوۆامەن كەزدەسەدى. ول باستاپقى كەزدەسۋىندە 2020 جىلعى اۋستراليا چەمپيونى، امەريكالىق سوفيا كەنيندى وڭاي ۇتتى – 6:1، 6:1.

ەسكە سالا كەتەيىك، بۇدان بۇرىن ەلەنا رىباكينانىڭ جۇپتىق سىندا دۋباي ءتۋرنيرىن ءساتتى باستاعانىن جازعان بولاتىنبىز.