"دومبىرانىڭ ءۇنىن ەستىپ وزدەرى كەلدى". "رەال ءمادريدتىڭ" رەسمي پاراقشاسىنا شىققان دومبىرالى جىگىت وقيعاسىن ءبولىستى

ايگىلى كورولدىك كلۋب "رەال مادريد" الماتىعا كەلىپ، جەلىدە قالا تۋرالى بىرنەشە پوستتار جاريالادى. ولاردىڭ اراسىندا دومبىرامەن ءان شىرقاعان قازاقستاندىق بوزبالانى دا بايقاۋعا بولادى. 200 ميلليونعا جۋىق وقىرمانى بار، الەمنىڭ 15 دۇركىن ۇزدىك كلۋبى اتانعان "رەالدىڭ" پاراقشاسىندا توبە كورسەتكەن جىگىت كىم؟ اqshamnews.kz ءتىلشىسى انىقتادى.

"ساكەن سەيفۋلليننىڭ ءانىن يسپاندىقتارعا ماقتانىشپەن ورىنداپ بەردىم"

تانىمال كلۋبتىڭ پاراقشاسىنان كوزگە تۇسكەن جىگىتتىڭ ەسىمى - دامير سارمان. ول قىزىلوردا وبلىسى، جاڭاقورعان اۋدانىنىڭ تۋماسى. ءقازىر الماتىدا اباي اتىنداعى قازۇپۋ-دە مۋزىكالىق ءبىلىم بەرۋ ماماندىعى بويىنشا 4-كۋرستا ءبىلىم الىپ جاتىر. كوپتى شۋلاتقان جايت تۋرالى بىلايشا اڭىگمەلەپ بەردى. 

"سول كۇنى دوستارمەن ارالىق باقىلاۋعا دايىندالىپ جۇرگەنبىز. ساياباقتا كامەرا اسىنعان ادامدار كوزگە ءتۇستى. ارتىنشا بىلۋىمىزشە "رەال ءمادريدتىڭ" ۆيدەوگرافتارى ەكەن. دومبىرا تارتىپ تۇرعانىمىزعا توقتاپ، “اعىلشىن تىلىندە سويلەي الاسىزدار ما؟” دەپ سۇرادى. بىلگەنىمىزشە جاۋاپ بەرىپ، وتىنىشتەرى بويىنشا ءاندى ايتىپ بەردىك. كادرعا ەنەر-ەنبەسىمىز بەلگىسىز بولسا دا، ساكەن سەيفۋلليننىڭ "تاۋ ىشىندە" ءانىن يسپاندىقتارعا كوسىلە ورىنداپ بەردىم"، - دەدى ول. 

"پاراقشاعا سالاتىن كۇنى ساباقتان كەلىپ ۇيگە جايعاسقان كەزدە دوس بالام مەنى بەلگىلەپ جىبەرىپ جاتىر ەكەن. قاراسام "رەالدىڭ" پاراقشاسىندا ءجۇرمىن. قۋانىشىم ىشىمە سىيمادى. ءبىر كەزدە تانىستارىمنىڭ ءبارى ءبولىسىپ، رەاكسيا قالدىرىپ، مەنىمەن ماقتانىپ جاتتى. ارتىنشا دوستارىم "جۋساڭشى" دەپ قولقا سالىپ، سولاي ولارعا داستارحان دا جايىپ بەردىم"، - دەيدى دامير. 

"سۇيىكتى كلۋبىمنىڭ پاراقشاسىنان سۇيىكتى قالامدى كورەمىن دەپ كىم ويلاعان؟!"، "رەالدىڭ" رەسمي سايتى الماتىدان بەينەجازبا جاريالاعانىنا قۋانىشتىمىن، ماقتانامىن! مۇنىڭ ءبارى "قايراتتىڭ" ارقاسى، قازاقستان العاااا!"، - دەپ جازدى كوپشىلىك.