بيىل 3 قازاندا ساعات 15:00-دە الماتى مۋزەيىندە بەلگراد قالاسى مۋزەيىنىڭ «سەرب ايەلى: عاسىرلار توعىسىندا» اتتى كورمەسى اشىلادى. قوعامداعى ايەل مارتەبەسىن ايشىقتاپ، دارىپتەيتىن كورمە سەربيا تاريحى مەن مادەنيەتىنىڭ بىرەگەي مۇراسىمەن دە تانىستىرادى.
كورمەنىڭ اشىلۋ سالتاناتىنا سەربيانىڭ ءبىرىنشى حانىمى تامارا ۆۋچيچ پەن قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا قاتىسادى.
ەكسپوزيسيا سەربيانىڭ 7500 جىلعا جۋىق تاريحىن قامتيدى. كورمە كەلۋشىلەرگە سەرب قوعامىنداعى ايەلدىڭ ورنى مەن ءرولى قالاي وزگەرگەنى تۋرالى تىڭ تاريحي مالىمەتتەردى ۇسىنا وتىرىپ، ايگىلى سەرب سۋرەتشىلەرى، عالىمدارى، سپورتشىلارى مەن قوعام قايراتكەرلەرىنىڭ ءومىرى مەن جەتىستىكتەرىنەن سىر شەرتەدى.
ەكسپوزيسيادا بەلگراد قالاسى مۋزەيىنىڭ باي قورىنان الىنعان قۇندى جادىگەرلەر – ەجەلگى داۋىردەن بۇگىنگى كۇنگە دەيىنگى ارحەولوگيالىق ارتەفاكتىلەر، ەتنوگرافيالىق جادىگەرلەر، ساندىك-قولدانبالى ونەر تۋىندىلارى، سونداي-اق XIX عاسىرداعى سەرب ايەلدەرىنىڭ پورترەتتەرى ۇسىنىلادى. كورمەنى 2025 جىلدىڭ 15 قاراشاسىنا دەيىن كەلىپ تاماشالاۋعا بولادى.
بۇل حالىقارالىق جوبا – الماتى مەن بەلگراد اراسىنداعى مۋزەيارالىق ىنتىماقتاستىقتىڭ جالعاسى رەتىندە ۇيىمداستىرىلۋدا. 2024 جىلدىڭ جەلتوقسان ايىندا بەلگراد قالاسىندا حانشايىم ليۋبيسا سارايىندا الماتى مۋزەيىنىڭ «ۇلى دالانىڭ مادەني مۇراسى» حالىقارالىق كورمەسى جوعارى دەڭگەيدە وتكىزىلگەن ەدى.