1995 جىلدان بەرى 30 تامىز ەلىمىزدە كونستيتۋسيا كۇنى رەتىندە تويلانىپ كەلەدى.
اتا زاڭىمىزدىڭ 1-بابى بويىنشا قازاقستان – دەموكراتيالىق، زايىرلى، قۇقىقتىق جانە الەۋمەتتىك مەملەكەت. مەملەكەتتىڭ ەڭ قىمبات بايلىعى – ادام مەن ونىڭ ءومىرى، قۇقىعى مەن بوستاندىعى، دەپ حابارلايدى Almaty-akshamy.kz.
تاۋەلسىز قازاقستاننىڭ ءتول اتا زاڭىنىڭ تاريحى 1993 جىلدان باستالادى. وسى جىلى ەلىمىزدىڭ العاشقى كونستيتۋسياسى قابىلداندى. ءقازىر قولدانىپ جۇرگەن ەكىنشى كونستيتۋسيا 1995 جىلى قابىلداندى. قۇجاتتىڭ جوباسىن ازىرلەۋگە قازاقستاننىڭ زاڭ سالاسىنداعى ءىرى تۇلعالارى، ينتەللەكتۋال عالىمدار، ساياساتكەرلەر اتسالىستى.
تاۋەلسىزدىگىنىڭ 30 جىلىندا قازاقستان ءتۇرلى سىن-قاتەردەن ءوتىپ، دامۋدىڭ بىرنەشە كەزەڭىنەن ءوتتى. وسى ۋاقىتقا دەيىن كونستيتۋسيا 1998، 2007، 2011، 2017 جانە 2019 جىلدارى رەفورماعا تۇسكەن. 1998 جىلعى رەفورما اياسىندا قۇجاتتىڭ 19 بابىنا وزگەرىستەر مەن تولىقتىرۋلار ەنگىزىلدى. پرەزيدەنتتىڭ، سەنات پەن ءماجىلىس دەپۋتاتتارىنىڭ مەرزىمى مەن وكىلەتتىكتەرىنە قاتىستى ناقتىلاۋلار بولىپ، مەملەكەتتىك قىزمەتشىلەرگە قويىلاتىن جوعارعى جاس شەگى الىنىپ تاستالعان بولاتىن. ءماجىلىس دەپۋتاتتارىن پروپورسيونالدى وكىلدىك جۇيەسى بويىنشا پارتيالىق تىزىمدەر نەگىزىندە سايلاۋ تاجىريبەسى دە وسى 1998 جىلعى تۇزەتۋلەردەن كەيىن قولدانىسقا ەنە باستادى.
2007 جىلعى رەفورمالىق وزگەرىستەردىڭ قورىتىندىسى بويىنشا، پروپورسيونالدى سايلاۋ جۇيەسىنىڭ اياسى كەڭەيىپ، سونىڭ نەگىزىندە ۇكىمەت جاساقتاۋ ىسىنە پارتيالىق فراكسيالاردى ارالاستىرۋدىڭ تەتىگى ەنگىزىلدى. قازاقستان حالقى اسسامبلەياسى كونستيتۋسيالىق مارتەبەگە يە بولىپ، ءوز وكىلدەرىن بەلگىلەنگەن كۆوتا سانىنا قاراي پارلامەنت ماجىلىسىنە، سەناتىنا جىبەرە باستادى.
2011 جىلعى وزگەرىستە پرەزيدەنتتىڭ كەزەكتەن تىس سايلاۋىن تاعايىنداۋ مەن وتكىزۋدىڭ كونستيتۋسيالىق نەگىزدەرى قايتا بەلگىلەندى. 2017 جىلى كونستيتۋسيانىڭ 25 بابىنا 33 تۇزەتۋ ەنگىزىلدى. «قازاقستان-2050» ستراتەگياسى، بەس ينستيتۋسيونالدىق رەفورما ۇعىمدارى وسى رەفورمادان كەيىن ساياسي اينالىمعا شىقتى.