كۇنى كەشە World Boxing ۇيىمىنىڭ باسشىسى بولىپ تاعايىندالعان، قازاقستاننىڭ ۇلتتىق وليمپيادالىق كوميتەتتىڭ پرەزيدەنتى، ايگىلى بوكسشى گەنناديي گولوۆكين مانسابىنداعى جاڭا كەزەڭى تۋرالى وتاندىق باق-تىڭ بىرىنە اڭگىمەلەپ بەردى. تولىعىراق اqshamnews.kz ءتىلشىسىنىڭ ماتەريالىندا.
سيفرلاندىرۋ باعىتى سپورتقا قانشالىقتى كەرەك؟
گەنناديي گولوۆكين جاڭا قىزمەتى جايلى اسەرىن ءبولىستى. ونىڭ ايتۋىنشا، سيفرلاندىرۋ باعىتى سپورتقا دا قاجەت.
"سيفرلاندىرۋ باعىتى بوكسقا وتە قاجەت دەپ ەسەپتەيمىن. ويتكەنى مۇنداي جۇيەلەر باسقا سپورت تۇرلەرىندە دە قولدانىلادى. بۇرىنعى وليمپيادا ويىندارى مەن تۋرنيرلەر تاجىريبەسى كورسەتكەندەي، قاراپايىم كورەرمەن ءۇشىن ءبارى انىق، تۇسىنىكتى بولدى: ۇپاي قالاي ەسەپتەلەدى، ونىڭ سەبەبە نەدە ەكەنى - ءبارى كورىنىپ تۇرادى. رينگتە نە بولىپ جاتقانىن ءتۇسىنۋ بوكسقا دەگەن قىزىعۋشىلىقتى قايتارادى" دەدى ول.
سۋرەت: https://www.instagram.com/gggboxing/
"ءبىزدىڭ مىندەتىمىز - بوكستاعى جەمقورلىقتى ازايتۋ"
گولوۆكين سپورتتاعى، اسىرەسە بوكستاعى ادىلەتسىزدىك تۋرالى دا ايتا كەتتى. ول جەمقورلىق، جەڭىستى ساتىپ الۋ سىندى لاس دۇنيەلەردى تولىق جويىپ جىبەرۋدى تەك ارمانداۋعا بولاتىنىن باسا ايتتى.
"ادىلەتسىز كوزقاراست كەز كەلگەن سپورتتا بار. ءبىزدىڭ مىندەتىمىز – وسىنىڭ ءبارىن بارىنشا ازايتۋ. تولىق جويىپ جىبەرۋ تۋرالى تەك ارمانداۋعا بولادى. ادام فاكتورىن مۇلدە الىپ تاستاۋ مۇمكىن ەمەس. جاڭا جۇيەگە دە بەيىمدەلىپ العىسى كەلەتىندەر تابىلادى. ءبىراق جۇيە بارىنشا اشىق بولسا، بارلىق سپورتشى مەن كوماندالار ءبىر دەڭگەيدە، ءبىر جاعدايعا يە بولادى. ءبىز وزگەرىستەردى باقىلاپ، جاعدايدىڭ قالاي ءوربيتىنىن كورىپ، جاقسى جاعىنا وزگەرتۋ ءۇشىن ۇنەمى جۇمىس ىستەيتىن بولامىز"، - دەپ قوستى ول.
سونداي-اق، ول وسىنداي ادىلەتسىزدىكتەردەن قاشىپ كاسىپقوي بوكسقا اۋىسقانىن جەتكىزدى.
"ال وزىمە كەلسەك، ءيا، راسىندا مەن دە ءدال وسى نارسەلەردەن قاشىپ، كەزىندە كاسىپقوي بوكسقا كەتتىم. سول سەبەپتى ءقازىر قايتا ورالدىم. وسىنداي ادىلەتسىز، جەمقورلىق جاعداي تىم كوپ. بوكس – تەك رينگتەگى قارسىلاسپەن ەمەس، كەيدە بۇكىل جۇيەمەن كۇرەسەتىن سپورت"، - دەيدى گولوۆكين.
"مەن بۇل جەرگە شەنەۋنىك رەتىندە ەمەس، سپورتشى رەتىندە كەلدىم"
گەنناديي مىرزا، قوس قىزمەتتى (ۇوك پرەزيدەنتى جانە World Boxing ۇيىمىنىڭ باسشىسى قىزمەتى - ەسك.) قاتار الىپ ءجۇرۋدىڭ قيىن ەمەسىن جانە وسىنشا جاسىندا شابىتتى قايدان الاتىنىن دا اڭگىمەلەپ بەردى.
"ءقازىر مەنىمەن كوبى ساناسادى، مەن ونى تۇسىنەمىن. مەن جاي عانا "اتاعى بار بوكسشى" ەمەسپىن. حالىقارالىق تاجىريبەم، جاقسى رەپۋتاسيام دا بار. 15 جىلدان بەرى ءوز پروموۋتەرلىك كومپانيامدى جۇرگىزىپ كەلەمىن - مۇنىڭ ءبارى اسەر ەتەدى. ەڭ باستىسى - مەن بۇل جۇيەگە "شەنەۋنىك" رەتىندە ەمەس، سپورتشى رەتىندە كەلدىم. بىرەۋدىڭ تانىسى نەمەسە "اكە-كوكەمەن" قويىلعان ادام ەمەسپىن. ەڭ جوعارى دەڭگەيدەگى سپورتتا تالاي جىل ىستەگەن، تاجىريبەسى بار كاسىبي بوكسشى رەتىندە كەلدىم"، - دەيدى سپورتشى.
سونىمەن قاتار، گولوۆكين ۇوك-تەگى قىزمەتىن تاستاۋعا نيەتتى ەمەس ەكەنىن جەتكىزدى.
"ەڭ باستىسى – وسىنى ءبارى ءبىلسىنشى: مەن ۇوك-تەن كەتۋگە نيەتتەنىپ وتىرعان جوقپىن. قازاقستان – مەنىڭ وتانىم. مەن ونى حالىقارالىق دەڭگەيدە بارىنشا جوعارى دارەجەدە تانىستىرعىم كەلەدى. ءوز تانىمالدىلىعىمدى، بايلانىستارىمدى ەڭ الدىمەن ەلىمنىڭ سپورتتىق بەدەلى ءۇشىن قولدانامىن"، - دەدى ول.
سۋرەت: Reuters
وليمپياداداعى بوكس تاعدىرى جانە قوشتاسۋ جەكپە-جەگى قاشان؟
گەنناديي گولوۆكيننىڭ ايتۋىنشا، لوس-اندجەلەستەگى الداعى وليمپيادا ويىندارىندا بوكستى باعدارلاماداعى سپورت تۇرلەرىنىڭ قاتارىنان الىپ تاستاۋ تۋرالى ءسوز بولعان. سپورتتىڭ اينالاسىندا قۇقىقتىق ءارى ۇيىمدىق داۋلى ماسەلەلەر كوبەيگەن كەزدە حالىقارالىق وليمپيادالىق كوميتەت وعان سەنىم ارتىپ، "تارتىپكە كەلتىرۋگە كومەكتەسەدى" دەپ جاۋاپكەرشىلىكتى سوعان جۇكتەگەن، ال ول مۇنى ەل ءۇشىن دە، ءوزى ءۇشىن دە ۇلكەن قۇرمەت دەپ قابىلداعانىن ايتتى.
"حالىقارالىق وليمپيادالىق كوميتەت مەنىڭ كانديداتۋراما سەنىم ارتتى. «بۇل سالانى تارتىپكە كەلتىرۋگە كومەكتەسەدى» دەپ، جاۋاپكەرشىلىكتى ماعان جۇكتەدى. سول ءۇشىن ولارعا وتە ريزامىن"، - دەدى گولوۆكين.
سونىمەن بىرگە ول ونىڭ اتىن پايدالانىپ "حايپ" جاساعىسى كەلەتىندەرگە دە رەنىشىن جاسىرمايدى:
"مەن سپورتشىلارعا تۋعان ىنىلەرىمدەي قارايمىن، سوندىقتان ىشكى شابۋىلدار مەن ءۇشىن قوعامنىڭ دەرتى سياقتى. تانىمالمىن ەكەن دەپ، بىلگەنىڭدى ىستەۋگە بولمايدى"، – دەيدى ول.
ال قوشتاسۋ جەكپە-جەگىنە قاتىستى: "ەشقاشان “ەشقاشان” دەمە، ءبىراق ءبارىنىڭ ءوز ۋاقىتى بار"، – دەپ، رينگكە ورالۋ مۇمكىندىگىن اشىق قالدىرعانىمەن، ءقازىر باستى نازارىن رەفورمالار مەن بوكستىڭ بولاشاعىنا اۋدارىپ وتىرعانىن جەتكىزدى.