«الماتى مەكتەپتەرى» جوباسى اياسىندا قالامىزداعى مەكتەپكە دەيىنگى مەكەمەلەر مەن مەكتەپ باسشىلارى جاپونيا ەلىنە بارىپ، ارىپتەستەرىنىڭ تاجىريبەسىن ۇيرەنىپ قايتقان ەدى. ءقازىر سول تاجىرتبەنى قازاقستانعا بەيىمدەۋ مۇمكىندىگىن قاراستىرۋدى باستاپ تا كەتتى.
قالالىق ءبىلىم باسقارماسىنىڭ مالىمەتىنشە، كۇنشىعىس ەلىنە جاساعان ساپار بارىسىندا ءبىلىم بەرۋ سالاسىنداعى تاجىريبەنى، اسىرەسە مەكتەپكە دەيىنگى جانە مەكتەپتەگى ءبىلىم بەرۋ ادىستەرىن، يننوۆاسيالىق پەداگوگيكالىق تاسىلدەردى جانە وقۋ ۇدەرىسىن ۇيىمداستىرۋدى زەرتتەۋ ماقساتىندا ۇيىمداستىرىلعان. توپ قۇرامىنا الماتى قالاسىندا يننوۆاسيالىق ءبىلىم بەرۋ باعدارلامالارىن ەنگىزۋ بويىنشا جۇمىس ىستەيتىن ماماندار دا كىردى.
بوستاندىق اۋداندىق ءبىلىم ءبولىمىنىڭ باسشىسى ايگۇل قاسىمبەكتىڭ ايتۋىنشا، ءىسساپار باعدارلاماسى ءبىلىم بەرۋ مەكەمەلەرىنە (بالاباقشا، مەكتەپتەر) بارۋدى، جاپوندىق پەداگوگتارمەن، پەداگوگيكالىق جوعارى وقۋ ورىندارىنىڭ وقىتۋشىلارىمەن جانە ءبىلىم مينيسترلىكتەرىنىڭ وكىلدەرىمەن سەمينارلار مەن ترەنينگتەرگە قاتىسۋدى، سونداي-اق ارىپتەستەرمەن تاجىريبە الماسۋدى قامتىعان.
«ءىس-شارانىڭ باستى قۇندىلىعى – جاپون ءبىلىم بەرۋ جۇيەسىنىڭ ەڭ ۇزدىك تاجىريبەلەرىن زەرتتەۋ. بۇل جۇيە ءوزىنىڭ تيىمدىلىگىمەن، تارتىپكە، ۇجىمدىق جۇمىسقا جانە بالالاردا تۇراقتى داعدىلاردى قالىپتاستىرۋعا باسا نازار اۋدارۋىمەن تانىمال. ءبىز تەوريالىق تاسىلدەردىڭ پراكتيكادا قالاي جۇزەگە اسىرىلاتىنىن كورىپ، ولاردى جەرگىلىكتى جاعدايلارعا بەيىمدەۋ مۇمكىندىگىن تالقىلادىق»، – دەيدى ايگۇل قاسىمبەك.
ءساتىن سالسا، جاپون ادىستەمەلەرى الماتىنىڭ ءبىلىم بەرۋ جۇيەسىنە ءساتتى بەيىمدەلۋى مۇمكىن. بۇل، اسىرەسە، ۇلكەندەردى قۇرمەتتەۋ، تارتىپتىلىك جانە توپپەن جۇمىس ىستەۋ داعدىلارىن دامىتۋعا قاتىستى، بۇل قازاقستاندىق داستۇرلەرمەن ۇيلەسەدى. دەگەنمەن، ادىستەمەلەردى بەيىمدەۋ ءۇشىن قازاقستاننىڭ مادەني جانە الەۋمەتتىك ەرەكشەلىكتەرىن دە ەسكەرۋ قاجەت.
قازاقستاندا بۇعان دەيىن ازيا ەلدەرىنىڭ ءبىلىم بەرۋ مودەلدەرىنىڭ جەكەلەگەن ەلەمەنتتەرى، مىسالى، توپپەن جۇمىس ىستەۋ داعدىلارىن ەرتە دامىتۋ جانە جوبالىق وقىتۋ ەنگىزىلگەن ەدى. الايدا بۇل تاجىريبەلەر جۇيەلى تۇردە ەنگىزىلمەدى. سوندىقتان اتالمىش ساپار قازاقستاننىڭ ءبىلىم بەرۋ جۇيەسىن ودان ءارى دامىتۋ ءۇشىن ماڭىزدى بولىپ تابىلادى.
جالپى، جاپون پەداگوگيكاسى ماعجان جۇمابايەۆتىڭ پەداگوگيكالىق كوزقاراستارىمەن ۇندەس ەكەنى بايقالادى.
«ماعجان جۇمابايەۆ بالا بويىندا رۋحاني جانە ادامگەرشىلىك قاسيەتتەردى ۇجىمدىق ىس-ارەكەت ارقىلى دامىتۋدىڭ ماڭىزدىلىعىن ەرەكشە اتاپ وتكەن. بۇل جاپوندىق ءبىلىم بەرۋ جۇيەسىنىڭ دە باستى اسپەكتىلەرىنىڭ ءبىرى. بۇل ەلدە ۇلكەندەردى قۇرمەتتەۋگە، ەڭبەكقورلىققا، ۇجىمدىق جاۋاپكەرشىلىككە جانە توپ ىشىندەگى ۇيلەسىمگە ەرەكشە كوڭىل بولىنەدى. بۇل ماعجان جۇمابايەۆتىڭ تاربيەنى تەك ءبىلىم بەرۋ عانا ەمەس، سونىمەن قاتار مىقتى مىنەز-قۇلىق پەن قوعام الدىنداعى جاۋاپكەرشىلىك سەزىمىن قالىپتاستىرۋ دەپ تۇسىنەتىن پەداگوگيكالىق كوزقاراستارىمەن ۇقساس. سونداي-اق، جاپون ادىستەمەسى ءتارتىپ پەن ىنتىماقتاستىقتى دامىتۋعا باعىتتالعان، بۇل قازاق پەداگوگىنىڭ فيلوسوفياسىنا سايكەس كەلەدى. وسىنداي ورتاق قاعيداتتار جاپون تاجىريبەسىن قازاقستاننىڭ ءبىلىم بەرۋ جۇيەسىنە ۇلتتىق داستۇرلەر مەن مادەني ەرەكشەلىكتەردى ەسكەرە وتىرىپ ءساتتى بەيىمدەۋگە مۇمكىندىك بەرەتىن سىڭايلى.