ءبىلىم مەن عىلىمنىڭ ورداسى

«باقىتقا جەتكىزەتىن ەركىن ارەكەت — تاماشا ارەكەت»
ءال-فارابي

مەملەكەت باسشىسى قاسىم-جومارت توقايەۆ «جاڭا قازاقستاننىڭ ەكونوميكالىق باعدارى» اتتى حالىققا جولداۋىندا: «وقۋ ورىندارى تۇلەكتەرگە جۇمىس بەرە الاتىن مەكەمەلەرمەن ۇزاق مەرزىمگە ارنالعان ارىپتەستىك ورناتۋى قاجەت. ەكونوميكانىڭ باسىمدىقتارىنا، ايماقتىڭ جانە سالانىڭ ەرەكشەلىكتەرىنە بايلانىستى ءتيىمدى قارجىلاندىرۋ تاسىلدەرى كەرەك» — دەپ اتاپ ءوتتى.

بۇل ستراتەگيالىق ۇستانىم ەلىمىزدىڭ جوعارى وقۋ ورىندارىنىڭ قىزمەتىن قايتا قاراۋعا جانە ءبىلىم بەرۋ مەن ەڭبەك نارىعى اراسىنداعى بايلانىستى كۇشەيتۋگە جول اشتى. وسى تۇرعىدا ەلىمىزدىڭ جەتەكشى وقۋ ورىندارىنىڭ ءبىرى – ءال-فارابي اتىنداعى قازاق ۇلتتىق ۋنيۆەرسيتەتى (قازۇۋ) ناقتى ءىس-شارالاردى قولعا الىپ وتىر.

قازۇۋ – ءبىلىم مەن عىلىمنىڭ ورداسى

ءال-فارابي اتىنداعى قازۇۋ – قازاقستاننىڭ ەڭ ءىرى ءارى بەدەلدى جوعارى وقۋ ورىندارىنىڭ ءبىرى عانا ەمەس، سونىمەن قاتار حالىقارالىق دەڭگەيدە دە ۇلكەن تانىمالدىققا يە ۋنيۆەرسيتەت. بيىل ۋنيۆەرسيتەت ءوزىنىڭ 90 جىلدىق مەرەيتويىن اتاپ ءوتتى. بۇل – وقۋ ورنىنىڭ ەلىمىزدىڭ ءبىلىم بەرۋ جۇيەسىنە قوسقان ۇلەسىن، عىلىمي جەتىستىكتەرىن جانە كادر دايارلاۋداعى ءرولىن ايشىقتايتىن ماڭىزدى كەزەڭ.

1934 جىلى قۇرىلعان ۋنيۆەرسيتەتكە اتى الەمگە ايگىلى عۇلاما ءال-فارابيدىڭ ەسىمى بەرىلگەن. ول – فيلوسوف، ماتەماتيك، استرونوم، مۋزىكانت، سونداي-اق ءتۇرلى عىلىم سالالارىندا ىرگەلى ەڭبەكتەر جازعان ۇلى ويشىل. ءال-فارابيدىڭ اتىمەن اتالۋى ۋنيۆەرسيتەتكە ەرەكشە رۋحاني جانە زياتكەرلىك ماعىنا بەرەدى. عۇلامانىڭ «باقىتقا جەتكىزەتىن ەركىن ارەكەت — تاماشا ارەكەت» دەگەن ءسوزى بۇگىندە ستۋدەنتتەر مەن عالىمدار ءۇشىن باعدارشام ىسپەتتەس.

قازۇۋ: ءبىلىم، تۇلعالىق دامۋ جانە يننوۆاسيا

قازۇۋ-دا وقۋ – بۇل تەك اكادەميالىق ءبىلىم الۋ عانا ەمەس، سونىمەن بىرگە تۇلعالىق دامۋ مەن شىعارماشىلىق ىزدەنىسكە جول اشاتىن ورتا. زاماناۋي تەحنولوگيالارمەن جابدىقتالعان ينفراقۇرىلىم، جاڭارتىلعان وقۋ باعدارلامالارى مەن حالىقارالىق ستاندارتتارعا سايكەس ءبىلىم بەرۋ تاسىلدەرى – ستۋدەنتتەرگە تەرەڭ ءبىلىم مەن تاجىريبە جيناۋعا مۇمكىندىك بەرەدى.

بۇگىندە ۋنيۆەرسيتەت ەلىمىزدىڭ ستراتەگيالىق باعىتتارىمەن ۇندەس جۇمىستار جۇرگىزۋدە. سولاردىڭ ءبىرى – كولىك-لوگيستيكا سالاسىن سيفرلاندىرۋ. مەملەكەت بۇل باعىتتى ەكونوميكالىق دامۋ درايۆەرى رەتىندە قاراستىرىپ وتىر. جولداۋدا ايتىلعانداي، قازاقستاننىڭ بولاشاعى – ءىت-ينفراقۇرىلىمى دامىعان، سيفرلىق مۇمكىندىكتەرى كەڭ مەملەكەت بولۋىندا.

لوگيستيكا: سيفرلىق ترانسفورماسيا جانە كادر دايارلاۋ

سيفرلاندىرۋ مەن يننوۆاسيانى لوگيستيكا سالاسىنا ەنگىزۋ بارىسىندا نەگىزگى قيىندىقتاردىڭ ءبىرى – بىلىكتى مامانداردىڭ جەتىسپەۋشىلىگى. بۇل تەك تەحنيكالىق نەمەسە تەحنولوگيالىق ماسەلە عانا ەمەس، سونىمەن قاتار ادامي كاپيتالدىڭ جەتكىلىكسىزدىگىنە بايلانىستى تۋىندايتىن جۇيەلى پروبلەما. سونىمەن قاتار، جەتكىلىكتى دەڭگەيدە قارجىلاندىرىلماۋى مەن بيزنەس ورتادا سيفرلىق پلاتفورمالاردى پايدالانۋ دەڭگەيىنىڭ تومەندىگى دە وزەكتى ماسەلەلەردىڭ قاتارىندا.

وسى رەتتە قازۇۋ-دىڭ دوكتورانتۋرا باعدارلاماسى مەن ءۇشىن تەك كاسىبي بىلىكتىلىكتى جەتىلدىرۋ الاڭى عانا ەمەس، سونىمەن قاتار جاڭا عىلىمي كوزقاراستار مەن يننوۆاسيالىق تاسىلدەردى مەڭگەرۋگە مۇمكىندىك بەرەتىن ماڭىزدى پلاتفورما.

ءبىزدىڭ باستى ماقساتىمىز – العان تەوريالىق ءبىلىمدى ناقتى تاجىريبەدە قولدانا وتىرىپ، قازاقستانداعى لوگيستيكالىق ينفراقۇرىلىمدى دامىتۋعا جانە پروسەستەردى اۆتوماتتاندىرۋعا باعىتتالعان عىلىمي زەرتتەۋلەر جۇرگىزۋ. بۇل سالادا جۇرگىزىلەتىن زەرتتەۋلەر تەك ۋنيۆەرسيتەتتىك دەڭگەيدە قالماي، ۇلتتىق دەڭگەيدەگى ماسەلەلەردى شەشۋگە ۇلەس قوسۋى ءتيىس.