بۇگىن، 23 شىلدەدە الماتى جۇرتى بەلگىلى جۋرناليست مۇحتار تۇمەنبايدى اقتىق ساپارعا شىعارىپ سالدى، دەپ حابارلايدى اqshamnews.kz ءتىلشىسى.
استانادا باستالعان مۇحتار تۇمەنبايمەن قوشتاسۋ ءراسىمى الماتىدا جالعاستى. 22 شىلدەدە وتكەن قوناقاسىندا مەملەكەتتىك كەڭەسشى ەرلان قارين، پرەزيدەنتتىڭ كەڭەسشىسى باۋىرجان وماروۆ باستاعان زيالى قاۋىم وكىلدەرى، جازۋشىلار، ب ا ق باسشىلارى ءسوز سويلەپ، مۇحتار جاقسىلىق ۇلىنىڭ قىسقا عۇمىردا اتقارعان ىستەرىن، ازاماتتىق بەلسەندىلىگىن اتاپ ءوتتى.
بۇگىن، 23 شىلدەدە الماتىنىڭ باس مەشىتىندە مارقۇمنىڭ جانازاسى وقىلىپ، كەڭساي-2 زيراتىنا جەرلەندى.
جانازادان كەيىن بەرىلگەن اسقا مۇحتار تۇمەنباي دۇنيەگە كەلگەن قىزىلوردا وبلىسىنان ارنايى دەلەگاسيا كەلدى. وبلىس اكىمىنىڭ، ارال اۋدانىنىڭ، سازدى اۋىلىنان كوڭىل ايتىلدى. سونداي-اق، ساياساتكەر قۋانىش سۇلتانوۆ، جازۋشىلار وداعىنىڭ ءتوراعاسى مەرەكە قۇلكەنوۆ پەن ارىپتەستەرى مارقۇم جايلى ەستەلىكتەرىن ءبولىسىپ، اباي وبلىسىنىڭ اكىمى بەرىك ءۋالي مەن الماتى قالاسىنىڭ اكىمى دارحان ساتىبالدىنىڭ تۋعان-تۋىسقاندارىنا كوڭىل ايتۋ حاتى وقىلدى.
ەسكە سالايىق، 21 شىلدەدە بەلگىلى جۋرناليست مۇحتار تۇمەنبايدىڭ 55 جاسقا قاراعان شاعىندا جۇرەكتەن قايتىس بولعانى حابارلانعان بولاتىن. ول - بەلگىلى جازۋشى جاقسىلىق تۇمەنبايەۆتىڭ ۇلى. ءال-فارابي اتىنداعى قازاق ۇلتتىق ۋنيۆەرسيتەتىندە ءبىلىم العان. ەڭبەك جولىندا ءبىرقاتار باسىلىم مەن رەسپۋبليكالىق تەلەارنالاردا قىزمەت اتقارعان. «Qazaqstan» تەلەارناسىنداعى «اپتا» اقپاراتتىق-ساراپتامالىق باعدارلاماسىنىڭ جۇرگىزۋشىسى رەتىندە كورەرمەنگە كەڭىنەن تانىلدى. سونداي-اق ول - «مانشۇك. اكەگە اراشا تۇسكەن قىز»، «ءتورت قايسار»، «ءاليا. ەرلىك الگوريتمى» سىندى سوعىس قاھارماندارىنا ارنالعان دەرەكتى فيلمدەردىڭ اۆتورى ەدى. ۇلتتىق مۇددەنى جوعارى قوياتىن جۋرناليست رەتىندە قوعامداعى كوپتەگەن وزەكتى ماسەلەلەردى وتكىر كوتەرىپ، جۇرتشىلىق ءىلتيپاتىنا بولەنىپ جۇرەتىن.