Coldplay كونسەرتىندە باس ديرەكتور مەن ارىپتەسىنىڭ ۆيدەوسىن تۇسىرگەن ايەل ودان قانداي تابىس تاپقانىن ايتتى، دەپ حابارلايدى aqshamnews.kz UNILAD.com سايتىنا سىلتەمە جاساپ.
Astronomer كومپانياسىنىڭ باس ديرەكتورى ەندي بايرون مەن ونىڭ ارىپتەسى كريستين كەبوتتىڭ Coldplay كونسەرتى كەزىندە قۇشاقتاسىپ تۇرعان ءساتىن ۆيدەوعا ءتۇسىرىپ العان گرەيس سپرينگەر بۇل روليكتەن ەشقانداي تابىس تاپپاعانىن مالىمدەدى.
ول بۇل تۋرالى This Morning باعدارلاماسىنا قاتىسىپ، جۇرگىزۋشىلەر دەرموت و’ليري مەن ەليسون حامموندقا بەرگەن سۇحباتىندا ايتتى.
«مەن بۇل ۆيدەودان دا، ونىڭ قارالىمدارىنان دا اقشا تاپپادىم. سەبەبى ول مونەتيزاسياعا قوسىلماعان»، – دەدى ول.
وقيعا فوكسبورو قالاسىنداعى Gillette ستاديونىندا Coldplay توبىنىڭ كونسەرتى كەزىندە بولعان. بۇل ءسات 50 مىڭ كورەرمەننىڭ كوز الدىندا ەكرانعا شىققان. قۇشاقتاسۋ جەلىدە ۇلكەن تالقىعا ءتۇسىپ، داۋلى ماسەلەگە اينالدى. سەبەبى ەندي بايرون باسقا ايەلگە – مەگان كەرريگان بايرونعا ۇيلەنگەن.
Coldplay توبىنىڭ ۆوكاليسى كريس مارتين بۇل جاعدايعا ازىلمەن:
«بۇلار نە عاشىق، نە وتە ۇيالشاق ادامدار»، – دەپ سيپاتتادى.
گرەيس سپرينگەر باستاپقىدا ەكراننان ءوزىن كورگىسى كەلگەنىن مويىندادى:
«مەن تەك سول ءساتتى ءتۇسىرىپ جاتقان ەدىم. ول كەزدە اسا ءمان بەرمەدىم، ءبىراق كەيىن ءبارى وسى ۆيدەونى تالقىلاپ جاتقانىن اڭعاردىم»، – دەدى ول.
كەيىن ۆيدەونى دوستارىمەن قايتا كورگەندە، بۇل كورىنىس سىرت كوزگە كۇمان تۋدىراتىنىن تۇسىنگەن. جۋرناليستەر قويعان «وكىنەسىز بە؟» دەگەن سۇراققا ول بايروننىڭ ايەلى مەن وتباسىنا جاناشىرلىقپەن قارايتىنىن، ءبىراق:
«مۇنى تەك مەن عانا تۇسىرگەن جوقپىن. مەن تۇسىرمەسەم، باسقا بىرەۋ تۇسىرەر ەدى»، – دەپ جاۋاپ بەردى.
جەلىدە جاريالانعان ۆيدەودان كەيىن، Astronomer كومپانياسى ىشكى تەكسەرۋ جۇرگىزىپ، ەكى قىزمەتكەر دە جۇمىستان ۋاقىتشا شەتتەتىلدى. كەيىن ەندي بايرون وتستاۆكاعا كەتتى. كومپانيا مالىمدەمەسىندە ۇيىم باسشىلىعىنىڭ جوعارى ەتيكالىق ستاندارتتارعا ساي جۇمىس ىستەۋى مىندەت ەكەنى ايتىلعان. سەو كومپانياسىنىڭ ۋاقىتشا باس ديرەكتور قىزمەتىن كومپانيانىڭ نەگىزىن قالاۋشىلاردىڭ ءبىرى – پيت دەدجوي اتقارادى.