الماتىدا ەرمەنساي شاعىناۋدانى مەن بوستاندىق اۋدانىنداعى تۇرعىن ءۇي كەشەندەرىن ۇزدىكسىز تازا سۋمەن قامتاماسىز ەتەتىن سۋ قۇبىرى سالىنىپ جاتىر، - دەپ حابارلايدى aqshamnews.kz.
بوستاندىق اۋدانىنا قاراستى ەرمەنساي شاعىناۋدانىندا اۋىزسۋ تاپشىلىعى ماسەلەسىن شەشۋ ماقساتىندا ريەۆەرسيۆتى سۋ قۇبىرىنىڭ قۇرىلىسى قارقىندى ءجۇرىپ جاتىر. جوبا جۇزەگە اسسا، ەرمەنساي مەن ىرگەلەس ءىرى تۇرعىن ءۇي كەشەندەرىنىڭ تۇرعىندارى تاۋلىك بويى ۇزدىكسىز سۋمەن قامتىلادى. بۇل جونىندە قالالىق ەنەرگەتيكا جانە سۋمەن جابدىقتاۋ باسقارماسى مالىمدەدى.
جوبانى «SGGroup ساپا ستروي» ج ش س الماتى قالاسىنىڭ ەنەرگەتيكا جانە سۋمەن جابدىقتاۋ باسقارماسىمەن بىرلەسىپ، تەحنوگەندىك سيپاتتاعى توتەنشە جاعدايدىڭ الدىن الۋ جانە اپاتتىق-قالپىنا كەلتىرۋ جۇمىستارى اياسىندا جۇزەگە اسىرىپ وتىر.
قۇرىلىس جۇمىستارى ەكى نەگىزگى باعىتقا بولىنگەن. ءبىرىنشى باعىت – ءال-فارابي داڭعىلىنان «Sakura»، «Silver Hills» جانە «Verona» تۇك-نە دەيىنگى ارالىقتا سورعى ستانسياسى سالىنىپ، سۋ قۇبىرى مەن ەلەكتر جەلىلەرى تارتىلادى، جول توسەمەسىنىڭ نەگىزى دايىندالادى. بۇل جۇمىستى 2025 جىلدىڭ 1 قىركۇيەگىنە دەيىن اياقتاۋ جوسپارلانىپ وتىر.
ەكىنشى باعىت – «Sakura» تۇرعىن ءۇي كەشەنىنەن «نۇرلىتاۋ» سۋ دايىنداۋ ستانسياسىنا دەيىنگى ارالىقتا دا وسىعان ۇقساس قۇرىلىس جۇمىستارى 2025 جىلى 25 جەلتوقسانىنا دەيىن جالعاسادى. ال جولدىڭ ۇستىڭگى قاباتىن اسفالتتاۋ جانە كورىكتەندىرۋ جۇمىستارى 2026 جىلى ءناۋرىز-ساۋىر ايلارىنا جوسپارلانعان.
سونىمەن قاتار ءال-فارابي داڭعىلىنىڭ وڭتۇستىك جاعىندا جاڭادان سۋ بۇرۋ جۇيەسىن ورناتۋ كوزدەلگەن، ول بويىنشا قوسۋ جۇمىستارى بيىلعى جىلدىڭ ءتورتىنشى توقسانىندا جۇرگىزىلەدى.
قازىرگى ۋاقىتتا ينجەنەرلىك-گەولوگيالىق جانە توپوگرافيالىق زەرتتەۋ جۇمىستارى اياقتالىپ، جوبالىق-سمەتالىق قۇجاتتاما ازىرلەنۋدە، سورعى ستانسيالارى سالىناتىن ورىندار ناقتىلاندى. بۇگىنگە دەيىن 3،3 شاقىرىمنان استام سۋ قۇبىرى تارتىلىپ، تۇرعىن ۇيلەردى ۋاقىتشا سۋمەن قامتۋ ءۇشىن سورعى ستانسياسى مەن قۇبىر جەلىسى ورناتىلىپ جاتىر.
«بۇل جوبا – بوستاندىق اۋدانى تۇرعىندارىنىڭ تىرشىلىگى ءۇشىن اسا ماڭىزدى. باس مەردىگەر قۇرىلىس جۇمىستارىن جەدەلدەتىلگەن كەستە بويىنشا جۇرگىزىپ، ىقتيمال قاۋىپ-قاتەرلەردى ازايتىپ، حالىقتى ۇزدىكسىز تازا سۋمەن قامتاماسىز ەتۋگە بار كۇشىن سالىپ وتىر»، – دەدى جوبانىڭ ديرەكتورى سەرگەي كوۆاليەۆ.