9 ايلىق ساباقتان شارشاعان بالانى جازعى دەمالىسقا شىعا سالا كەلەسى وقۋ جىلىنا دايىنداۋ ءۇردىس بولىپ كەتتى. دەنى ساۋ، شىمىر بولسىن دەپ سپورتقا سۇيرەيمىز. اقىلىنا اقىل، بىلىمىنە ءبىلىم قوسسىن دەپ ءتۇرلى كۋرسقا اپارامىز. زاماننىڭ تالابى دەپ ءتىل ۇيرەتۋگە تىرىسامىز. دەمالىس ۋاقىتىندا بالاسىن ءتۇرلى دارىگەرگە كورسەتىپ، دەنساۋلىعىن ءبىر تەكسەرۋدەن ءوتىزىپ العان اتا-انانىڭ ەندىگى جۇمىسى – مەكتەپكە كيەتىن كيىمى مەن كەرەك-جاراعىن تۇگەندەۋ. Almaty-akshamy.kz سايتىنىڭ بۇگىنگى ساۋالناماسى دا وسى توڭىرەكتە ءوربىدى.
بۇگىنگى كۇنى بالانىڭ مەكتەپكە بارۋى دا اتا-انانىڭ قالتاسىنا از سالماق ەمەس. ءار ادام ۇكىلەگەن ءۇمىتىنىڭ ءوز ورتاسىندا جارقىراپ جۇرگەنىن، ساپاسىز اياقكيىم كيىپ، دەنساۋلىعىنىڭ قۇرىماعانىن قالايدى. الايدا، ساپالى دۇنيەنىڭ باعاسىنا كەز كەلگەننىڭ قولى جەتە بەرمەيدى. ءبىر كەزدە 2 تەڭگەدەن ساتىلعان داپتەردىڭ باعاسى دا ءقازىر 15-20 ەسە قىمباتتاپ كەتكەن. الماتىنىڭ ساۋدا ورىندارىنداعى باعالاردى سالىستىرىپ قاراپ شىققانىمىزدا، مەكتەپكە كيەتىن اق جەيدەنىڭ ەڭ ارزانى 3500 تەڭگە، شالبار مەن بەلدەمشەنىڭ ەڭ تومەنگى باعاسى 5000 تەڭگەدەن ەكەنىن بايقادىق، ساپاسى دا باعاسىنا لايىق ەكەنىن ءتۇسىنىپ وتىرعان شىعارسىزدار. ەگەر ساپالى جەيدە مەن شالبار العىڭىز كەلسە، قالتاڭىزدان 15-20 مىڭ تەڭگەڭىزدى ساناپ بەرۋگە دايىن بولىڭىز. بۇعان قوسا، بۇل كيىمدەردى كەم دەگەندە، اۋىستىرىپ كيەتىن تاعى ءبىر دانادان الاتىنىڭىز بار. بۇل جەرگە اۋا رايى سالقىنداعاندا كيەتىن كەۋدەشە، پيدجاك، جەمپىردى قوسقان جوقپىز. سومكەنىڭ ەڭ ارزانىنىڭ باعاسى 5500 تەڭگەدەن باستالادى.
مەملەكەتتەن كوپ بالالى وتباسىنىڭ بالاسىنا بەرىلەتىن كيىمنىڭ داۋى الەۋمەتتىك جەلىنى ارالاپ كەتكەسىن، اقشالاي بەرىلەتىن بولعان. بيىلعى كومەكتىڭ كولەمى – 40 567 تەڭگە. جەلىدەگى اقپاراتتارعا قاراساق، بۇل كومەكتى العانداردىڭ كوبى اقشانى جەتكىزە الماعان سىڭايلى. بازاردىڭ نارقى بەلگىلى، سوندىقتان جەتپەي قالسا، تاڭعالمايمىز.
ءبىز اڭگىمەگە تارتقان اتا-انالار باعانىڭ تۇراقسىزدىعىنا، ونى قاداعالايتىن ورگاننىڭ جوقتىعىنا رەنىشتى.
گۇلميرا ايماعامبەتوۆا
ءتورت بالام مەكتەپتە وقيدى. ۇلكەن ۇلىم كادەت كلاسىندا وقيدى، ونىڭ فورماسى 77 مىڭنان اسادى. بۇل تەك مەرەكەدە كيەتىن كيىمى (پارادنايا فورما). كۇندەلىكتى كيەتىن كيىمىن بىلتىر العانبىز، ول تار بولىپ قالىپتى، ەندى سونى الامىز. ونىڭ باعاسى 22 مىڭداي وعان قوسا اياقكيىمىن (بەرسى) الۋ كەرەك. اتا-انالار بىرىگىپ ارناۋلى دۇكەننەن الامىز، سونى كۇتىپ وتىرمىز. ەكىنشى ۇلىم جەكەمەنشىك مەكتەپتە وقيدى. وعان اسا كوپ كەتپەدى. اق جەيدە (12 مىڭ تگ) مەن شالبار (10 مىڭ تگ) جانە تۋفلي (22.000) الدىم. ودان كەيىنگى باستاۋىشتا وقيتىن ۇل مەن قىزدىڭ ءارقايسىنا ۇنەمدەپ العاننىڭ وزىندە 35 مىڭداي اقشا كەتتى. كەڭسە تاۋارلارى مەن سومكەلەرىن دە ەندى الامىز.
ءاليا وسپان قىزى
بيىل باعالار ايرىقشا شارىقتاپ تۇر، تەك گلاسماندا عانا فورمانىڭ باعاسى تۇراقتى، ال بازارداعى كانسەلياريا زاتتارىنىڭ قۇنىن قاداعالاپ جاتقان ەشكىم جوق، 3 وقۋشى بالام بار، ۇشەۋىنە ورتا ەسەپپەن 400 مىڭداي اقشا جۇمسادىم، ارينە اتا-انا بالاسىنان نەنى اياسىن، ەڭ جاقسىنى العىڭ كەلەدى، دەسەك تە شامامىزدىڭ كەلگەنىنشە الدىق.
عايني ىسقاقوۆا
قازىرگى زاتتىڭ ساپاسى جوق، بىلتىرعى كيىمدى بيىل كيگىزە المايسىز. قازاق وتباسىندا جاز مەزگىلى جوندەۋ جۇمىستارىنا جانە اعايىن-تۋىستىڭ تويىن ارالاۋعا ارنالادى عوي كوبىنە. سول سەبەپتى بالالارىما ءالى مەكتەپ فورماسىن دا، داپتەر-قالامىن دا ساتىپ العان جوقپىز. جالاقىمىزدى ءار ايدىڭ باسىندا الاتىندىقتان، قىركۇيەكتىڭ بولۋىن كۇتىپ ءجۇرمىز. نەگىزى جازدىڭ كۇزگە اۋىسار شاعى كوپ وتباسى ءۇشىن قارجىلىق جاعىنان وڭاي ەمەس. بالانى مەكتەپكە دايىنداۋ دا، ءۇي-جايىڭدى، وتىن-سۋىڭدى قامداۋ دا وسى كەزدە قاباتتاسىپ قالادى. وسىنداي كەزدە جۇمىس بەرۋشىنىڭ تاراپىنان ءبىر كومەك بولسا ەكەن، تىم قۇرىعاندا جالاقىمىزدى ۋاقىتىنان ەرتەرەك بەرسە عوي دەپ ويلايمىن. باعانىڭ اسپانداپ تۇرعانى بەلگىلى، ءوزىمنىڭ الاتىن 300 مىڭ تەڭگەمدى 3 بالاما قالاي جەتكىزەرىمدى ويلاپ باسىم قاتىپ ءجۇر.