«قازاقستان» شاحتاسىنداعى اپاتتى تەرگەۋ جونىندەگى كوميسسيا قۇرىلىپ، «ارسەلورميتتال تەمىرتاۋ» اق «قازاقستان» شاحتاسىنداعى اپاتتى تەرگەۋگە كىرىستى. كوميسسيا مۇشەلەرى ءورتتىڭ سەبەبىن جانە توتەنشە جاعدايدىڭ ءمان-جايىن انىقتاۋى ءتيىس، دەپ حابارلايدى Almaty-akshamy.kz. Azattyq Ruhy-نا سىلتەمە جاساپ.
سونداي-اق شاحتا بازاسىندا جەدەل شتاب قۇرىلدى. ونىڭ جۇمىسى قاراعاندى وبلىسى اكىمىنىڭ ءبىرىنشى ورىنباسارى ۆاديم باسينگە تاپسىرىلدى.
بۇل تۋرالى شاحتينسك قالاسىنداعى وڭىرلىك كوممۋنيكاسيالار قىزمەتىنىڭ پلاتفورماسىندا ۇيىمداستىرىلعان ارنايى كوشپەلى بريفينگ بارىسىندا بەلگىلى بولدى.
تجم ونەركاسىپتىك قاۋىپسىزدىك كوميتەتىنىڭ قاراعاندى وبلىسى بويىنشا دەپارتامەنتىنىڭ باسشىسى كەڭگىرباي ەسەنەيەۆتىڭ ايتۋىنشا، شاحتادا سوڭعى تەكسەرۋ جاقىندا عانا جۇرگىزىلىپتى. بۇزۋشىلىقتار انىقتالدى، ءبىراق ولار ادام ءومىرى مەن دەنساۋلىعىنا ءقاۋىپ توندىرمەگەن.
مەتاننىڭ اسىپ كەتۋى دە تىركەلمەپتى. اپاتتى جويۋ جوسپارى سو بويىنشا ايعاقتارعا بايلانىستى ەنگىزىلدى، دەپ اتاپ ءوتتى «ارسەلورميتتال تەمىرتاۋ» اق تاۋ-كەن سەگمەنتى اتقارۋشى ديرەكتورىنىڭ ورىنباسارى سەرگەي وگاي.
«زارداپ شەككەن بەس ادامنىڭ ەكەۋى جۇمىس قابىلەتتىلىگى مەن ورنالاسۋ جۇيەسىن تەكسەرۋمەن اينالىساتىن سلەسارلار بولدى. ولار ءبىرىنشى اۋىسىمدا اپات بولعان كونۆەيەر بەتكەيىندەگى كەيبىر اقاۋلاردى جويۋ جۇمىستارىن اتقارۋدا ەدى. اپات ورنىنداعى تاعى ءبىر سلەسار كت ۋچاسكەسىنەن ەدى. ەكى جۇمىسشى اپات ۋچاسكەسىنىڭ جانىندا بولدى»، – دەدى سەرگەي وگاي.
بۇگىنگى تاڭدا 11 ادام اۋرۋحانادا جاتىر. توعىز ادام قاراعاندىدا جانە 2 ادام شاحتينسكىدە.
قازا تاپقان جانە زارداپ شەككەن كەنشىلەردىڭ وتباسىلارىنا جان-جاقتى كومەك كورسەتىلەدى، دەپ سەندىردى ۆاديم باسين.
«قازا تاپقانداردىڭ تۋىستارى مەن جاقىندارىنا كوڭىل ايتامىز. بارلىق قاجەتتى كومەك كومپانيا تاراپىنان دا، مەملەكەت تاراپىنان دا ۋاقتىلى جانە تولىق كولەمدە كورسەتىلەتىن بولادى. ەشكىم نازارسىز قالمايدى. بارلىعىمىزدىڭ قابىرعامىز قايىسىپ، قايعىرىپ وتىرمىز»، – دەدى ۆاديم باسين.