بالانى ەكراننىڭ ارعى جاعىنداعى نيەتى ءتۇزۋ ەمەس ادامداردان قورعاۋعا كومەكتەسەتىن ينتەرنەتتەگى قاۋىپسىزدىكتىڭ قاراپايىم ەرەجەلەرى.
پوليسەيلەردىڭ ازىرلەگەن ۇسىنىستارىنا سۇيەنسەك، اتا-انا كامەلەتكە تولماعان بالانىڭ ينتەرنەتتەگى قىزىعۋشىلىقتارىن مۇمكىندىگىنشە باقىلاپ وتىرۋ كەرەك، دەپ حابارلايدى اlmaty-akshamy.kz.
جەكە دەرەكتەرىڭىزدى بوگدە ادامدارعا ايتپاڭىز. تانىس ەمەس تۇلعالاردان تۇسەتىن دوستىقتى قابىلداماڭىز، ولاردىڭ نۇسقاۋلارىن ورىنداماڭىز.
بالالارعا ەشبىر جاعدايدا جەلىنىڭ باسقا پايدالانۋشىلارىنا وزدەرىنىڭ دەربەس دەرەكتەرىن، ياعني ءاتى-جونىن، تەگىن، تۋعان كۇنىن، تۇرعىلىقتى مەكەنجايىن، وقۋ ورنىن، تەلەفونىن، فوتوسۋرەتتەرىن جانە ت.ب. اقپاراتتى ايتۋعا بولمايتىنىن ءتۇسىندىرۋ قاجەت.
بۇدان بولەك، الەۋمەتتىك جەلى قولدانۋشىلارى سەنىمگە كىرۋ ءۇشىن ويدان شىعارىلعان دەرەكتەردى، سونىڭ ىشىندە باسقا ادامداردىڭ نەمەسە ءتىپتى بالالاردىڭ فوتوسۋرەتتەرىن پايدالاناتىن كەزدەر بولادى. وسىعان بايلانىستى بەلگىسىز ادامداردان دوستىقتى قابىلداماۋ جانە ولاردىڭ بۇيرىقتارى مەن نۇسقاۋلارىن ورىنداماۋ ۇسىنىلادى. ەڭ دۇرىسى – سۇحباتتاسىپ جاتقان ادامنىڭ پاراقشاسىن بۇعاتتاۋ.
ينتەرنەت قولدانۋشىلار تاراپىنان تۇسكەن قاۋىپتەن قورىقپاڭىز. قاشىقتان قول جەتكىزۋ باعدارلامالارىن ورناتپاڭىز.
– ينتەرنەت-پايدالانۋشىلار سىزگە قوقان-لوققى كورسەتسە، ۋايىمداماڭىز. ولار سىزگە دە، جاقىندارىڭىزعا دا ەشتەڭە ىستەي المايدى. ولار ادەتتە بالالاردى باقىلاۋعا الۋ ءۇشىن قورقىتادى. ءبىرىنشى ءقاۋىپ تونگەن كەزدە بالالار بۇل تۋرالى اتا-اناسىنا، اپكە-باۋىرلارىنا، مۇعالىمىنە جانە ت.ب دەرەۋ ۇيالماي، ايتۋ كەرەك، – دەپ اتاپ ءوتتى ۆەدومستۆودا.
سونداي-اق پوليسيا قاشىقتان قول جەتكىزۋ ءۇشىن باعدارلامالاردى ورناتپاۋعا كەڭەس بەرەدى. بۇنداي قوسىمشالاردى ورناتپاس بۇرىن، ول تۋرالى ينتەرنەتتە وقىپ، ونىڭ نە ءۇشىن قاجەت ەكەنىن ءبىلىپ الۋ كەرەك.
اتا-انالارعا ۇسىنىس: بالانى ينتەرنەتتەگى قاۋىپسىزدىكتىڭ نەگىزگى ەرەجەلەرى تۋرالى حاباردار ەتىڭىز، سونداي-اق ونى بوگدە ادامدار مەن قاجەتسىز كونتەنتتەن قورعاۋعا كومەكتەسەتىن اتا-انا باقىلاۋى، ءقاۋىپسىز ىزدەۋ سياقتى پارامەترلەردى قولدانىڭىز.