وڭىرلەردە ينفەكسيا جۇقتىرۋ كورسەتكىشى ارتىپ كەلەدى.
اۋرۋحاناعا جاتقىزۋ كورسەتكىشى 50 ادامنان اسقان كەزدە نىسانداردا Ashyq قوسىمشاسى مىندەتتى تۇردە پايدالانىلادى، دەپ حابارلايدى Almaty-akshamy.kz
ۇكىمەت وتىرىسىندا دەنساۋلىق ساقتاۋ ءمينيسترى اجار عينيات Ashyq قوسىمشاسى قانداي جاعدايدا ەنگىزىلەتىنىن ناقتىلاپ ايتتى.
ۆەدومستۆوارالىق كوميسسيانىڭ سوڭعى شەشىمىنە سايكەس، «جاسىل» جانە «سارى» ايماقتا ەشقانداي شەكتەۋ شارالارى جوق. ءبىراق سانيتارلىق ەرەجەلەر قاتاڭ ساقتالۋى شارت. قوعامدىق ورىنداردا دەزينفەكسيا جاسالادى. بەتپەردە كيۋگە ۇسىنىس جاسالعان. ال «قىزىل» ايماقتا شەكتەۋ شارالارى دەنساۋلىق ساقتاۋ جۇيەسىنىڭ جۇكتەمەسىنە قاراي ەكى كەزەڭمەن قابىلدانادى.
«ءبىرىنشى كەزەڭدە R 1-دەن ارتىق بولعاندا، ياعني، اۋرۋدىڭ تارالۋى كۇشەيگەن كەزدە جانە 100 مىڭ تۇرعىنعا شاققاندا اۋرۋحاناعا جاتقىزۋ كورسەتكىشى 25-50 ناۋقاسقا دەيىن بولعان كەزدە، بيزنەس شەكتەۋسىز جۇمىس ىستەيدى. ءبىراق جابىق ءۇي-جايلاردا جانە كولىكتىڭ بارلىق تۇرىندە بەتپەردە كيۋ مىندەتتى بولادى. ەكىنشى كەزەڭدە R-عا قاراماستان، اۋرۋحاناعا جاتقىزۋ كورسەتكىشى 50 ادامنان اسقان كەزدە نىسانداردا Ashyq قوسىمشاسى مىندەتتى تۇردە پايدالانىلادى»، - دەدى عينيات.
بۇدان بولەك، كوپشىلىك شارالار مەن بيزنەس نىساندارعا كىرۋ جاعىنان 50 پايىزدىق شەكتەۋ قويىلادى. ءبىلىم بەرۋ ۇيىمدارىندا قوسىمشا شەكتەۋلەر ەنگىزىلەدى. بارلىق ۇيىم قىزمەتكەرلەرىنىڭ 30 پايىزى قاشىقتان جۇمىس ىستەۋگە اۋىسادى.
ايتا كەتەتىن جايت، قازىرگى كەزدە نۇر-سۇلتان قالاسى «سارى» ايماقتا تۇر، قالعاندارى «جاسىل» ايماقتا. دەگەنمەن، وڭىرلەردە ينفەكسيانىڭ جۇقتىرۋ كورسەتكىشى ارتىپ كەلەدى. ماسەلەن، سوڭعى ەكى اپتانىڭ ىشىندە اقتوبە، باتىس قازاقستان، قاراعاندى، پاۆلودار مەن اقمولا وبلىستارىندا ۆيرۋس جۇقتىرعانداردىڭ سانى 6 ەسەگە وسكەن.