قازاقستان توتەنشە جاعدايلار مينيسترلىگى قىس مەزگىلىندە اۋا رايى كۇرت ناشارلاعان كەزدە ساقتىق شارالارىن كۇشەيتىپ، داۋىلدى ەسكەرتۋلەردى قاداعالاۋعا جانە مۇمكىندىگىنشە الىس ساپارلارعا شىقپاۋعا شاقىردى، دەپ حابارلايدى AqshamNews.kz ءتىلشىسى تجم مالىمدەمەسىنە سىلتەمە جاساپ.
تجم مالىمەتىنشە، قولايسىز اۋا رايى كەزىندە اۋىل تۇرعىندارىنا ۇزاق ساپارلاردان باس تارتۋ ۇسىنىلادى. داۋىلدى ەسكەرتۋلەر مەن اۆتوجولداردىڭ جابىلۋى تۋرالى اقپارات تۇرعىندارعا سمس-حابارلامالار، ينتەرنەت-رەسۋرستار جانە الەۋمەتتىك جەلىلەر ارقىلى جەتكىزىلەدى.
مينيسترلىك قىسقى كەزەڭدە ءالى قاتپاعان مۇزدىڭ ءقاۋىپتى ەكەنىن ەسكەرتىپ، سۋ ايدىندارىندا قاۋىپسىزدىك تالاپتارىن قاتاڭ ساقتاۋعا شاقىردى.
قىس مەزگىلىندەگى توتەنشە جاعدايلارعا جەدەل دەن قويۋ ءۇشىن 44 مىڭنان استام ادام مەن 14 مىڭنان استام تەحنيكادان تۇراتىن كۇش-قۇرالدار توبى دايىندالعان. وڭىرلەردە 1 681 جىلىتۋ پۋنكتى ازىرلەنىپ، قوسىمشا رەتىندە 40 تراسسالىق مەديسينالىق-قۇتقارۋ پۋنكتى دە جىلىتۋ ورنى رەتىندە پايدالانىلماق.