الماتىدا «شىعىس قاقپاسى» جانە «باتىس» پوليورتالىقتارىنىڭ جوبالارىن ازىرلەۋگە ارنالعان حالىقارالىق ساۋلەت بايقاۋى جەڭىمپازدارىن ماراپاتتاۋ ءراسىمى ءوتتى.
بايقاۋدى قالا اكىمدىگى «SHARE Architects» ساۋلەت قاۋىمداستىعىمەن بىرلەسىپ ۇيىمداستىردى. بولاشاق پوليورتالىقتاردىڭ جوبالارىن فرانسيا، شۆەيساريا، يسپانيا، گەرمانيا، انگليا، اقش، سينگاپۋر جانە باسقا دا ەلدەردىڭ 15 حالىقارالىق كومپانياسى ۇسىندى.
ءىس-شاراعا قاتىسۋشىلار مەن قوناقتارعا ارناعان قۇتتىقتاۋ سوزىندە الماتى قالاسى اكىمىنىڭ ورىنباسارى بەيبىت شاحانوۆ بۇل بايقاۋدىڭ قالا ءۇشىن ماڭىزدىلىعىن اتاپ ءوتتى. ونىڭ ايتۋىنشا، بۇل بايقاۋ الماتىنى پوليورتالىقتى دامۋ مودەلىنە كوشىرۋ جولىنداعى ماڭىزدى قادام.
"حالىقارالىق قازىلار القاسىنىڭ قاراۋىنا جوعارى دەڭگەيدە ازىرلەنگەن، تىڭ ءارى جان-جاقتى ازىرلەنگەن جوبالار ۇسىنىلدى. ولاردىڭ ءارقايسىسى الماتىنىڭ 2040 جىلعا دەيىنگى باس جوسپارىنا نەگىزدەلگەن ستراتەگيالىق مىندەتتەردى جاڭا قىرىنان پايىمداۋعا وزىندىك ۇلەس قوستى. قالامىز تاۋ لاندشافتىن ۇيلەستىرۋ مەن وزىق جاسىل تەحنولوگيالاردى ەنگىزۋ ارقىلى تۇرعىندار ءۇشىن بارىنشا جايلى ورتا قالىپتاستىرۋعا ۇمتىلادى. ءبىز شىعارماشىلىق جانە ينجەنەرلىك الەۋەتتى توعىستىراتىن ايماقتىق حابقا اينالۋعان نيەتتىمىز. بۇل جولدا ۇزدىك حالىقارالىق كوماندالاردى تارتۋ – باستى باسىمدىقتاردىڭ ءبىرى. سىزدەردىڭ يدەيالارىڭىز بەن تاجىريبەلەرىڭىز الماتىنىڭ ەرتەڭگى كەلبەتىن قالىپتاستىرۋعا بۇگىننەن باستاپ ۇلەس قوسىپ وتىر"، – دەدى الماتى قالاسى اكىمىنىڭ ورىنباسارى بەيبىت شاحانوۆ.
گەرمانيادان كەلگەن قازىلار القاسىنىڭ مۇشەسى رولاند بەحمان قالانىڭ دامۋ الەۋەتى جوعارى ەكەنىن اتاپ ءوتتى. ونىڭ پىكىرىنشە، الماتى شىعىس مادەني مۇراسى مەن زاماناۋي قالا قۇرىلىسى ۇردىستەرىن ۇشتاستىرا وتىرىپ دامۋعا قابىلەتتى. سونداي-اق ول بايقاۋعا قاتىسۋشىلار ۇسىنعان جۇمىستار قالانىڭ ورنىقتى ينفراقۇرىلىم مەن جايلى جاسىل ورتا قالىپتاستىرۋعا باعىتتالعان دامۋ باعىتىنا تولىق ساي كەلەتىنىن ايتتى.
بايقاۋ قورىتىندىسى بويىنشا جەڭىمپازدار انىقتالدى:
«شىعىس قاقپا» پوليورتالىعى نوميناسياسىندا — ENOTA (سلوۆەنيا)؛
«باتىس» پوليورتالىعى نوميناسياسىندا — LDA Design ساۋلەت بيۋروسى (ۇلىبريتانيا).
«ءبىزدىڭ جوبا جاياۋ ءجۇرۋ ءومىر سالتىن دامىتۋعا، سونداي-اق قوعامدىق كولىكپەن جايلى ءارى قولايلى قوزعالىستى قامتاماسىز ەتۋگە باعىتتالعان. تۇرعىن ءۇي، كوممەرسيالىق نىساندار، ۇلكەن ساياباق جانە الەۋمەتتىك ينفراقۇرىلىم — ءبىز ولاردىڭ اراسىنداعى تەپە-تەڭدىكتى تابۋعا تىرىستىق. ياعني، «15 مينۋتتىق قالا» تۇجىرىمداماسى اياسىندا ادامعا قاجەتتى نەگىزگى قىزمەتتەردىڭ بارلىعى جاياۋ بارۋعا بولاتىنداي جەردە بولادى»، - دەدى LDA Design كومپانياسىنىڭ وكىلى ەۆگەنيي ديدورەنكو.
ايتا كەتەيىك، الماتىدا 5 پوليورتالىق قۇرۋ جوسپارلانعان: «سولتۇستىك»، «باتىس»، «وڭتۇستىك-باتىس»، «شىعىس قاقپا» جانە «تاريحي ورتالىق». بۇل باستاما ەكونوميكالىق بەلسەندىلىكتى تەڭ بولۋگە، كولىك جۇكتەمەسىن ازايتۋعا جانە قالالىق ينفراقۇرىلىمنىڭ قولجەتىمدىلىگىن ارتتىرۋعا مۇمكىندىك بەرەدى.