دينارانىڭ تاڭداۋى اقش-تاعى ستەنفورد ۋنيۆەرسيتەتىنە ءتۇستى
دينارانىڭ بويىندا قازاق قىزىنا ءتان قايسارلىق بار. ول الەمنىڭ 26 مەملەكەتىنەن وقۋعا شاقىرتۋ الدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
دينارا - 18 جاستا. رەسپۋبليكالىق فيزيكا ماتەماتيكا مەكتەبىنىڭ تۇلەگى. ءوزى اقىلدى، سۇلۋ، ونەرلى.
ودان بولەك، از قامتىلعان وتباسىندا تاربيەلەنىپ جاتقان بالالارعا ماتەماتيكا جانە باعدارلامالاۋ بويىنشا 200-دەن استام ساباق وتكىزىپ، ءبىلىم الۋىنا كومەكتەسەدى. عىلىمي جوبالار جانە سپورتتىق جارىستارداعى جەڭىسى ءۇشىن دە كوپ ماراپاتقا يە بولعان. ال بيىل الەمنىڭ كوش باستاپ تۇرعان 26 وقۋ ورنىنان شاقىرتۋ الىپتى.
«8-سىنىپتا شەتەلدە وقيتىن ستۋدەنتتەردىڭ سۋرەتتەرىن، ۆيدەولارىن كورە باستادىم. 9-سىنىپتا امەريكا جانە انگلياعا وقۋعا ءتۇسۋ جايلى مالىمەتتەر ىزدەي باستادىم. 10-سىنىپتا دايىندىقتى باستادىم»، – دەدى رەسپۋبليكالىق فيزيكا-ماتەماتيكا مەكتەبىنىڭ تۇلەگى دينارا قاليحان.
دينارانىڭ تاڭداۋى Google، Instagram نەگىزىن قالاۋشىلار، اقش-تىڭ 31 پرەزيدەنتى وقىعان ستەنفورد ۋنيۆەرسيتەتىنە ءتۇستى. ال ۇستازى شاكىرتىنىڭ بىلىمگە دەگەن ىزدەنىسىنىڭ زور ەكەنىن ايتادى. بويىنداعى وجەتتىلىك پەن تاباندىلىق ونى كوپ جەتىستىككە جەتەلەيتىنىنە سەنىمدى.
«دينارانىڭ ماقساتى ايقىن بولدى. مەكتەپ قابىرعاسىندا جۇرگەندە-اق شەتەلدىك ۋنيۆەرسيتتەرگە تۇسەم دەگەن ماقسات قويدى»، – دەدى ەسپۋبليكالىق فيزيكا-ماتەماتيكا مەكتەبىنىڭ ۇستازى جاننۇر مەلس قىزى
«ارمانىنا جەتىپ، سول ستەنفورد ۋنيۆەرسيتەتىنە وقۋعا جولداما الدى»، – دەدى رەسپۋبليكالىق فيزيكا-ماتەماتيكا مەكتەبىنىڭ ۇستازى ديدار ارداق.
«ءبىز دينارامەن ماقتانامىز. جەتىستىگى الدا دەپ سەنەمىز»، – دەدى رەسپۋبليكالىق فيزيكا-ماتەماتيكا مەكتەبىنىڭ ۇستازى دينارا قۋاندىق قىزى.
وزات وقۋشى ماگيستراتۋرانى دا سول وقۋ ورداسىندا ءتامامداعىسى كەلەدى. ءبىلىمىن جەتىلدىرىپ، ەلگە ورالعان سوڭ، پايدالى جوبالاردى ىسكە اسىرعىسى كەلەتىنىن ايتتى.
«ساباق كەزدەرىندە دينارا وتە بەلسەندىلىگىمەن جانە كوشباسشى قاسيەتىمەن ەرەكشەلەنەدى. ماتەماتيكاعا دەگەن قۇشتارلىعى وتە جاقسى. ءبىز سىنىپتا ەسەپتى جارىسىپ شىعاراتىنبىز»، – دەدى دينارانىڭ سىنىپتاسى نۇربولات سۇلتانبايەۆ.
دينارا بۇعان دەيىن دە سىنىپتاسىمەن بىرىگىپ، ەرەكشە جوبا ويلاپ تاپقان. ونداعى باستى ماقسات – زورلىق زومبىلىققا ۇشىراعان جاندارعا كومەك قولىن سوزۋ. ايتا كەتەيىك، بىلتىر ەلىمىزدىڭ 15 ۇزدىك تۇلەگى وزگە مەملەكەتتىڭ جوعارى وقۋ ورىندارىنا تۇسكەن.