مەگاپوليستە جوبا اياسىندا 2 مىڭعا جۋىق عيماراتتىڭ جەدەلساتىسى اۋىستىرىلعان
الماتىدا بيىل 100-دەن استام تۇرعىن ءۇي جاڭارادى. بىرنەشە جىلدان بەرى جوندەۋ كورمەي، توزىعى جەتكەن باسپانالار جاڭاشا تۇرگە ەنەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
مەملەكەتتىك باعدارلاما اياسىندا ءۇيدىڭ قاسبەتىن جاڭارتۋ، ينجەنەرلىك جەلىلەرىن اۋىستىرۋ جانە جەرتولە مەن كىرەبەرىسىنە كۇردەلى جوندەۋ جۇرگىزۋ قاراستىرىلعان. ول ءۇشىن قارجى نەسيەلىك جۇيەمەن بەرىلەدى. قوماقتى قاراجاتتى 8 جىلدان 15 جىلعا دەيىن ءبولىپ تولەۋگە بولادى. باستىسى - پايىزسىز. ياعني، تۇرعىندار الدىمەن مەملەكەت قارجىسىنا ۇيلەرىن جوندەپ، كەيىننەن ونى از مولشەردە ءبولىپ تولەۋ ارقىلى قايتارادى.
«باستاپقىدا ءبىز تۇرعىندارمەن ءۇيدىڭ شاتىرىن جوندەۋگە كەلىسكەنبىز. كەيىننەن مەملەكەتتەن بەرىلەتىن قارجى ارقىلى ءۇيدى تولىعىمەن جاڭارتۋعا بولاتىنىن بىلدىك. سويتتىك تە، بىردەن كەلىستىك. ءۇيدىڭ سىرتىن بويايتىن ءتۇستى دە ءوزىمىز تاڭدادىق. اي سايىنعى تولەمى دە ءتيىمدى. اركىم ءوزى تۇراتىن پاتەرىنىڭ شارشى مەترىنە قاراي ءارتۇرلى تولەيدى. شامامەن 5- 7 مىڭ تەڭگە ارالىعىندا. ول اي سايىن كوممۋنالدىق تولەممەن بىرگە كەلىپ وتىرادى»، – دەدى قالا تۇرعىنى ەلەنا ۋمەكەنوۆا.
ايتا كەتەيىك، باعدارلاما 2011 جىلدان بەرى جۇزەگە اسىرىلىپ كەلەدى. بۇگىنگە دەيىن مەگاپوليستە وسى جوبا اياسىندا 965 كوپ قاباتتى تۇرعىن ءۇي جاڭارتىلىپ، 2 مىڭعا جۋىق عيماراتتىڭ جەدەلساتىسى اۋىستىرىلعان. سالاعا جاۋاپتى باسقارما ماماندارىنىڭ حابارلاۋىنشا، بيىل كۇردەلى جوندەۋ جۇرگىزۋگە 83 تۇرعىن ءۇي ءوتىنىم بەرگەن.
«تۇرعىنداردان سۇرانىس ءالى دە قابىلدانىپ جاتىر. «الماتى» تۇرعىن ءۇي جاۋاپكەرشىلىگى شەكتەۋلى سەرىكتەستىگىنە بارىپ، قۇجاتىن تاپسىرا الادى. كەيىننەن وزدەرىمەن بىرلەسىپ، جينالىس جاسايمىز. كۇردەلى جوندەۋ جۇمىستارى وزدەرى قالاعانداي جاسالادى. ونى جاساعان مەردىگەر كومپانيا وكىلدەرى 2 جىلعا دەيىن كەپىلدىك بەرەدى. وسى ۋاقىت ارالىعىندا قانداي دا ءبىر اقاۋ بولسا، ونى ءوز قاراجاتىنا جوندەپ بەرۋگە مىندەتتەلەدى»، – دەدى كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى نۇربول قاجين.