جىل باسىنان بەرى دارىگەرلەر 132 وتا جاسادى
الماتى بالالار جەدەل مەديسينالىق كومەك كورسەتۋ ورتالىعىنىڭ وفتالمولوگيا بولىمشەسىندە قيتارلانعان ۇيلەسكەن قىليلىق، شاشىراندى ۇيلەسكەن قىليلىق، تىك قىليلىق دياگنوزى بار بالالاردى ەمدەيدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بالالاردا كورۋ قابىلەتىنىڭ بۇزىلۋى تۋا بىتكەن جانە گادجەتتەرگە دەگەن شەكسىز قۇمارلىقتىڭ ناتيجەسىندە پايدا بولادى. قىليلىقتى ەمدەۋگە بولادى. ءبىراق دارىگەرلەر ەمدەۋدى ۇزاق ۋاقىتقا كەيىنگە قالدىرماۋعا كەڭەس بەرەدى. بالالار جەدەل جاردەم ورتالىعىندا كورۋ قابىلەتىن تۇزەتۋگە مۇمكىندىك بەرەتىن ترەناجەرلار - سينوپتوفور جانە ماكۋلوتەستەر كومەگىمەن حيرۋرگيالىق ەمەس ەمدەۋ ادىستەرى قولدانىلادى. كوپ جاعدايدا وفتالمولوگتار قىليلىقتى حيرۋرگيالىق ارالاسۋسىز كونسەرۆاتيۆتى تۇردە ەمدەيدى.
«قىليلىقتى ەمدەۋ كەزىندە ءبىزدىڭ ماقساتىمىز اقاۋدى كوسمەتيكالىق جويۋ عانا ەمەس، سونداي-اق ەڭ جوعارى كورۋ فۋنكسياسىن دامىتۋعا جاعداي جاساۋ - بۇل بينوكۋليارلىق (قورشاعان ورتانى ەكى كوزبەن قابىلداۋ قابىلەتى)، ستەرەوسكوپيالىق كورۋ.
ءارى قاراي ەمدەۋ تاكتيكاسىن شەشۋ ءۇشىن بالانى مۇمكىندىگىنشە ەرتەرەك وفتالمولوگقا كورسەتكەن ءجون. كورۋ اناليزاتورىنىڭ جوعارى ساپالى تولىققاندى دامۋىنا جاعداي جاساۋ ءۇشىن قىليلىقتى ەمدەۋ قاشاندا دەر كەزىندە جۇرگىزىلۋى كەرەك. بۇل وتە ماڭىزدى! وكىنىشكە قاراي، 7-8 جاستان كەيىن بالالاردى ەمدەگەندە، ءبىز تەك كورۋ وتكىرلىگىن ساقتاۋدى ماقسات ەتەمىز، ويتكەنى بۇل ءومىر ساپاسىنىڭ ماڭىزدى فاكتورى بولىپ تابىلادى، ءبىراق بۇل كەزدە بينوكۋليارلىق كورۋدىڭ تولىق دامۋى تۋرالى ءسوز قوزعامايمىز. سوندىقتان ەمدەلۋگە جاسى ۇلكەنىرەك بالالار كەلگەندە، جاقسى جانە ءتيىمدى ناتيجەنىڭ بولۋى ەكىتالاي. مۇنداي بالالاردى 7 جاسقا دەيىن، ياعني مەكتەپكە دەيىن باقىلاپ، ەمدەۋگە تىرىسىڭىز. بينوكۋليارلىق بۇزىلۋمەن بايلانىستى قانداي دا ءبىر جاعدايدى تۇزەتۋ مەكتەپ جۇكتەمەسىنىڭ بولۋىنا بايلانىستى بەلگىلى ءبىر قيىندىق تۋدىرادى. وتاسىز ەمدەۋگە بولاتىن قىليلىقتىڭ كوپتەگەن ءتۇرى بار، سوندىقتان حيرۋرگيا - دارىگەر شەشەتىن ماسەلە.
كوزىلدىرىكتى تاڭداۋ، اپپاراتتىق ەمدەۋ اياسىندا حيرۋرگياسىز ءتيىمدى ەمدەلەتىن قىليلىق تۇرلەرى بار»، - دەپ تۇسىندىرەدى الماتى قالالىق بالالار جەدەل مەديسينالىق جاردەم ورتالىعىنىڭ وفتالمولوگى، جوعارى ساناتتى دارىگەر، مەديسينا عىلىمدارىنىڭ كانديداتى، دۇنيەجۇزىلىك بالالار وفتالمولوگتارى قاۋىمداستىعىنىڭ مۇشەسى ءلاززات كەيكينا.
قىليلىقتىڭ سەبەبى كوپ. قىليلىقتى قوزدىراتىن كوزدىڭ كورىنىستەرىمەن قاتار نيەۆرولوگيالىق جاعدايلار بولۋى مۇمكىن، سوندىقتان ورتالىقتىڭ وفتالمولوگتارى قاشاندا نيەۆروپاتولوگ ارىپتەستەرىمەن بىرگە جۇمىس ىستەيدى. قالىپتى كورۋ ومىرتقانىڭ قۇرىلىمىنا تىكەلەي بايلانىستى ەكەنىن اتاپ وتكەن ءجون، ال قىليلىق بالالار ومىرتقانى دۇرىس ۇستاماۋدىڭ سەبەبى بولىپ تابىلادى.
«قىليلىق ومىرتقانىڭ قۇرىلىمىنا قاتتى اسەر ەتەدى. باستى ءماجبۇرلى تومەن قاراپ ۇستاۋ ونىڭ كۇيىنە عانا ەمەس، جالپى ومىرتقانىڭ قۇرىلىمىنا تولىعىمەن اسەر ەتەدى. سوندىقتان، ءبىز قىليلىقتى نەعۇرلىم ەرتەرەك ەمدەسەك، نارەستەنىڭ باستى ۇستاۋىن قالپىنا كەلتىرۋ وڭايىراق بولادى. سايكەسىنشە، ومىرتقانىڭ جاعدايى دا جاقسارادى. كوبىنەسە «كوزدىك قيسىق مويىندى» شىنايى قيسىق مويىنمەن شاتاستىرادى، كوپتەگەن وستەوپاتتار كوزدى ەمدەۋ كەرەك ەكەنىن ۇمىتىپ، كەيدە ونى ءساتسىز ەمدەپ تە جاتادى»، - دەپ قوستى ءلاززات كەيكينا.
2022 جىلدىڭ باسىنان الماتى بالالار شۇعىل مەديسينالىق كومەك كورسەتۋ ورتالىعىنىڭ وفتالمولوگيا بولىمىندە قىليلىق دياگنوزى بويىنشا 147 بالا ەمدەلدى. وتكەن 2021 جىلى 109 ناۋقاس ەمدەلدى. كەيبىر جاعدايدا قىليلىقتى تۇزەتۋ تەك حيرۋرگيالىق ادىسپەن ىسكە اسىرىلادى. جىل باسىنان بەرى دارىگەرلەر 132 وتا جاسادى (2021 جىلى 99 وتا جاسالدى).