الماتى اكىمدىگىنىڭ دەلەگاسياسى جۇڭگو حالىق رەسپۋبليكاسىنا جاساعان ساپارى اياسىندا قالا اكىمى دارحان ساتىبالدى روبوتوتەحنيكا سالاسىنداعى الەمدىك كوشباسشىلاردىڭ ءبىرى Unitree Robotics كومپانياسىنىڭ باسشىلىعىمەن كەزدەستى.
كەلىسسوز ناتيجەسىندە تاراپتار الماتىدا روبوتوتەحنيكا سالاسىنداعى بىرلەسكەن زەرتحانا قۇرۋ جونىندە مەموراندۋمعا قول قويدى. جاڭا ورتالىق ءموبيلدى روبوتوتەحنيكا، اۆتونومدى ناۆيگاسيا جانە جاساندى ينتەللەكت تەحنولوگياسىن دامىتۋ مەن ەنگىزۋدىڭ ماڭىزدى الاڭىنا اينالماق. جوبانى الماتى قالاسى اكىمدىگى Freedom Holding Corp. كومپانياسىنىڭ ستراتەگيالىق قولداۋىمەن جۇزەگە اسىرادى.
Unitree Robotics كومپانياسى روبوتوتەحنيكالىق جابدىقتاردىڭ جاھاندىق نارىعىندا جەتەكشى ورىنعا يە جانە ءموبيلدى ءارى كوپفۋنكسيالى روبوتتاردى شىعاراتىن ەڭ ءىرى ءۇش ءوندىرۋشىنىڭ قاتارىنا كىرەدى. كومپانيا الەمدىك ءتورتاياقتى روبوتتار نارىعىنىڭ شامامەن 62 پايىزىن جانە ازيا نارىعىنىڭ 75 پايىزىنان استامىن يەلەنىپ وتىر.
الماتى اكىمى دارحان ساتىبالدىنىڭ ايتۋىنشا، زەرتحانانىڭ اشىلۋى مەگاپوليستىڭ يننوۆاسيالىق ەكوجۇيەسىن قالىپتاستىرۋ مەن جوعارى تەحنولوگيا سالاسىنا ينۆەستيسيا تارتۋ باعىتىندا ماڭىزدى قادام بولماق.
ءوز كەزەگىندە Unitree Robotics كومپانياسىنىڭ تەڭ قۇرىلتايشىسى جانە اتقارۋشى ديرەكتورى چەن لي قازاقستاندا روبوتوتەحنيكانى دامىتۋ ىسىنە بەلسەندى اتسالىسۋعا دايىن ەكەنىن ءبىلدىردى.
ايتا كەتەيىك، الماتىدا اشىلاتىن بىرلەسكەن زەرتحانا قالانى سيفرلاندىرۋ ستراتەگياسىن جۇزەگە اسىرۋدىڭ، كادرلىق جانە تەحنولوگيالىق الەۋەتتى ارتتىرۋدىڭ، سونداي-اق جوعارى تەحنولوگيالىق ينۆەستيسيا تارتۋدىڭ ماڭىزدى كەزەڭى بولماق.