قازاق ۇلتتىق قىزدار پەداگوگيكالىق ۋنيۆەرسيتەتى ەۋروپالىق وداقتىڭ ەڭ ءىرى عىلىمي-يننوۆاسيالىق باستاماسى – Horizon Europe باعدارلاماسىنىڭ كونكۋرستىق ىرىكتەۋىندە جەڭىسكە جەتتى، - دەپ حابارلايدى Aqshamnews.kz.
بۇل جەتىستىك قازاقستاندىق جوعارى وقۋ ورىندارىنىڭ حالىقارالىق عىلىمي كەڭىستىكتەگى بەدەلىنىڭ ارتىپ كەلە جاتقانىن كورسەتەدى.
اتالعان جەڭىس اياسىندا ۋنيۆەرسيتەت HUMAN-AI اتتى حالىقارالىق عىلىمي جوبانىڭ كونسورسيۋمىنا رەسمي تۇردە قوسىلدى. جوبا جاساندى ينتەللەكتتىڭ ءبىلىم بەرۋ، عىلىم جانە قوعامعا اسەرىن ەسكەرە وتىرىپ، جوعارى ءبىلىم بەرۋ جۇيەسىن جاڭا جاھاندىق تالاپتارعا بەيىمدەۋگە باعىتتالعان.
HUMAN-AI جوباسىنىڭ نەگىزگى ماقساتى – جوعارى ءبىلىم بەرۋدە جاساندى ينتەللەكتتى ەتيكالىق، ادامعا باعدارلانعان جانە جاۋاپتى تۇردە قولدانۋدىڭ كەشەندى مودەلىن ازىرلەۋ. جوبا شەڭبەرىندە AI-عا بەيىمدەلگەن يننوۆاسيالىق وقىتۋ ستراتەگيالارىن دامىتۋ، اكادەميالىق ورتاعا ساي soft skills جۇيەسىن قالىپتاستىرۋ، وقۋ باعدارلامالارىن ەڭبەك نارىعىنىڭ تالاپتارىمەن ۇيلەستىرۋ كوزدەلگەن. سونىمەن قاتار سيفرلىق ساۋاتتىلىقتى ادامگەرشىلىك قۇندىلىقتارمەن جانە جاۋاپتى پايدالانۋمەن ۇشتاستىرۋ، تەحنولوگيالىق وزگەرىستەر جاعدايىندا ءبىلىم بەرۋدەگى «ادام فاكتورىن» ساقتاۋ ماسەلەلەرى زەرتتەلەدى.
HUMAN-AI – حالىقارالىق دەڭگەيدەگى اۋقىمدى جوبا. كونسورسيۋم قۇرامىنا پولشا، ەستونيا، پورتۋگاليا، نيدەرلاند، سلوۆاكيا، ۋكراينا، تۇركيا، قازاقستان، تايلاند جانە برازيليا ەلدەرىنەن جەتەكشى عىلىمي جانە ءبىلىم بەرۋ ۇيىمدارى ەنگەن. قازاقستان تاراپىنان جوبانى قازاق ۇلتتىق قىزدار پەداگوگيكالىق ۋنيۆەرسيتەتىنىڭ پروفەسسورى سالعارايەۆا گۇلناز يبراگيم قىزى باسقارادى.
بۇل جەتىستىك قازاقستاننىڭ حالىقارالىق عىلىمي قاۋىمداستىقتاعى پوزيسياسىن نىعايتىپ، ەلىمىزدىڭ جوعارى بىلىكتى كادرلىق الەۋەتى مەن عىلىمي ازىرلەمەلەرى بار سەنىمدى عىلىمي-تەحنولوگيالىق سەرىكتەس رەتىندە تانىلىپ وتىرعانىن دالەلدەيدى.
ايتا كەتەيىك، بۇل – Horizon Europe باعدارلاماسى اياسىندا قازاقستاننان ماقۇلدانعان ەكىنشى جوبا. اتالعان جاڭالىق ەلىمىزدىڭ ەۋروپالىق عىلىمي كەڭىستىكتە تەك قاتىسۋشى عانا ەمەس، تولىققاندى ءارى سەنىمدى سەرىكتەسكە اينالىپ كەلە جاتقانىن كورسەتەدى.