ءتارتىپ بۇزۋشىلار كوبىنەسە قوعامدىق تاماقتانۋ ورىندارىنا كىرۋگە تىرىسادى.
الماتىداعى ەپيدەميولوگيالىق احۋال ۋشىعىپ، ناشارلاۋدا. بۇل ۆاكسينالانباعان جانە بۇرىن اۋىرماعان تۇرعىنداردىڭ كوروناۆيرۋس ينفەكسياسىنىڭ دەلتا شتاممىن جۇقتىرۋىنا بايلانىستى بولۋدا. كۆي-دىڭ ودان ءارى تارالۋىن بولدىرماۋ جونىندەگى قالالىق شتاب وتىرىسىندا احۋالدى تۇراقتاندىرۋ شارالارى قارالدى،دەپ حابارلايدى Almaty-akhamy.kz.
قالانىڭ سانيتارلىق-ەپيدەميولوگيالىق باقىلاۋ دەپارتامەنتىنىڭ مالىمەتى بويىنشا، الماتىدا اعىمداعى جىلدىڭ باسىنان بەرى جالپى كۆي-دىڭ 65 878 جاعدايى تىركەلگەن. وتكەن 2 اپتادا بۇرىڭعى 2 اپتامەن سالىستىرعاندا كۆي دەرتى 2،6 ەسەگە ارتقان، تاۋلىكتىك ءوسىم 1%-دان استام. 1-18 شىلدە ارالىعىندا كۆي-دىڭ 10 093 جاعدايى تىركەلدى، بۇل 10700 جاعدايدىڭ پەسسيميستىك بولجامىنا سايكەس كەلۋدە.
دەرتتىڭ ءوسۋ سەبەبى بەلگىلى – 18 ماۋسىمنان باستاپ قالادا «دەلتا» نۇسقاسى تارالا باستادى، ول وتە جۇقپالى ءارى تەز تارايدى، كلينيكالىق كورىنىستەرى تىم اۋىر.
سوڭعى 7 كۇندە «سيمپتومدى» پاسيەنتتەردىڭ ۇلەس سالماعى بۇرىنعى 7 كۇندەگى 88%-دان 90%-عا دەيىن وسۋدە، بۇل وتكەن جىلى ەپيدەميانىڭ ءبىرىنشى تولقىنى كەزىندە COVID-19-دىڭ ۋحان نۇسقاسىنىڭ 50%-نا قارسى.
قالالىق سەبد-نىڭ ماماندارى كۆي جاعدايى بويىنشا الداعى 3 ايعا، 30 قىركۇيەككە دەيىن سانيتارلىق-ەپيدەميولوگيالىق احۋالدىڭ دامۋىنا بولجام جاسادى. بازالىق بولجام بويىنشا دەرتتىڭ شارىقتاۋ شەگى 3-4 تامىزعا تۋرا كەلەدى ءارى تاۋلىگىنە 1600-گە جۋىق جاڭا جاعداي تىركەلۋى مۇمكىن. پەسسيميستىك بولجام بويىنشا دەرتتىڭ شارىقتاۋ شەگى 10-11 تامىزعا تۋرا كەلەدى، 1900 جاڭا جاعداي تىركەلۋى مۇمكىن.
بازالىق بولجامعا سايكەس 5-5،5 مىڭ توسەك ورىن پايدالانىلادى، ال پەسسيميستىك بولجامنىڭ شارىقتاۋ شەگى بويىنشا 6-6،5 مىڭ توسەك ورىنعا ارتۋى مۇمكىن.
دەمەك، بازالىق سەناريي بويىنشا شىلدەدە 27،5 مىڭ، تامىزدا – 34،5 مىڭ، قىركۇيەكتە – 4،5 مىڭ كۆي جاعدايى، ال پەسسيميستىك بولجامعا سايكەس شىلدەدە 29 مىڭ، تامىزدا – 49،5 مىڭ، قىركۇيەكتە – 13،5 مىڭ جاعداي. كۆي جاعدايى تىركەلۋى مۇمكىن.
مەكتەپ وقۋشىلارىنىڭ وففلاين وقۋىن قامتاماسىز ەتۋ ءۇشىن مونيتورينگ جۇمىستارى جۇرگىزىلۋدە جانە مۇعالىمدەر ۆاكسينالانۋدا. بۇگىندە مۇعالىمدەردىڭ 97%-ى I كومپونەنتپەن، 67،9%-ى II كومپونەنتپەن ۆاكسينالاندى. بۇدان وزگە، مەديسينالىق قىزمەتكەرلەردىڭ 97،3%-ى I كومپونەنتپەن، 67،3%-ى II كومپونەنتپەن ۆاكسينالاندى.
سوڭعى 2 اپتاداعى جاس قۇرامىن تالداۋبالالار مەن جاسوسپىرىمدەردە ۆيرۋستىڭ دەلتا نۇسقاسىنىڭ تەز جۇعاتىنىن كورسەتتى. 14 جاسقا دەيىنگى بالالاردىڭ ۇلەس سالماعى 1%-عا ءوستى جانە جوعارى بولىپ قالۋدا – 14%. 20 جاستان 40 جاسقا دەيىنگى ازاماتتاردىڭ دەرت جۇقتىرۋى تومەندەدى، 39%-دان 37،5%-عا دەيىن. 40-59 جاستاعى ناۋقاستاردىڭ ۇلەس سالماعى جوعارى – 25%. ال، 60 جاستاعى ادامدار اراسىندا جۇقتىرعانداردىڭ ۇلەسى 1،1%-عا وسكەن.
جۇمىسپەن قامتۋ بويىنشا سوڭعى 14 كۇندە كۆي ءوزىن-وزى جۇمىسپەن قامتىعاندار اراسىندا جوعارى – 41%، ءتۇرلى ج ش س، جك، اق جۇمىسشىلارى اراسىندا – 17%، زەينەتكەرلەر اراسىندا – 16،4%، مەكتەپ وقۋشىلارى اراسىندا – 9،2%، مەكتەپ جاسىنا دەيىنگى بالالار اراسىندا 6،4%، جالپى اۋىرعاندار سانىنىڭ 90%-ى.
سوڭعى 7 كۇندە كۆي ءجيى جۇعاتىن جەرلەر: ساۋدا نىساندارى – 40%، قوعامدىق كولىك – 20%، وتباسىلىق بايلانىس – 19%، بازارلار – 16%.
الماتىدا 2282 قاتىسۋشى Ashyq جوباسى بويىنشا جۇمىس ىستەيدى. 9-14 شىلدە ارالىعىندا نىسانداردا QR-كودىن (تىركەۋ) پايدالانىپ كەلۋشىلەردى تىركەۋدىڭ مينيمالدى سانىن جۇرگىزبەگەن فاكتىلەر انىقتالمادى. 100 قاتىسۋشى – Ashyq جوباسىنىڭ كوشباسشىلارى. 26 ءساۋىر مەن 14 شىلدە ارالىعىندا 211 جاۋاپسىز قاتىسۋشى جوبادان شىعارىلدى.
9-14 شىلدە ارالىعىندا Ashyq-تا سكانەرلەۋ كەزىندە «قىزىل» مارتەبەسى بار 31 ادامعا ءوزىن-وزى وقشاۋلاۋ رەجيمىن بۇزعانى ءۇشىن 30 اەك ايىپپۇل سالىندى. جالپى العاندا، 28 ءساۋىر مەن 14 شىلدە ارالىعىندا ءوزىن-وزى وقشاۋلاۋ رەجيمىن بۇزعانى ءۇشىن «قىزىل» مارتەبەگە يە 65 ادامعا 30 اەك كولەمىندە ايىپپۇل سالىندى.
ءتارتىپ بۇزۋشىلار كوبىنەسە قوعامدىق تاماقتانۋ ورىندارىنا كىرۋگە تىرىسادى، مۇندا 58 ادامنان «قىزىل» جانە 13 ادامنان «سارى» مارتەبە انىقتالعان. سوسو كىرە بەرىسىندە 28 ادامنىڭ «قىزىل» جانە 110 ادامنىڭ «سارى» مارتەبەسى بەلگىلى بولدى. «قىزىل» مارتەبەسى بار 9 ادام الماتى اۋەجايىنا وتپەكشى بولدى.
سوندىقتان كۆي-دىڭ ودان ءارى تارالۋىن بولدىرماۋ جونىندەگى قالالىق شتاب امبۋلاتوريالىق ەمدەلىپ جاتقان قالا تۇرعىندارىن ءوزىن-وزى وقشاۋلاۋ رەجيمىن بۇزباۋعا جانە قوعام الدىندا ازاماتتىق جاۋاپكەرشىلىك تانىتۋعا شاقىرادى. ۆيرۋس جۇقتىرعان ادامدارمەن بايلانىستا بولعان تۇلعالار ءوزىن-وزى وقشاۋلاۋ رەجيمىن ساقتاۋى جانە باسقا ادامدارعا جۇقتىرماس ءۇشىن ادامدار كوپ جينالاتىن ورىندارعا بارماۋلارى ءتيىس.