وسى ماقساتتا ءسۇت ونىمدەرىن سيفرلىق تاڭبالاۋ بويىنشا پيلوتتىق جوبا ىسكە اسىرىلا باستادى.
قازاقستان ۇكىمەتى ءسۇت سالاسىنداعى ساپاسىز ونىمدەرمەن كۇرەس جۇمىسىن باستاماق، دەپ حابارلايدى Almaty-akshamy.kz.
مامانداردىڭ ايتۋىنشا، بۇل كۇرەستىڭ نەگىزگى قۇرالىنا سيفرلىق تاڭبالاۋ جاتادى. قازاقستاندا ءسۇت ونىمدەرىن مىندەتتى سيفرلىق تاڭبالاۋدى ەنگىزۋ 2022 جىلعا جوسپارلانىپ وتىر. ءسۇت سالاسىنداعى كولەڭكەلى اينالىم 13% - دى قۇرايدى، بۇل قازاقستاندا ساتىلاتىن ءاربىر سەگىزىنشى ءسۇت ءونىمى تۇتىنۋشىنىڭ دەنساۋلىعى ءۇشىن ءقاۋىپ توندىرەتىنىن بىلدىرەدى.
«بىرىنشىدەن، Data Matrix كودى مەرزىمى وتكەن تاۋارلاردىڭ كاسسالىق شىعارىلىمىن بلوكتايدى، دۇكەندەر مەن ديستريبيۋتورلار سيفرلىق كودتاعى جارامدىلىق مەرزىمى تۋرالى اقپاراتتى وزگەرتە المايدى. ەكىنشىدەن، تاڭبالانعان ءونىمدى ساتىپ الۋشى Naqty Onim ءموبيلدى قوسىمشاسىنىڭ كومەگىمەن وندىرۋشىگە جانە مەملەكەتتىك ورگاندارعا بۇزۋشىلىقتار تۋرالى سيگنال بەرە الادى. ۇشىنشىدەن، كريپتو-قورعانىس جانە سيفرلىق كودتى قولدان جاساي الماۋ ءونىمنىڭ ءوزىن دە جالعان جاساۋعا مۇمكىندىك بەرمەيدى. بۇل شارالار نارىقتى «اعارتۋعا» جانە قازاقستاندىق تۇتىنۋشىنى ساپاسىز ونىمدەردەن قورعاۋعا كومەكتەسەدى»، – دەلىنگەن قازاقستان رەسپۋبليكاسى اۋىل شارۋاشىلىعى مينيسترلىگىءنىڭ باسپا ءسوز قىزمەتىنىڭ حابارلاماسىندا.
سونىمەن قاتار، مامانداردىڭ ايتۋىنشا،تاڭبالاۋ پروسەسى تاۋارلاردى وندىرۋشىدەن سوڭعى تۇتىنۋشىعا دەيىن باقىلاۋدى ارتتىرادى، ويتكەنى ءونىمنىڭ بارلىق لوگيستيكاسى تاڭبالاۋ جۇيەسىندە كورىنەدى. جۇيە ءار قاپتاما ءۇشىن Data Matrix كودىن جاسايدى.
بۇل رەتتە ءونىمنىڭ بولشەك ساۋدا باعاسىندا تاڭبالاۋعا ارنالعان جابدىققا ءوندىرۋشى شىعىندارىنىڭ ۇلەسى 0،06-دان 0،15% - عا دەيىن قۇرايدى. ماسەلەن، ءبىر جەلى ءۇشىن تاڭبالاۋ جابدىعىنىڭ قۇنى كاسىپورىننىڭ كولەمىنە جانە ءونىم تۇرلەرىنە بايلانىستى 0،5-تەن 9،2 ملن تەڭگەگە دەيىن تۇرلەنەدى.
ايتا كەتەيىك، 2021 جىلعى 1 ماۋسىمنان باستاپ رەسەيدە جانە 8 شىلدەدەن باستاپ بەلارۋسسيادا ءسۇت ونىمدەرىن، اتاپ ايتقاندا بالمۇزداق پەن ىرىمشىكتەردى مىندەتتى سيفرلىق تاڭبالاۋ ەنگىزىلدى. سوندىقتان قازاقستاندا تاۋارلاردى Data Matrix كودىمەن تاڭبالاۋ وتاندىق وندىرۋشىلەردى قورعاۋ جانە ەلدىڭ ءسۇت سالاسىنىڭ باسەكەگە قابىلەتتىلىگىن قامتاماسىز ەتۋ ءۇشىن ماڭىزدى فاكتورعا اينالۋدا.